ސަރުކާރު ބަންދުވުމާއި ގުޅިގެން 6 ވަނަ ދުވަހު ތިން ހޮސްޕިޓަލެއްގެ ސްޕެޝަލިސްޓް އޯޕީޑީ ބަންދު
އިއްޔެ ބޭއްވުނު ލޯކަލް ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން، ރައްޔިތުންގެ ޚިޔާލުހޯދުމުގެ އާންމު ވޯޓާ ގުޅިގެން ކުރިއަށް އޮތް ދެ ދުވަހު ސަރުކާރު ބަންދުކުރުމަށް ނިންމުމާ ގުޅިގެން، މާލެ ސަރަހައްދުގެ މައި ތިން ހޮސްޕިޓަލެއްގެ ސްޕެޝަލިސްޓް އޯޕީޑީގެ ޚިދުމަތްތައް މާދަމާ ބަންދުވާނެކަން އިިއުލާންކޮށްފިއެވެ.
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން މިއަދު ނެރުނު ބަޔާނެއްގައި ބުނެފައިވަނީ، ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވާ އޭޕްރީލް 5 އަދި 6 ގެ ތެރެއިން، 6 އޭޕްރީލް 2026 ވާ ހޯމަ ދުވަހު ދަރުމަވަންތަ ހޮސްޕިޓަލާއި، އައިޖީއެމްއެޗް އަދި ވިލިމާލެ ހޮސްޕިޓަލްގެ ސްޕެޝަލިސްޓް އޯޕީޑީގެ ޚިދުމަތްތަކާއި އެހެނިހެން ކްލިނިކަލް ޚިދުމަތްތައް މެދުކަނޑާލެވޭނެ ކަމަށެވެ.
ނަމަވެސް، މި ދެ ދުވަހުވެސް ހޮސްޕިޓަލްތަކުން ދެމުންގެންދާ އެޑްމިޓްކޮށްގެން ފަރުވާދޭ އައިޕީޑީ ޚިދުމަތްތަކާއި، ކުއްލި ފަރުވާގެ ނުވަތަ އިމަޖެންސީ ޚިދުމަތްތައް އެއްވެސް މެދުކެނޑުމެއް ނެތި 24 ގަޑިއިރު ކުރިއަށްދާނެ ކަމަށް އެ ހޮސްޕިޓަލުން މައުލޫމާތު ދެއެވެ.
މި ނިންމުމަކީ އިންތިޚާބާ ގުޅުންހުރި މަސައްކަތްތަކަށް ސަރުކާރުން ދެއްވި ބަންދު ދުވަސްތަކާ ގުޅިގެން، އިދާރީ އިންތިޒާމުތައް ހަމަޖެއްސުމަށް ނިންމި ނިންމުމެކެވެ. އާންމު ހިދުމަތްތަކަށް ބަދަލު އައި ނަމަވެސް، ބަލިމީހުންނަށް ދޭންޖެހޭ ކުއްލި ފަރުވާގެ ކަންކަން ފުރިހަމައަށް ހަމަޖެހިފައިވާނެ ކަމަށް ސިއްހީ ޚިދުމަތްދޭ އިދާރާތަކުން ކަށަވަރުކޮށްދެއެވެ.