habaru page ad two

ސިޔާސީ ޕާޓީތަކަށް ރަޖިސްޓަރީވުމާއި ޕާޓީތަކުން ވަކިވުމުގެ އިޖުރާއަތްތައް ހަރުދަނާކޮށް، ރައްޔިތުންނަށް ލުއިފަސޭހަ ކޮށްދިނުމުގެ ގޮތުން އިލެކްޝަންސް ކޮމިޝަން (އީސީ) އިން މުހިންމު ބަދަލުތަކެއް ގެނެސް، އެ ބަދަލުތަކަށް މިއަދުން ފެށިގެން އަމަލުކުރަން ފަށައިފިއެވެ.

އިލެކްޝަންސް ކޮމިޝަނުން ހާމަކުރި ގޮތުގައި، އަލަށް ގެނައި މި ބަދަލުތަކުގެ މައިގަނޑު މަގުސަދަކީ ޕާޓީތަކުގެ ދަފުތަރު ބެލެހެއްޓުމުގައި ހުރި ދަތިތައް ނައްތާލައި، މެންބަރުން ބޭނުންވާ ހިނދެއްގައި ޕާޓީން ވަކިވުމުގެ ފުރުސަތު އަވަސްކޮށްދިނުމެވެ.

ގެނެވުނު ބަދަލުތަކުގެ ތެރޭގައި އެންމެ ފާހަގަކޮށްލެވެނީ، ސިޔާސީ ޕާޓީއެއްގެ ދަފުތަރުން ވަކިވުމަށް 'މައި ޕޯޓަލް' މެދުވެރިކޮށް ހުށަހެޅުމުން، އެ ހިނދުން ފެށިގެން ޕާޓީން ވަކިވާ ގޮތަށް ހަމަޖެއްސުމެވެ. މީގެ ކުރިން މިކަމަށް ވަކި މުއްދަތެއް ހޭދަވި ނަމަވެސް، މިއަދުން ފެށިގެން އެ ނިޒާމު ވަނީ އޮޓޮމޭޓް ކުރެވިފައެވެ.

މީގެ އިތުރުން، ސިޔާސީ ޕާޓީއަކަށް މެންބަރަކު ރަޖިސްޓަރީވުމަށް 'މައި ޕޯޓަލް' މެދުވެރިކޮށް ހުށަހަޅާ ރިކުއެސްޓްތައް ޕްރޮސެސް ކުރުމަށް ސިޔާސީ ޕާޓީތަކަށް 30 ދުވަހުގެ މުއްދަތެއް ދިނުމަށް ވަނީ ނިންމާފައެވެ. މި މުއްދަތު ހަމަވާއިރު ޕާޓީން އެ ރިކުއެސްޓާ މެދު ގޮތެއް ނިންމާފައި ނުވާނަމަ، އެ ފަރާތެއް އޮޓޮމެޓިކުން އެ ޕާޓީއެއްގެ މެންބަރެއްގެ ގޮތުގައި ރަޖިސްޓަރީ ވާނެއެވެ.

އިލެކްޝަންސް ކޮމިޝަނުން އިތުރަށް ވިދާޅުވީ، ޕާޓީއަކުން އެ ޕާޓީގެ މެންބަރަކު އުނިކުރަން ބޭނުންވާ ހާލަތްތަކުގައި، ޕާޓީތަކަށް ދޫކޮށްފައިވާ 'ސިމެދަ ޕޯޓަލް' މެދުވެރިކޮށް ރިކުއެސްޓް ކުރުމުން އެ މެންބަރަކު ދަފުތަރުން އުނިވާނެ ކަމަށެވެ.

ނަމަވެސް، މި ލުއިތަކާއެކުވެސް ވަކި ހާއްސަ އުސޫލެއް ބައެއް ފަރާތްތަކަށް ވަނީ ކަނޑައަޅާފައެވެ. އެގޮތުން، ކޮމިޝަނުގައި ދަފުތަރުކުރެވިފައިވާ ސިޔާސީ ޕާޓީއެއްގެ އިސް މަގާމެއްގައި ހުރި މެންބަރަކު ޕާޓީން ވަކިވާނަމަ ނުވަތަ އެހެން ޕާޓީއަކަށް ބަދަލުވާނަމަ، އެ ފަރާތެއް ހުރި އިސް މަގާމުން ވަކިވުމަށް ކޮމިޝަނަށް ރަސްމީކޮށް ހުށަހަޅަން ޖެހޭނެ ކަމަށް އީސީން ބުނެފައިވެއެވެ.

މި ބަދަލުތަކަކީ ސިޔާސީ ޕާޓީތަކުގެ ހިންގުން ހަރުދަނާކޮށް، ރައްޔިތުންގެ ސިޔާސީ ހައްގުތައް ކަށަވަރުކުރުމަށް އެޅުނު މުހިންމު ފިޔަވަޅެއް ކަމަށް ސިޔާސީ މުހައްލިލުން ދެކެވަޑައިގަންނަވައެވެ.

މިއަދުން ފެށިގެން ސިޔާސީ ޕާޓީތަކުން ވަގުތުން ވަކިވެވޭ ގޮތް ހަދައިފި

އުމްރާއަށް ގޮސް އުޅުނު ދިވެހި ފިރިހެނަކު ހާޓް އެޓޭކެއް ޖެހިގެން ނިޔާވެއްޖެއެވެ.

ނިޔާވެފައިވަނީ، އަލްމަނާސިކް ޖަމާޢަތުގެ ޙަވާލުގައި ޢުމްރާއަށް ދިޔަ ޢުމުރުން 60 އަހަރުގެ ފިރިހެނެކެވެ.

އަލް މަނާސިކް ގްރޫޕުން ބުނީ، އެހެން ދިވެހީންނާއެކު ސަޢުޔު ކުރުމުގެ ތެރޭގައި އުޅެނިކޮށް އޭނާ ވެއްޓިގެން ހޮސްޕިޓަލަށް ގެންދިޔަ ކަމަށެވެ. ހޮސްޕިޓަލާ ޙަވާލާދީ މަނާސިކް ގްރޫޕުން ބުނީ، އޭނާއަށް ހާޓް އެޓޭކެއް ޖެހިފައިވާ ކަމަށާއި، ހޮސްޕިޓަލަށް ގެންދިޔައިރުވެސް ނިޔާވެފައިވާ ކަމަށެވެ.

އެގްރޫޕުން ބުނީ، ރޭފަތިސް ނަމާދަށްފަހު އޭނާގެ ޖަނާޒާ ބާއްވާފައިވާ ކަމަށެވެ.

ޢުމްރާގެ އަޅުކަން އަދާކުރުމަށް ސްކޫލު ބަންދާއި ދިމާކޮށް ގިނަ ބަޔަކު ޢާއިލާއާއެކު ދަތުރު ކުރަމުންދާއިރު، ޑިސެމްބަރު މަހުގެ ތެރޭގައި ރާއްޖެއިން 7000 އަށްވުރެ ގިނަ ދިވެހީން ވަނީ ޢުމްރާގެ އަޅުކަމަށް ގޮސްފައެވެ.

އުމްރާއަށް ގޮސް އުޅުނު ދިވެއްސަކު ހާޓް އެޓޭކެއް ޖެހިގެން ނިޔާވެއްޖެ

މިދިޔަ 2025 ވަނަ އަހަރު މަސްވެރިންނަށް 927 މިލިޔަނަށްވުރެ ގިނަ ރުފިޔާ ދޫކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ތަފާސްހިސާބުތަކުން ދައްކައިފިއެވެ.

ސަރުކާރުގެ މަސް ކުންފުނި، މިފްކޯއިން އާންމުކޮށްފައިވާ ހިސާބުތަކަށް ބަލާއިރު، މިދިޔަ އަހަރު އެ ކުންފުންޏަށް 58,000 އަށްވުރެ ގިނަ ޓަނުގެ މަސް ވަނީ ކިރުވާފައެވެ. މި މުއްދަތުގެ ތެރޭގައި މަސްވެރިންނަށް މުޅި ޖުމްލަ 927,867,656 (ނުވަސަތޭކަ ހަތާވީސް މިލިޔަން އަށްލައްކަ ފަސްދޮޅަސް ހަތްހާސް ހަސަތޭކަ ފަންސާސް ހަޔެއް) ރުފިޔާ ވަނީ ދޫކޮށްފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، މަސްވެރިން ކިރުވާ މަހަށް 48 ގަޑިއިރުގެ ތެރޭގައި މިހާރު ދަނީ ފައިސާ ދޫކުރަމުންނެވެ. މިފްކޯއިން މަޢުލޫމާތު ދޭ ގޮތުގައި، މި އައު އުސޫލުގެ ސަބަބުން މަސްވެރިކަމަށް ނުކުންނަ ދޯނިތަކުގެ އަދަދު ވަނީ އިތުރުވެފައެވެ.

ތަފާސްހިސާބުތަކުން ދައްކާގޮތުގައި އަހަރުގެ ތެރޭގައި އެންމެ ގިނަ އަދަދަކަށް ފައިސާ ދޫކޮށްފައިވަނީ ފެބުރުވަރީ މަހުއެވެ. އެ މަހު އެކަނިވެސް 138.9 މިލިޔަން ރުފިޔާ މަސްވެރިންނަށް ދޫކުރިއެވެ.

2025 ވަނަ އަހަރު މަސްވެރިންނަށް ފައިސާ ދޫކުރި ތަފްސީލު:

ނިމިދިޔަ 2025 ވަނަ އަހަރަކީ މަސްވެރިކަމުގެ ސިނާޢަތް ކުރިއެރުވުމަށް ސަރުކާރުން ހަރުދަނާ ފިޔަވަޅުތަކެއް އެޅި އަހަރެކެވެ. އެގޮތުން، މިފްކޯއިން މަސް ގަންނަ އަގު 16 ރުފިޔާއަށް ބޮޑުކޮށް، މަސްވެރިންނަށް ވިއްކާ ތެލުގެ އަގު 13 ރުފިޔާއަށް ވަނީ ހެޔޮކޮށްފައެވެ.

މީގެއިތުރުން، ރާއްޖޭގައި މަސް ރައްކާކުރުމުގެ ޤާބިލުކަން ދެގުނަ ކުރުމާއި، މަސް ޕްރޮސެސިންގ ފެސިލިޓީތައް ތަރައްޤީކުރުމުގެ މަސައްކަތް ސަރުކާރުން ދަނީ ބާރުގަދަ ދުވެއްޔެއްގައި ކުރަމުންނެވެ. ސަރުކާރުގެ މައިގަނޑު އަމާޒަކީ މަސްވެރިކަމުގެ ސިނާޢަތް ސިންދަފާތުކޮށް، މިއީ ރާއްޖެއަށް އެންމެ ބޮޑު އާމްދަނީއެއް ލިބޭ ސިނާޢަތަށް ހެދުމެވެ.

ނިމުނު އަހަރު މަސްވެރިންނަށް 927 މިލިޔަން ރުފިޔާ

ދިވެހިރާއްޖޭގައި ފިކުރީ މުދާ ހިމާޔަތްކޮށް ކުރިއެރުވުމަށްޓަކައި ހަރުދަނާ ނިޒާމެއް ގާއިމުކުރުމުގެ މަގުސަދުގައި، "މޯލްޑިވްސް އިންޓެލެކްޗުއަލް ޕްރޮޕަރޓީ އޮފީސް" ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އުފައްދަވައިފިއެވެ.

މި އިދާރާއަކީ މޯލްޑިވްސް އިންޓެލެކްޗުއަލް ޕްރޮޕަރޓީގެ ގާނޫނުގެ ދަށުން އުފެއްދެވި ތަނެކެވެ. ރައީސުލްޖުމްހޫރިއްޔާ ވަނީ މި އޮފީހަކީ މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް (އިޤްތިޞާދީ ތަރައްޤީއާ ވިޔަފާރިއާބެހޭ ވުޒާރާ) ގެ ދަށުން ހިނގަމުންދާ ތަނެއްގެ ގޮތުގައި ހަމަޖައްސަވާފައެވެ.

މޯލްޑިވްސް އިންޓެލެކްޗުއަލް ޕްރޮޕަރޓީ ބިލު ރައީސުލްޖުމްހޫރިއްޔާ ތަސްދީޤުކުރެއްވީ 25 އޮގަސްޓް 2025 ގައެވެ. އަދި މިއަދުން ފެށިގެން މި ގާނޫނަށް ވަނީ އަމަލުކުރަން ފަށާފައެވެ. މި ގާނޫނުގެ މައިގަނޑު ބޭނުމަކީ ރާއްޖޭގައި ފިކުރީ މުދާ ހިމާޔަތްކުރެވޭނެ ނިޒާމެއް ގާއިމުކޮށް، ވިޔަފާރީގެ ދާއިރާގައި ފަންނުވެރިކަމާއި އައު އީޖާދުތަކަށް ހިތްވަރުދީ، ގައުމުގެ އިގްތިސާދީ ތަރައްގީއަށް މަގުފަހިކުރުމެވެ.

ގާނޫނުގައި ބަޔާންކޮށްފައިވާ ގޮތުން، މި އޮފީހުގެ ކަންކަން ބަލަހައްޓާނީ އިގްތިސާދީ ސިޔާސަތުތައް ތަންފީޒުކުރުމުގެ މަސްއޫލިއްޔަތު ހަވާލުކޮށްފައިވާ ވުޒާރާއަކުންނެވެ. އަދި އޮފީސް ހިންގުމުގެ އެންމެ އިސް ފަރާތަކީ "ރަޖިސްޓްރާރ އޮފް އިންޓެލެކްޗުއަލް ޕްރޮޕަރޓީ" އެވެ.

މި ގާނޫނުގައި ރަޖިސްޓްރާރ އައްޔަނުކުރުމާއި ވަކިކުރުމުގެ އުސޫލުތަކާއި، އެ ފަރާތުގެ ޝަރުތުތަކާއި މަސްއޫލިއްޔަތުތަކުގެ އިތުރުން، އޮފީހުގެ އިދާރީ މުވައްޒަފުންނާ ގުޅޭ ތަފްސީލުތައް ބަޔާންކޮށްފައިވެއެވެ. މީގެ އިތުރުން، ފިކުރީ މުދަލުގެ ރަޖިސްޓްރީ ބެލެހެއްޓުމާއި، އެއާ ގުޅޭ އެންމެހައި ގަވާއިދުތައް ތަންފީޒުކުރުމުގެ ބާރުވެސް މި އޮފީހަށް ވަނީ ލިބިދީފައެވެ.

މޯލްޑިވްސް އިންޓެލެކްޗުއަލް ޕްރޮޕަރޓީ އޮފީސް އުފައްދަވައިފި

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ދަށުން ހިންގަމުންދާ ހުރިހާ އެއާޕޯޓްތަކެއްގެ ހިދުމަތުގެ ފެންވަރު މަތިކުރުމަށްޓަކައި ގިނަގުނަ މަސައްކަތްތަކެއް ކުރަމުންދާ ކަމަށް އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވެއްޖެއެވެ.

އާ އަހަރުގެ މުނާސަބަތުގައި ފޮނުއްވި ތަހުނިޔާގެ މެސެޖުގައި ޝަރީފް ވިދާޅުވީ، ނިމިދިޔަ އަހަރަކީ އެމްއޭސީއެލްއަށް ވަރަށް ކާމިޔާބު އަހަރެއް ކަމަށެވެ. އަދި ޒަމާނީ ވަސީލަތްތަކާއެކު ދިވެހި ރައްޔިތުންނަށާއި ފަސިންޖަރުންނަށް ދެމުންދާ ހިދުމަތްތައް އަވަސްކޮށް، ހަރުދަނާ ކުރުމަށްޓަކައި ގިނަ މަސައްކަތްތަކެއް މިދިޔަ އަހަރު ކުރެވިފައިވާކަން އޭނާ ފާހަގަކުރެއްވިއެވެ.

މިގޮތުން އެއާޕޯޓްތަކުގެ ތަރައްގީއަށް ކުރެވޭ މަސައްކަތްތަކަށް އަލިއަޅުއްވާލައްވަމުން ޝަރީފް ވިދާޅުވީ، "2025 ވަނަ އަަހަރަށް އަލްވަދާއު ކިޔަނީ ވެލާނާ އިންޓަނޭޝަނަލް އެއާޕޯޓްގެ އާ ޓާމިނަލް ހުޅުވި ހުރިހާ އެއާލައިންތަކެއް އެތަނަށް ބަދަލުވެ ހިދުމަތް ދޭން ފެށުމާއި އެކު، އަދި ހަނިމާދޫ އިންޓަނޭޝަނަލް އެއަޕޯޓް ހުޅުވި ގިނަ ވަސީލަތްތަކާއެކު ހިދުމަތް ދޭން ފެށިފައިވުމާއެކު،" ކަމަށެވެ.

ޝަރީފް އިތުރަށް ވިދާޅުވީ، އެމްއޭސީއެލްގެ ދަށުން ހިންގާ ހުރިހާ އެއާޕޯޓްތަކެއްގެ ހިދުމަތުގެ ފެންވަރު ރަނގަޅު ކުރުމަކީ ކުންފުނީގެ މުހިންމު އަމާޒެއް ކަމަށެވެ. އަދި ފެށުނު 2026 ވަނަ އަހަރަކީ މިއަށްވުރެ ކާމިޔާބު އަހަރަކަށް ހެދުމަށްޓަކައި ކުންފުނީގެ ހުރިހާ މުވައްޒަފުންގެ އެއްބަރުލުމާއި އެހީތެރިކަން ލިބޭނެ ކަމާމެދު ޝައްކެއް ނުކުރައްވާ ކަމަށްވެސް އޭނާ ވިދާޅުވިއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ރާއްޖޭގެ ވައިގެ ބަނދަރުތައް ތަރައްގީކޮށް، ހިދުމަތުގެ ފެންވަރު މަތިކުރުމަށް ދެއްވާ އަހަންމިއްޔަތުކަމުގެ ދަށުން، އެމްއޭސީއެލްއިން އަންނަނީ އެއާޕޯޓްތަކުގެ އޮޕަރޭޝަންތައް އިތުރަށް ފުޅާކޮށް ހަރުދަނާކުރަމުންނެވެ.

އެމްއޭސީއެލްގެ އެއާޕޯޓްތަކުގެ ހިދުމަތުގެ ފެންވަރު ރަނގަޅު ކުރަން ގިނަ މަސައްކަތްތަަކެއް އެބަ ކުރަން: ޝަރީފް

ސަރުކާރުގެ އޮފީސްތަކުގައި މަސައްކަތްކުރާ ސިވިލް ސަރވިސް މުވައްޒަފުން ހެދުން އެޅުމާ ގުޅޭ ގަވާއިދު އިސްލާހުކުރުމުން އެމްޑީޕީގެ ޗެއާޕާސަން ފައްޔާޒް އިސްމާޢީލް އެކަމާ ނުރުހުން ފާޅުކުރައްވައިފިއެވެ.

ސިވިލް ސަރވިސް ކޮމިޝަނުން މިއަދު ނެރުނު އިސްލާހުގައި ވަނީ މުވައްޒަފުން ހެދުން އެޅުމާ ގުޅޭ މާއްދާއަށް ބަދަލު ގެނެސްފައެވެ. އޭގައި ބުނެފައި ވަނީ، އަންހެން މުވައްޒަފުންގެ ހެދުމުގެ ގޮތުގައި ދިގު ހެދުން ނުވަތަ ދިވެހި ލިބާސް ނުވަތަ އޮފީސް ހެދުން ބޭނުންކުރެވިދާނެ ކަމަށެވެ. އެފަދަ ހެދުންތައް ހުންނަންވާނީ ފައިގެ ތަނބިކަށްޓަށްވުރެ ކުރުނުވާ ގޮތަށް ކަމަށާއި އޮފީހުގެ މާހައުލާ ގުޅޭ ފޮއްޗަކުން ތައްޔާރުކޮށްފައިވާ ހެދުމަކަށް ވެސް ވާންޖެހޭނެކަމަށް ބުނެފައިވެއެވެ.

ހެދުމުގެ މަތީބައި، ގަމީސް އަދި ސޫޓު ޖެކެޓުގެ މަތީބައިގެ އަރިމަތިން، ކުރިމަތިން، ފުރަގަހުން އަދި ތިރިން ފަޅާފައި ހުންނަ ނަމަ، ފަޅާފައި ހުންނަ ބައި ހުންނަންވާނީ މައްޗަށް އަތް ދަމާލީމާ އުނަގަނޑުން ތިރީބަޔާއި އުނަގަނޑުން މަތީބަޔާ ދެމެދުން ހަށިގަނޑުގެ އެއްވެސް ތަނެއް ނުފެންނަ ވަރަށް ކަމަށް ވެސް އޭގައި ބުނެފައިވެއެވެ.

މީގެއިތުރުން، މިފަދަ ހެދުންތަކުގެ ދިގުމިން ހުންނަންވާނީ ބުޑުގެތިރީ ކައިރިން ފެށިގެން މައްޗަށް ދެ އިންޗިއަށްވުރެ ކުރު ނުވާ ވަރަށް ކަމަށް ވެސް ގަވައިދުގައި ބުނެފައިވެއެވެ.

ސިވިލް ސަރވިސްގައި މަސައްކަތް ކުރާ ފިރިހެން މުވައްޒަފުން ރަސްމީ މަސައްކަތުގައި ތިބެންވާނީ ގަމީހާއި ފަޓުލޫނު، ޓައި އަދި އޮފީސް ބޫޓުގައި ކަމަށް ވަނީ ބަޔާންކޮށްފައެވެ. ގަމީހުގެ ގޮތުގައި އަތްދިގު ނުވަތަ އަތްކުރު ގަމީހާއި ބުސް ގަމީސް ބޭނުންކުރެވިދާނެ ކަމަށާއި ބެގީ ބަހައްޓަން ވީގޮތާއި ގަހަނާގެ ގޮތުގައި އަނގޮޓިއެއް ފިޔަވައި އިތުރު އެއްޗެއް ނޭޅޭނެކަންވެސް އިސްލާހުގައި ވަނީ ބަޔާންކޮށްފައެވެ.

މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، ސިވިލް ސާވިސް ގަވާއިދު ބަދަލުކޮށް މުވައްޒަފުން ހެދުން އަޅާ ގޮތް ބަދަލުކުރުވަނީ ރައްޔިތުން ކޮންޓްރޯލް ކުރުމުގެ އެޖެންޑާއެއްގެ ގޮތުން ކަމަށެވެ.

"ވެރިކަމާ ހަވާލުވެ ހުރިހާ ކަމެއް ކުރަމުން ދަނީ ހުދުމުހުތާރުކަން ދައްކައި ރައްޔިތުންގެ މައްޗަށް ވެރިވެގަތުމަށް. ސިވިލް ސާވިސް ގަވާއިދު ބަދަލުކޮށް މުވައްޒަފުން ހެދުން  ބަދަލުކުރުވަނީ ރައްޔިތުން ކޮންޓްރޯލް ކުރުމުގެ އެޖެންޑާއެއްގެ ދަށުން. ސިވިލް ސާވިސްގެ ހެދުން އެޅުމުގައި މައްސަލައެއް އޮވެގެނެއް ނޫން. ބޭނުމަކީ ރައްޔިތުންގެ ޒާތީ ދިރިއުޅުމުގެ ހުރިހާ ކަމެއް މުއިއްޒުގެ ބާރުގެ ދަށަށް ގެނެސް ގާނޫނުއަސާސީން ކޮންމެ ދިވެހި ރައްޔިތަކަށްމެ ލިބިދޭ ޒާތީ މިނިވަންކަން ފޭރިގަތުން. ރައްޔިތުންނަކީ ތަންދޮރުނުދަންނަ ގަމާރު ބައެއް ކަމަށް ދެކިގެން އެ މީހުންގެ ޒާތީ ކަންކަމާ ބެހި އޮބިހެއްޓޭނެ ކަމަށް ދެކިގެން ނުވާނެ. ގާނޫނުއަސާސީއިން ކަށަވަރުކޮށްދޭ ހިޔާލާއި ފިކުރާއި ޒާތީ ދިރިއުޅުމުގެ މިނިވަންކަން ދިވެހިންނަށް މާ މުހިންމު." ފައްޔާޒް ވިދާޅުވިއެވެ.

ފައްޔާޒް މިހެން ވިދާޅުވި ނަމަވެސް، ސިވިލް ސަރވިސް މުވައްޒަފުން ހެދުން އެޅުމުގެ މިންގަނޑުތައް ފަހަކަށް އައިސް އިޖުތިމާޢީ މިންގަނޑަށްވުރެ ދަށްވެފައިވާ ކަމުގެ ޝަކުވާތައް ގިނަ ބަޔަކު ވަނީ ސަރުކާރާ ހިއްސާކޮށްފައެވެ. މި ޝަކުވާތަކާ ގުޅިގެން އެ މުވައްޒަފުން ހެދުން އެޅުމުގެ ގަވާއިދު އިސްލާހު ކުރުމަށް ސިވިލް ސަރވިސް ކޮމިޝަނަށް ދަންނަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރެއްވީ ހ ހުޅުމާލެ ފުރަތަމަ ފިޔަވަހީގެ ރައްޔިތުންނާ ބައްދަލުކުރެއްވި ރަސްމިއްޔާތެއްގައެވެ.

ސިވިލް ސަރވިސް ކޮމިޝަނުން މިކަމާ ގުޅޭގޮތުން ވަކި ބަޔާނެއް ނެރެފައި ނުވިނަމަވެސް، ސަރުކާރުގެ ފަރާތުން ބުނެފައިވަނީ މި އިސްލާހަކީ ސަރުކާރުގެ އޮފީސްތަކުގައި ރަސްމީ މާހައުލާ އެކަށީގެންވާ ހެދުން އެޅުމުގެ ސަޤާފަތް އަލުން ދިރުވުމަށް ގެނެވޭ ބަދަލެއް ކަމަށެވެ.

ސިވިލް ސަރވިސްގެ މުވައްޒަފުންގެ ހެދުން އެޅުމުގެ ގަވާއިދަށް މިފަދަ ބަދަލެއް ގެނައުމަކީ ރައްޔިތުންގެ ޒާތީ މިނިވަންކަމަށް އަރައިގަތުމެއް ކަމަށް ފައްޔާޒް ވިދާޅުވި ނަމަވެސް، ސަރުކާރުގެ ފަރާތުން ބުނަނީ މިއީ ދައުލަތުގެ މުއައްސަސާތަކުގެ ރަސްމީކަން ދެމެހެއްޓުމަށާއި އިސްލާމީ އަދި ދިވެހި އާދަކާދައާ އެއްގޮތަށް ހެދުން އެޅުމުގެ ސަޤާފަތް ކުރިއެރުވުމަށް އެޅޭ ފިޔަވަޅެއް ކަމަށެވެ.

ހެދުން އަޅާ ގޮތް ބަދަލުކުރުވަނީ ރައްޔިތުން ކޮންޓްރޯލް ކުރުމުގެ އެޖެންޑާއެއްގެއްގެ ދަށުން - ފައްޔާޒް

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، "އާއިލީ ބޯހިޔާވަހިކަން" ޕްރޮގްރާމްގެ ތެރެއިން ދިވެހި ފުލުހުންގެ ހިދުމަތުގެ މުވައްޒަފުންނާއި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ މުވައްޒަފުންނާއި މޯލްޑިވްސް ކަރެކްޝަނަލް ސަރވިސްގެ މުވައްޒަފުންނަށް ޚާއްސަކޮށް 300 ފްލެޓް ދޫކުރަން ނިންމައިފި އެވެ. ސަރުކާރުން މިރޭ ވަނީ މި ޕްރޮގްރާމްގެ އުސޫލުތައް ގެޒެޓްކޮށް ގޯއްޗާއި ފްލެޓަށް ހުށައެޅުމުގެ ފުރުސަތު ހުޅުވާލަން ނިންމާފަ އެވެ.

މި ޕްރޮގްރާމްގެ ދަށުން ޖުމްލަ 7900 ފްލެޓް ދޫކުރާނެ ގޮތް ތަފްސީލްކޮށް ގެޒެޓްގައި ހިމަނާފައިވެ އެވެ. އެގޮތުން ދިވެހި ފުލުހުންގެ ހިދުމަތުގެ މުވައްޒަފުންނާއި އެމްއެންޑީއެފްގެ މުވައްޒަފުންނާއި މޯލްޑިވްސް ކަރެކްޝަނަލް ސަރވިސްގެ މުވައްޒަފުންނަށް 300 ފްލެޓް ހާއްސަކުރުމަކީ މި ސިނާއަތްތަކުގައި ހަރަކާތްތެރިވާ ފަރާތްތަކަށް ސަރުކާރުން ދޭ ސަމާލުކަމުގެ ހެއްކެކެވެ.

މީގެ އިތުރުން މާލޭގެ ރަށްވެހިންނަށް 4,000 ފްލެޓް ކަނޑައަޅާފައިވާއިރު، 18 އަހަރުން ދަށުގެ ކުދިން ބަލާ އެކަނިވެރި މައިންނާއި އެކަނިވެރި ބަފައިންނަށް 100 ފްލެޓް އަދި ނުކުޅެދުންތެރިކަން ހުންނަ ފަރާތްތަކަށް ވެސް 100 ފްލެޓް ޚާއްސަކުރެވިފައިވެ އެވެ.

ޒުވާނުންނަށް 250 ފްލެޓް ކަނޑައަޅާފައިވާއިރު، މާލޭގައި އާއިލާ ބިނާކޮށްފައިވާ ޓެކްސީ ޑްރައިވަރުންގެ ދަފުތަރުގައި ރަޖިސްޓަރީވެފައިވާ ފަރާތްތަކަށް 50 ފްލެޓް ލިބޭނެ އެވެ. އަދި މާލޭގައި އާއިލާ ބިނާކޮށްފައިވާ ފަތުރުވެރިކަމުގެ ސިނާއަތުގައި ވަޒީފާއަދާކުރާ މުވައްޒަފުންނަށް 200 ފްލެޓް ވަނީ ހާއްސަކޮށްފަ އެވެ.

ޖުޑީޝިއަރީގެ މުވައްޒަފުންނަށް، މާލޭގައި އާއިލާ ބިނާކޮށްފައިވާނަމަ 100 ފްލެޓް ކަނޑައަޅާފައިވެ އެވެ. މާލޭގައި އާއިލާ ބިނާކޮށްފައިވާ މަސްވެރިންގެ ދަފުތަރުގައި ހިމެނޭ ފަރާތްތަކަށް 100 ފްލެޓާއި، ދިވެހި ސިވިލް ސާރވިސްގެ މުވައްޒަފުންނަށް 200 ފްލެޓް އަދި އެކި އޮފީސްތަކަށް 400 ފްލެޓް ވެސް މި ޕްރޮގްރާމްގެ ދަށުން ހާއްސަކޮށްފައިވެ އެވެ.

މި ފުރުސަތު ހުޅުވާލުމާއެކު، ދިވެހިރާއްޖޭގެ ރައްޔިތުންނަށް ދިރިއުޅުމަށް ބޭނުންވާ ބޯހިޔާވަހިކަން ފޯރުކޮށްދިނުމަށް ސަރުކާރުން ދޭ އަހަންމިއްޔަތުކަން ފާޅުވެގެންދެ އެވެ.

ސިފައިންނާއި ފުލުހުންނާއި ކަރެކްޝަނަށް 300 ފްލެޓް ހާއްސަކޮށް، 7900 ފްލެޓް ދޫކުރުމުގެ އުސޫލުތައް ގެޒެޓްކޮށްފި

ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އާ ގުޅިގެން، ރައްޔިތުންގެ ހޭލުންތެރިކަން އިތުރުކުރުމާއި، އިންތިޚާބުގެ އެކިއެކި މަރުހަލާތަކުގައި ރައްޔިތުންގެ ބައިވެރިވުން ފުޅާކުރުމުގެ މަޤްސަދުގައި އިލެކްޝަންސް ކޮމިޝަނުން ޓިކްޓޮކް މުބާރާތެއް އިޢުލާނުކޮށްފިއެވެ. މި މުބާރާތުގައި 18 އަހަރުން މަތީގެ ކޮންމެ ދިވެހި ރައްޔިތަކަށް ބައިވެރިވެވޭނެއެވެ.

އިލެކްޝަންސް ކޮމިޝަނުން ބުނެފައިވާ ގޮތުގައި، މި މުބާރާތަކީ އާންމުކޮށް ހުޅުވާލެވިފައިވާ މުބާރާތެކެވެ. މުބާރާތުގެ މައިގަނޑު އެއް މަޤްސަދަކީ، އިންތިޚާބާ ގުޅިގެން މުޖުތަމައުގައި ހިނގާ ނޭދެވޭ އަމަލުތައް މަދުކުރުމަށް ފަރުދީގޮތުން ބައިވެރިވުމަށް ހިތްވަރު ދިނުމެވެ.

މުބާރާތުގައި ބައިވެރިވުމަށް ޝައުޤުވެރިވާ ފަރާތްތަކުން 2025 ޑިސެންބަރު 31 ވާ ބުދަ ދުވަހުގެ 15:00 ގެ ކުރިން، އޮންލައިން ފޯމެއް މެދުވެރިކޮށް ރަޖިސްޓަރކުރަން ޖެހެއެވެ. ރަޖިސްޓްރޭޝަން ފޯމު ލިބެން ހުންނާނީ 

https://tinyurl.com/TikTokmubaaraaiyRegistration

މުބާރާތުގައި އަމިއްލަ ފަރުދަކަށް ވެސް އަދި ޓީމެއްގެ ގޮތުގައި ވެސް ބައިވެރިވެވޭނެކަމަށް އިލެކްޝަންސް ކޮމިޝަނުން ވަނީ ބުނެފައެވެ. ރަޖިސްޓަރކުރާ ފަރާތްތަކަށް ޓިކްޓޮކް ޕްލެޓްފޯމަށް އެންމެ އެކަށޭނަ ގޮތަށް، މަދުވެގެން 30 ސިކުންތާއި ގިނަވެގެން 90 ސިކުންތުގެ ދިގުމިނަށް ވީޑިއޯ ތައްޔާރުކުރުމަށް ހަތަރު މަޢުޟޫއެއް ދެވޭނެއެވެ.

މަޢުޟޫޢުތައް ތިރީގައި މިވަނީއެވެ:

މުބާރާތުގައި ވާދަކޮށް ހުށަހަޅާ ވީޑިއޯތަކުގެ ތެރެއިން އެންމެ ގިނަ މާރކްސް ލިބޭ ވީޑިއޯތަކަށް ބަލައި، އެއްވަނަ، ދެވަނަ އަދި ތިންވަނަ ހޮވޭނެއެވެ. މި ގޮތުން، އެއްވަނައަށް 5000 ރުފިޔާ، ދެވަނައަށް 3000 ރުފިޔާ އަދި ތިންވަނައަށް 2000 ރުފިޔާގެ ފައިސާގެ އިނާމު ލިބޭނެއެވެ.

މުބާރާތުގައި ބައިވެރިވުމަށް ރަޖިސްޓަރކުރާ ފަރާތްތަކުން ތައްޔާރުކުރާ ވީޑިއޯތައް، 2026 ޖަނަވަރީ 10 ވާ ހޮނިހިރު ދުވަހުގެ 14:00 ގެ ކުރިން ހުށަހަޅަންޖެހެއެވެ.

މުބާރާތާބެހޭ އިތުރު މަޢުލޫމާތު 

https://tinyurl.com/TiktokmubaaraaiyGavaaidhu

 މި ލިންކުން ލިބިވަޑައިގަންނަވާނެއެވެ.

އިލެކްޝަންސް ކޮމިޝަނުން ޓިކްޓޮކް މުބާރާތެއް އިޢުލާނުކޮށްފި: އިންތިޚާބުތަކަށް ހޭލުންތެރިކަން އިތުރުކުރުމަށް މަސައްކަތް

ސައުދީގެ މަޝްހޫރު ކްލަބް އަލް ނަސްރަށް ކުޅެމުން އަންނަ ޕޯޗްގަލްގެ ފުޓްބޯޅަ ލެޖެންޑް ކްރިސްޓިއާނޯ ރޮނާލްޑޯ، އޭނާގެ ކެރިއަރު ނިންމާލާނީ ޖުމްލަ 1،000 ލަނޑު ހަމަކުރެވުމުންކަމަށް ބުނެފިއެވެ. މިހާރު އޭނާގެ ކެރިއަރުގައި 956 ލަނޑު ހަމަވެފައިވާއިރު، މި ނިންމުން ވަނީ ގިނަ ބައެއްގެ ސަމާލުކަން ހޯދާފައެވެ.

ރޮނާލްޑޯ މިހެން ބުނީ، މެދުއިރުމަތީގެ އެންމެ މޮޅު ކުޅުންތެރިޔާގެ މަޤާމް ހޯދުމަށްފަހު މީޑިއާތަކާ ވާހަކަދައްކަމުންނެވެ. އޭނާ ފާހަގަކުރި ގޮތުގައި، 1،000 ލަނޑު ޖެހުމަކީ އުނދަގޫ ކަމެއްކަން އެނގޭނެއެވެ. ނަމަވެސް، މިހާރު އޭނާ ހުރީ އެ އަޒުމުގައި ބޮޑު ހިތްވަރަކާއެކު ކަމަށާއި، މި ލަނޑުހާސިލްކުރެވޭނެކަމުގެ އުންމީދު ބޮޑު ކަމަށެވެ.

އުމުރުން 40 އަހަރުގެ މި ކުޅުންތެރިޔާ ވަނީ އެންމެފަހުން އަލް ނަސްރަށް ކުޅެދިން މެޗްގައިވެސް ދެ ލަނޑު ކާމިޔާބުކޮށްފައެވެ. އެއާއެކު އޭނާގެ ކެރިއަރުގައި ޖެހި ލަނޑުގެ ޖުމްލަ އަދަދު ވަނީ 956 އަށް އަރާފައެވެ. ރޮނާލްޑޯ ބުނީ، ކޮންމެ ތަނެއްގައި ކުޅެންޖެހުނު ނަމަވެސް އެއީ އޭނާއަށް މައްސަލައެއް ނޫން ކަމަށާއި، މިގޮތުގައި ކުރިއަށް ދިއުމަށް ބޭނުންވާ ކަމަށެވެ.

ފުޓްބޯޅަ ކެރިއަރުގައި އަދިވެސް އިތުރު ކާމިޔާބީތައް ހާސިލްކުރަން ބޭނުންވާކަން ފާހަގަކުރަމުން ރޮނާލްޑޯ ބުނީ، އަނިޔާ ނުވެ މިގޮތުގައި ކުރިއަށް ހިނގައްޖެނަމަ، 1،000 ލަނޑު ޖެހުމަކީ ކުރެވިދާނެ ކަމެއްކަމަށެވެ. އޭނާގެ ސިއްހަތު ރަނގަޅުކޮށް ބެހެއްޓުމަށް އަބަދުވެސް މަސައްކަތްކުރާ ކަމަށްވެސް ރޮނާލްޑޯ ފާހަގަކުރިއެވެ.

މި ސީޒަނުގައި ރޮނާލްޑޯ ވަނީ އަލް ނަސްރަށް ކުޅެދިން 14 މެޗްގައި 13 ގޯލް ކާމިޔާބުކޮށްފައެވެ. ރޮނާލްޑޯ އަކީ މިހާރުވެސް ޕޯޗްގަލްގެ ޤައުމީ ޓީމަށް އެންމެ ގިނަ ލަނޑު ޖަހާފައިވާ ކުޅުންތެރިޔާއެވެ. އޭނާ ވަނީ ޤައުމީ ޓީމަށް 143 ލަނޑު ކާމިޔާބުކޮށްދީފައެވެ.

ކުޅުން ހުއްޓާލާނީ 1،000 ލަނޑު ހަމަކުރެވުމުން: ރޮނާލްޑޯ

ބަންގްލަދޭޝްގެ ފުރަތަމަ އަންހެން ބޮޑުވަޒީރު، ހާލިދާ ޒިއާ އަވަހާރަވުމާއި ގުޅިގެން ރައީސް ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ. އެކަމަނާ އަވަހާރަވެފައިވަނީ ވަރަށްގިނަ ދުވަސްތަކެއް ވަންދެން ބަލިވެ އުޅުއްވުމަށްފަހު މިއަދު ބަންގްލަދޭޝްގެ ވެރިރަށް ޑާކާގެ ހޮސްޕިޓަލެއްގައެވެ.

ހާލިދާ ޒިއާ އަވަހާރަވެއްޖެކަން ބަންގްލަދޭޝްގެ ޤައުމީ މީޑިއާއިން ވަނީ ކަށަވަރުކޮށްދީފައެވެ. މީގެ އިތުރުން، އެކަމަނާ ނިސްބަތްވެ ވަޑައިގަންނަވާ ބަންގްލަދޭޝްގެ ނެޝަނަލިސްޓް ޕާޓީ (ބީ.އެން.ޕީ) އިން މީގެ އިރުކޮޅެއްކުރިން ނެރުނު ބަޔާނުގައިވެސް ވަނީ އެކަމަނާ އަވަހާރަވެއްޖެކަމަށެވެ.

މި ހިތާމަވެރި ޚަބަރާއި ގުޅިގެން ރައީސް މުޢިއްޒު ވަނީ އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި ބަންގްލަދޭޝްގެ ސަރުކާރަށާއި ރައްޔިތުންނަށް ފުން ތައުޒިޔާ ވިދާޅުވެފައެވެ. އަދި މަރުޙޫމާގެ ޢާއިލާއަށް ކެތްތެރިކަން ދެއްވުން އެދި ދުޢާ ކުރައްވާފައިވެއެވެ.

ހާލިދާ ޒިއާ އަވަހާރަވީއިރު އުމުރުފުޅަކީ 80 އަހަރެވެ. އެކަމަނާ އަވަހާރަވީއިރު، ގެންދެވީ ފުރަމޭގެ މައްސަލަތަކާއި، އާތްރައިޓްސް އަދި ހަކުރުބަލި ފަދަ ގިނަ ބަލިތަކަކަށް ފަރުވާ ކުރައްވަމުންނެވެ. އެގޮތުން، ހާލިދާ ޒިއާގެ ފުއްޕާމޭގައި އިންފެކްޝަން ހެދިގެން ބަންގްލަދޭޝްގެ އެވަރކިއާ ހޮސްޕިޓަލްގައި މިދިޔަ ނޮވެމްބަރުމަހުގެ 23 ވަނަ ދުވަހު ވަނީ އެޑްމިޓްކޮށްފައެވެ.

ހާލިދާ ޒިއާއަކީ ބަންގްލަދޭޝްގެ ތާރީޚުގައި އެންމެ ފުރަތަމަ އަންހެން ބޮޑުވަޒީރެވެ. އެކަމަނާ އެންމެ ފުރަތަމަ އެޤައުމުގެ ބޮޑުވަޒީރުކަމުގެ މަގާމު ފުރުއްވެވީ 1991 ފެށިގެން 1996 އަށެވެ. އަދި ދެވަނަ ފަހަރަށް 2001 ކުން ފެށިގެން 2006 ވަނަ އަހަރާ ހަމަޔަށެވެ. މީގެ އިތުރުން ހާލިދާ ޒިއާއަކީ ބަންގްލަދޭޝްގެ ކުރީގެ ރައީސް ޒިއާއުރް ރަހްމާންގެ އަނބިކަނބަލުންނެވެ.

ބަންގްލަދޭޝްގެ ފުރަތަމަ އަންހެން ބޮޑުވަޒީރު ހާލިދާ ޒިއާ އަވަހާރަވުމާއި ގުޅިގެން ރައީސް މުޢިއްޒު ތަޢުޒިޔާ ވިދާޅުވެއްޖެ

ކުޑަކުދިން ރޭގަނޑު ގިނަ ވަގުތު ހޭދަކުރަނީ ކޮންބަޔަކާ އެކީތޯ ބެލެނިވެރިން ގާތުން ބަލަން ޖެހޭ ކަމަށް ބުނެ، ދިވެހި ފުލުހުންގެ ޚިދުމަތުން ބެލެނިވެރިންނަށް ބޮޑު އިލްތިމާސެއް ކޮށްފިއެވެ. ކުށްކުރާ ފަރާތްތަކާ އެކީ ކުޑަކުދިން ގިނައިން ފެންނަމުންދާތީ، މިކަމުގެ ނުރައްކަލާ މެދު ބެލެނިވެރިން ހޭލުންތެރިވުމަށް ފުލުހުން ވަނީ އިލްތިމާސް ކޮށްފައެވެ.

މި އިލްތިމާސް ކޮށްފައިވަނީ، ސެންޓްރަލް އިންވެސްޓިގޭޝަން ކޮމާންޑުގެ މަސައްކަތްތަކާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި ވާހަކަ ދައްކަވަމުން، ގޭންގް ކްރައިމް އެންފޯސްމެންޓް ޑިޕާޓްމެންޓުގެ އިސްވެރިޔާ، ސުޕްރިޑެންޓެންޓް އޮފް ޕޮލިސް، އިސްހާގް އާދަމް ވަނީ، ކުށްތައް ކުރާ މީހުންނާއި އެކީ ކުޑަކުދިން ފެންނަ މަންޒަރު ގިނަކަން ފާހަގަ ކުރައްވާފައެވެ.

އިސްހާގު ވިދާޅުވީ، އެފަދަ މަންޒަރު ގިނައިން ފެނުމަކީ ނުރައްކަލެއް ކަމަށާއި، ބެލެނިވެރިން، ދަރިން ވަގުތު ހޭދަކުރަނީ ކޮންބަޔަކާ އެކީތޯ ބަލަން ޖެހޭ ކަމަށެވެ. އެކަން އެގޮތަށް ނުބެލޭނަމަ، ހިތާމަވެރި ހާދިސ

ބެލެނިވެރިންނަށް ފުލުހުންގެ އިލްތިމާސް: ދަރިން ރޭގަނޑު ގިނަ ވަގުތު ހޭދަކުރަނީ ކޮންބަޔަކާ އެކީތޯ ބަލާށޭ!

ޒުވާނުން ބާރުވެރިކުރުވުމާއި، މައުލޫމާތާއި ފަންނާ ބެހޭ ވަޒީރު، އިބްރާހިމް ވަހީދު މިއަދު ވިދާޅުވެފައިވަނީ، އެންމެ މަދުވެގެން ވެސް ރާއްޖޭގެ ހަ ސަރަހައްދެއްގައި ޔޫތް ހަބް ނުވަތަ ޒުވާނުންގެ ވެހި ގާއިމު ކުރުމުގެ މަސައްކަތް ސަރުކާރުން ކުރަމުންދާ ކަމަށެވެ. މިއީ ޒުވާނުންނަށް އިތުރު ތަންތަނުގައި ހަރަކާތްތެރިވެ، މަސައްކަތް ކޮށްލުމުގެ ޖާގަ ތަނަވަސްކޮށްދިނުމުގެ ގޮތުން ސަރުކާރުން ފެށި މަސައްކަތެކެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ވަޒީރު އިބްރާހިމް ވަހީދު ވިދާޅުވީ، މި މަސައްކަތުގެ ތެރެއިން ފުރަތަމަ ޔޫތް ހަބް ހުޅުވާފައިވަނީ މާލޭގައި ކަމަށެވެ. މާލޭގައި ހުންނަ ޔޫތް ހަބްގައި ކޮންމެ ހަފްތާއަކު ކަހަލަ ގޮތަކަށް ޒުވާނުންނަށް ގިނަ ހަރަކާތްތައް ކުރިއަށް ގެންގޮސްފައިވާކަން ފާހަގަކުރައްވައި ވަޒީރު ވަނީ މާލޭގެ އިތުރުން ރާއްޖޭގެ އެހެން ސަރަހައްދުތަކުގައި ވެސް އެފަދަ ތަންތަން އެޅުމުގެ މަސައްކަތް ކުރިއަށްދާ ކަމަށް ވިދާޅުވެފައެވެ.

ޔޫތް ހަބްތައް ރާއްޖޭގައި ފުޅާ ކުރުމުގެ ގޮތުން ހުރިހާ ސިޓީއެއްގައި ޔޫތް ހަބް ގާއިމު ކުރާނެ ކަމަށް ވަޒީރު ވަހީދު ވިދާޅުވިއެވެ. އެގޮތުން، މިހާރު އައްޑޫސިޓީ، ފުވައްމުލަށް ސިޓީ، ތިނަދޫ ސިޓީ އަދި ކުޅުދުއްފުށި ސިޓީގައި ޔޫތް ހަބް ގާއިމު ކުރުމަށްޓަކައި ސޮއިކޮށްފައިވާކަން ވަޒީރު ފާހަގަ ކުރެއްވިއެވެ. މީގެ އިތުރުން ވެސް އަންނަ އަހަރު އިތުރު ދެ ސަރަހައްދެއްގައި ޔޫތް ހަބް ގާއިމު ކުރާނެ ކަމަށް ވެސް ވަޒީރު ވިދާޅުވިއެވެ.

"އެހެންވީމަ އެންމެ ދަށްކޮށް ދިޔަޔަސް އަޅުގަނޑަށް ހީވަނީ 6 ސަރަހައްދެއްގައި އަޅުގަނޑުމެން ޔޫތް ހަބް ގާއިމު ކުރެވޭނެހެން،" ވަޒީރު އިބްރާހިމް ވަހީދު ވިދާޅުވިއެވެ.

ޒުވާނުން ބާރުވެރިކުރުވައި، ހުނަރުވެރިކުރުވައި، މުޖުތަމައުގެ އެކި ފަރާތްތަކާއެކު އިޖުތިމާއީ ގުޅުން ބަދަހިކުރުމަށް ޒުވާނުންގެ މަރުކަޒެއްގެ ގޮތުގައި މި ސަރުކާރުން މާލޭގައި ތަރައްގީކުރި ފުރަތަމަ ޔޫތް ހަބް ނުވަތަ ޒުވާނުންގެ ވެހި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ރަސްމީކޮށް ހުޅުއްވައިދެއްވާފައިވަނީ މިދިޔަ ނޮވެމްބަރު މަހުގެ 20 ވަނަ ދުވަހުއެވެ.

ރާއްޖޭގެ ހަ ސަރަހައްދެއްގައި ޔޫތް ހަބް ގާއިމު ކުރަނީ

ތިލަދުންމަތީ ދެކުނުބުރީ ހިރިމަރަދޫގެ ރައްޔިތުން، އެ އަތޮޅުގެ ހަނިމާދޫއަށް ބަދަލުކުރެއްވުމަށް ރައީސުލްޖުމްހޫރިއްޔާ މުހައްމަދު މުއިއްޒު މިއަދު ގަރާރެއް ނެރުއްވައިފިއެވެ. މި ގަރާރާއެކު ދިވެހިރާއްޖޭގައި މީހުން ދިރިއުޅޭ ރަށްތައް ކަނޑައަޅާފައިވާ ރައީސުލްޖުމްހޫރިއްޔާގެ ގަރާރު ނަންބަރު 2/2025 އަށް ވަނީ އިސްލާޙު ގެންނަވާފައެވެ.

ރައީސުލްޖުމްހޫރިއްޔާގެ އޮފީހުން ނެރުއްވި ބަޔާނެއްގައިވާ ގޮތުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިގޮތަށް ނިންމެވީ، ތިލަދުންމަތީ ދެކުނުބުރީ ހިރިމަރަދޫއަކީ މީހުން ދިރިއުޅޭ ރަށެއް ނޫންކަމަށް ކަނޑައަޅައި، އެ ރަށުގެ ރައްޔިތުން ހަނިމާދޫގައި އާބާދުކުރުމަށް މަގުފަހިކުރުމުގެ ގޮތުންނެވެ. މި މަސައްކަތް ކުރިއަށް ގެންދެވުމަށްޓަކައި، ރައީސުލްޖުމްހޫރިއްޔާގެ ގަރާރު ނަންބަރު 36/2025 މިއަދު ވަނީ އެކަށައަޅުއްވާފައެ

މި އިސްލާޙު ގެނައުމުގެ މައިގަނޑު ބޭނުމަކީ، 2026 އެޕްރީލް 4 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން އިއުލާނުކޮށްފައިވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު 2026 އާ ގުޅިގެން ހިރިމަރަދޫގެ ރައްޔިތުންގެ އިންތިހާބީ ދާއިރާ ކަނޑައެޅުމެވެ. ހިރިމަރަދޫ ރަށްވެހިން ހަނިމާދޫއަށް ބަދަލުކުރުމުގެ މަސައްކަތް ސަރުކާރުން ކުރަމުންދާ މަރުހަލާގެ ތެރޭގައި މި އިންތިހާބުތައް އަންނާތީ، ގާނޫނު ނަންބަރު 2008/11 (އިންތިހާބުތަކާބެހޭ ޢާންމު ގާނޫނު) ގެ 8 ވަނަ މާއްދާގެ (އ) ގައިވާ ގޮތުން، އެފަދަ ހާލަތެއްގައި ރައްޔިތުންގެ އިންތިހާބީ ދާއިރާއަކަށް ވާނީ އެމީހުން އަލަށް ބަދަލުކުރެވުނު ރަށެވެ. މިގޮތުން، ހިރިމަރަދޫގެ ރައްޔިތުންގެ އިންތިހާބީ ދާއިރާއަކީ ހަނިމާދޫކަމުގައި ބެލުމަށް މި ގަރާރުން މަގުފަހިކޮށްދޭނެއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 134 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން، ހިރިމަރަދޫގެ ރައްޔިތުން ހަނިމާދޫގައި އާބާދުކޮށް ރަޖިސްޓަރީކޮށް ނިމުމުން، ހިރިމަރަދޫއަކީ މީހުން ދިރިއުޅޭ ރަށެއް ނޫންކަމަށް ކަނޑައެޅިގެންދާނެއެވެ. އަދި، ރައީސުލްޖުމްހޫރިއްޔާގެ ގަރާރު ނަންބަރު 2/2025 (ދިވެހިރާއްޖޭގައި މީހުން ދިރިއުޅޭ ރަށްތައް ކަނޑައެޅުން)ގެ ޖަދުވަލުގައި ހިމަނައިފައިވާ ދިވެހިރާއްޖޭގައި މީހުން ދިރިއުޅޭ ރަށްތަކުގެ ލިސްޓުން ހިރިމަރަދޫ އުނިކޮށް، އެ ލިސްޓު އަދާހަމަކޮށް، ގަރާރުގެ ޖަދުވަލެއްގެ ގޮތުގައި އެ ލިސްޓު ވަނީ ހިމަނުއްވާފައެވެ.

މި އިސްލާހަށް އަމަލުކުރަން ފަށާނީ، ތިލަދުންމަތީ ދެކުނުބުރީ ހިރިމަރަދޫގެ ރައްޔިތުން އެ އަތޮޅުގެ ހަނިމާދޫގައި އާބާދުކޮށް ރަޖިސްޓަރީކޮށް ނިމުމާއެކު، އެ ކަން ސަރުކާރުން އާންމުކޮށް އިއުލާނުކުރާ ތާރީހުން ފެށިގެންނެވެ.

ޙަބަރު