ފަސް މިލިއަން ގަސް އިންދުމުގެ މަޝްރޫޢަށް 10 ރަށެއްގައި ނާސަރީ އެޅުމަށް އެހީ ދީފި

ސަރުކާރުން އިސްނަގައިގެން ކުރިއަށްގެންދާ ފަސް މިލިއަން ގަސް އިންދުމުގެ ޤައުމީ ޕްރޮގްރާމަށް ބޭނުންވާ ގަސް އުފެއްދުމަށްޓަކައި، ރާއްޖޭގެ 10 ރަށެއްގައި ނާސަރީ އެޅުމަށް ބޭނުންވާ ގްރާންޓް އެހީ މިއަދު ދީފިއެވެ.

މިކަމަށްޓަކައި އެންވަޔަރަންމެޓް މިނިސްޓްރީގައި ބޭއްވި ޚާއްޞަ ރަސްމިއްޔާތެއްގައި، ނާސަރީ އެޅުމަށް ހޮވުނު 10 ރަށުގެ ކައުންސިލްތަކާއެކު ވަނީ އެއްބަސްވުމުގައި ސޮއިކޮށްފައެވެ. މި މަޝްރޫޢުގެ ފުރަތަމަ ބުރުގައި ހިމެނޭ ރަށްތަކަކީ:

• ހއ. ކެލާ

• ށ. މިލަންދޫ

• ނ. ކެނދިކުޅުދުޫ

• ރ. އިންނަމާދޫ

• ބ. މާޅޮސް

• އއ. މަތިވެރި

• މ. މުލައް

• ތ. ކިނބިދޫ

• ގއ. ދާންދޫ

• ގދ. ތިނަދޫ ސިޓީ

މި އެއްބަސްވުމުގެ ދަށުން ނާސަރީ ތަރައްޤީ ކުރުމަށްޓަކައި ކޮންމެ ރަށަކަށް 500,000 (ފަސްލައްކަ) ރުފިޔާގެ އެހީއެއް ދިނުމަށް ވަނީ ހަމަޖެހިފައެވެ. މި މަސައްކަތް ސޮއިކުރާ ތާރީޚުން ފެށިގެން 7 މަސްދުވަހުގެ ތެރޭގައި ނިންމަންޖެހޭއިރު، މި ނާސަރީތަކަކީ އެ އަތޮޅުތަކުގައި ފަސް މިލިއަން ގަސް އިންދުމުގެ މަޝްރޫޢު ކުރިއަށްގެންދިއުމުގައި މައިގަނޑު މަރުކަޒުތަކެއްގެ ގޮތުގައި ހަރަކާތްތެރިވާނެ ތަންތަނެވެ.

އެންވަޔަރަންމެޓް މިނިސްޓްރީން މަޢުލޫމާތު ދޭ ގޮތުގައި، ކޮންމެ ނާސަރީއަކުން އަހަރަކު ގާތްގަނޑަކަށް 50,000 ގަސް އުފައްދާނެ ކަމަށް އަންދާޒާ ކުރެވެއެވެ. މީގެ ސަބަބުން ކައިރި ރަށްރަށަށް ބޭނުންވާ ގަސްތައް ފޯރުކޮށްދިނުމުގައި ބޮޑު ލުޔެއް ލިބިގެންދާނެއެވެ. މީގެ އިތުރުން، މި މަޝްރޫޢު ހަރުދަނާކުރުމުގެ ގޮތުން ނާސަރީތަކުގައި މަސައްކަތްކުރާ މުވައްޒަފުންނަށް ބޭނުންވާ 'ގާޑަނިންގ' ތަމްރީނު ޕްރޮގްރާމްތައް ފަރުމާކުރުމުގެ މަސައްކަތްވެސް މިހާރު ދަނީ ކުރަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން 2024 ވަނަ އަހަރުގެ ތިމާވެށީގެ ދުވަހު ފެށި މި ޕްރޮގްރާމަށް ބޮޑު ތަރުޙީބެއް ލިބެމުންދެއެވެ. އެގޮތުން މިހާތަނަށް 5.8 މިލިއަނަށްވުރެ ގިނަ އަހުދު ލިބިފައިވާއިރު، 1.6 މިލިއަނަށްވުރެ ގިނަ ގަސް މިހާރު ވަނީ އިންދާފައެވެ. މި ހިނގާ 2026 ވަނަ އަހަރުގެ އަމާޒަކީ އިތުރު 1 މިލިއަން ގަސް އިންދުމެވެ.