އެސްޖޭ ދިހެރެޔާ އެޕާޓްމަންޓުތައް ގަތުމަށް ހުޅުވާލައިފި

ހުޅުމާލޭގައި އެސްޖޭ ގްރޫޕުން ތަރައްގީކޮށްފައިވާ ޒަމާނީ ފެންވަރުގެ "އެސްޖޭ ދިހެރެޔާ" ރެސިޑެންސްގެ އެޕާޓްމަންޓުތައް ގަތުމުގެ ފުރުސަތު އާންމުންނަށް ރަސްމީކޮށް ހުޅުވާލައިފިއެވެ. މި މަޝްރޫއުގެ ދަށުން ޖުމްލަ 90 އެޕާޓްމަންޓު ވިއްކުމަށް ވަނީ ހަމަޖެހިފައެވެ.

އެސްޖޭ ގްރޫޕުން މައުލޫމާތު ދޭ ގޮތުގައި، މި ރެސިޑެންސް އިމާރާތަކީ ހުޅުމާލޭގެ ހިތްގައިމު ގޮނޑުދޮށުގެ މަންޒަރު ވަރަށް ފުރިހަމައަށް ފެންނާނެހެން ފަރުމާކޮށްފައިވާ ތަނެކެވެ. މީގެއިތުރުން، ވެލާނާ އިންޓަނޭޝަނަލް އެއާޕޯޓުން ފުރާ ފްލައިޓްތަކާއި ސީޕްލޭންތައް ނައްޓާލާ ހިތްގައިމު މަންޒަރުތައް ހިމެނޭހެން، ގުދުރަތީ ރީތި އެތައް މަންޒަރެއް މި އިމާރާތުން ބަލާލެވޭނެއެވެ.

ދިރިއުޅުމުގެ ލުއިފަސޭހަކަމަށް އިސްކަންދީގެން ތަރައްގީކުރާ މި ރެސިޑެންސީގައި މަތީ ފެންވަރުގެ ގިނަ ހިދުމަތްތަކެއް ވަނީ ހިމަނާފައެވެ. އޭގެ ތެރޭގައި އިންފިނިޓީ ޕޫލް، ހިތްފަސޭހަ ކޮމަން ޓެރެސް، ޒަމާނީ ޖިމް، ބޭސްމަންޓް ޕާކިން، އަދި ކުނި އުކާލުމަށް ހާއްސަ ގާބޭޖް ޝޫޓް ހިމެނެއެވެ. އަދި ރައްކާތެރިކަން ކަށަވަރު ކުރުމުގެ ގޮތުން 24 ގަޑިއިރު ސެކިއުރިޓީ ބަލަހައްޓާނެ ކަމަށްވެސް އެ ކުންފުނިން ބުނެއެވެ.

މި އިމާރާތް ހުންނަ ސަރަހައްދުގެ ގޮތުން ހުޅުމާލޭ ފެރީ ޓާމިނަލް، ވެލާނާ އިންޓަނޭޝަނަލް އެއާޕޯޓް އަދި ސެންޓްރަލް ޕާކުގެ އިތުރުން ހުޅުމާލޭގެ މުހިންމު އެހެނިހެން ހިދުމަތްތައް ލިބޭ ތަންތަނަށް ފަސޭހަކަމާއެކު ދަތުރުކޮށްލެވޭނެއެވެ. މި އެޕާޓްމަންޓުތައް ގަތުމަށް ޝައުގުވެރިވާ ފަރާތްތަކަށް އެސްޖޭ ގްރޫޕްގެ ރަސްމީ ވެބްސައިޓް މެދުވެރިކޮށް ފަސޭހަކަމާއެކު އެޕްލައި ކުރުމުގެ އިންތިޒާމު މިހާރު ވަނީ ހަމަޖައްސާފައެވެ.

އެސްޖޭ ދިހެރެޔާ ރެސިޑެންސް ތަރައްގީކުރާ އެސްޖޭ ގްރޫޕަކީ 1996 ވަނަ އަހަރުން ފެށިގެން ރާއްޖޭގެ އިމާރާތްކުރުމުގެ ސިނާއަތުގައި ބޮޑު މަގުބޫލުކަމަކާއި އިތުބާރެއް ހޯދާފައިވާ ކުންފުންޏެކެވެ. އެ ކުންފުނިން ވަނީ މީގެކުރިންވެސް ރާއްޖޭގެ އެކި ކަންކޮޅުތަކުގައި ފާހަގަކޮށްލެވޭ ބޮޑެތި މަޝްރޫއުތަކާއި، އާންމު ދިރިއުޅުމަށް ހާއްސަ ފެންވަރު ރަނގަޅު ބޯހިޔާވަހިކަމުގެ މަޝްރޫއުތައް ކާމިޔާބުކަމާއެކު ނިންމާފައެވެ.

މި މަޝްރޫއަކީ ފެންވަރު ރަނގަޅު، ޒަމާނީ ދިރިއުޅުމަކަށް ލޯބިކުރާ ފަރާތްތަކަށް ހުޅުމާލެއިން ލިބިގެންދާނެ އަގުހުރި އަދި އެހާމެ ރަނގަޅު ރަން ފުރުސަތެކެވެ.

އެސްޖޭ ގްރޫޕުން ބުނި ގޮތުގައި، މި އިމާރާތުގެ މަސައްކަތްތައް ކުރިއަށްދަނީ އެންމެ މަތީ ފެންވަރުގެ މެޓީރިއަލް ބޭނުންކޮށްގެން، ކަނޑައެޅިފައިވާ ތާވަލާ އެއްގޮތަށެވެ. އަދި އެޕާޓްމަންޓް ގަންނަ ފަރާތްތަކަށް ލުއިފަސޭހަ ގޮތްތަކެއް ހަމަޖައްސައިދިނުމުގެ ގޮތުން، ބޭންކުތައް މެދުވެރިކޮށް ފައިނޭންސް ކުރެވޭނެ އިންތިޒާމުތައް ވެސް ހަމަޖެހިގެންދާނެ އެވެ.

އެހެންކަމުން، މި އެޕާޓްމަންޓްތަކާ ގުޅޭ އިތުރު ތަފުސީލު ހޯދުމަށާއި، ބުކިން ހެއްދުމުގެ ފުރުސަތު މިހާރު އެ ކުންފުނީގެ ވެބްސައިޓް މެދުވެރިކޮށް ކޮންމެ ފަރާތަކަށް ވެސް ވަނީ ހުޅުވާލެވިފައެވެ.