habaru page ad two

ރައްޔިތުންނަށް ކުރިމަތިވާ ގިނަ ކަންކަމަށް ޙައްލެއް ލިބެނީ މަގުމައްޗަށް ނުކުމެ އަޑުއުފުލައިގެންނޭ ބުނުމަކީ ކުށަކަށް ނުވާނެއެވެ. މިކަމަށް ބާރުދޭ އެތައް ހެއްކެއް މުޖުތަމަޢުގެ ތެރެއިން ފެންނަން އެބަހުއްޓެވެ. މީގެ އެންމެ ފަހުގެ މިސާލަކީ، ބީއެމްއެލްގެ ސްޕޯކްސްޕާސަން މުޙައްމަދު ސަޢީދު، މަގުމަތީގައި ކުރިއަށްގެންދިޔަ ބަނޑުހައިހޫނުކަމުގެ ހަޅުތާލެވެ. މިއީ ހެންވޭރު ކަށިމާ ހިނގުމާއި ދޫހިމެރި މަގުގައި ދިރިއުޅޭ ރައްޔިތުންނަށް، އެ ސަރަޙައްދުގައި އުޅޭ މީހެއްގެ ފަރާތުން ތަކުރާރުކޮށް ކުރިމަތިވަމުންދިޔަ ގޯނާތަކާއި އުނދަގޫތަކަށް ދާއިމީ ޙައްލެއް ނުލިބި، އިންސާފު ލަސްވުމުން ކުރިއަށްގެންދިޔަ އިހުތިޖާޖެކެވެ.

އަޙްމަދު ފައިރިޝް ނަމަކަށް ކިޔާ އެ މީހާގެ ފަރާތުން އާންމު އިޖުތިމާޢީ މިންގަނޑުތަކާ ޚިލާފު އެތައް ޢަމަލުތަކެއް ފެންނަމުންދިޔައެވެ. އޭގެ ތެރޭގައި ކުޑަކުދިންގެ ކުރިމަތީގައި ހުތުރު ބަހުން ވާހަކަދެއްކުމާއި، އެކި ފަރާތްތަކަށް ޖިސްމާނީ ގޯނާކުރުން ހިމެނެއެވެ. މިފަދަ އެތައް މައްސަލައެއް ފުލުހުންނަށް ރިޕޯޓުކޮށް، އެތައް ފަހަރަކު އޭނާ ހައްޔަރުކުރި ނަމަވެސް، މާ ގިނައިރުތަކެއް ނުވެ ދޫކޮށްލުމުގެ ސަބަބުން އެ ސަރަޙައްދުގެ ރައްޔިތުން ތިބީ އިންތިހާއަށް ކަންބޮޑުވެފައެވެ. އެއްވެސް މުއައްސަސާއަކުން އެދެވޭ ޙައްލެއް ނުލިބި، ކެތްތެރިކަން ކޮޅުންލުމުން، ސަޢީދު އެންމެ ފުރަތަމަ ހަޅުތާލު ފެށްޓެވީ ހެންވޭރު ޕޮލިސް ސްޓޭޝަންގެ އެތެރޭގައެވެ. ނަމަވެސް، އެތަނުގައި 14 ގަޑިއިރު ހޭދަކުރުމަށްފަހު ނުކުންނަން ޖެހުމުން، އޭނާގެ ހަޅުތާލު ބަދަލުކުރީ ޕޮލިސް ސްޓޭޝަން ބޭރު، މަޖީދީމަގަށެވެ.

ގާތްގަނޑަކަށް 35 ގަޑިއިރަށް ދެމިގެންދިޔަ މި ބަނޑުހައިހޫނުކަމުގެ ހަޅުތާލު ނިންމައިލީ، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން އަދި ޕްރޮސެކިއުޓަރ ޖެނެރަލް، މި މައްސަލަ ބައްލަވައި ފިޔަވަޅު އަޅުއްވާނެ ކަމުގެ ފުރިހަމަ ޔަޤީންކަން ދެއްވުމުންނެވެ. ސަޢީދު ފާހަގަކުރެއްވި ގޮތުގައި، ފުލުހުންގެ އިދާރާގައި މީގެކުރިން ބަންދުކޮށްފައި (ފައިލްކޮށްފައި) ހުރި ގިނަ މައްސަލަތަކެއް، ވަޒީރުގެ އެންގެވުމަށް އަލުން ބައްލަވަން ވަނީ ފަށްޓަވާފައެވެ. އަދި ކުރިން ރަސްމީކޮށް ލޮގް ނުކުރެވި ހުރި މައްސަލަތައް އަލުން ލޮގްކުރުމުގެ ފުރުޞަތުވެސް ވަނީ ފަހިކޮށްދެއްވާފައެވެ. އެހެންކަމުން، މި މައްސަލަތައް އަލުން ހުށަހެޅުމަށްފަހު، އާއިލާއާ މަޝްވަރާކޮށް ހަޅުތާލު ނިންމައިލީއެވެ.

މި ހާދިސާއިން އުފެދޭ އެންމެ ބޮޑު ސުވާލަކީ މިއެވެ؛ ރައްޔިތަކަށް އިންސާފާއި އަމާންކަން ލިބެން އޮތީ، އާމްދަނީ ހޯދަން ކުރާ މަސައްކަތް ހުއްޓާލައި، މަގުމައްޗަށް ނުކުމެ ހަޅުތާލު ކޮށްގެން ހެއްޔެވެ؟ ދައުލަތުގެ މުއައްސަސާތައް ހިންގަން ތިއްބެވި ވެރިންގެ ނާޤާބިލުކަމުން، ކޮންމެ ކަމަކަށް އޮތް ހަމައެކަނި ޙައްލަކީ މަގުމަތީގެ އިހުތިޖާޖުތައް ހެއްޔެވެ؟

ޤާނޫނުއަސާސީން ކަށަވަރުކޮށްދީފައިވާ ރައްކާތެރިކަމާއި އަމާންކަން ރައްޔިތުންނަށް ފޯރުކޮށްދިނުމަކީ ދައުލަތުގެ އެންމެ އިސް ވާޖިބެވެ. ނަމަވެސް، ރައްޔިތުންގެ ކަންބޮޑުވުންތަކަށް މުއައްސަސާތަކުން އިޖާބަދެނީ ކޮންމެހެން މަގުމައްޗަށް ނުކުމެ، ސޯޝަލް މީޑިއާގައި އަޑުގަދަކޮށް، އަމިއްލަ ނަފުސު ނުރައްކަލަށް ހުށަހެޅުމުން ކަމުގައި ވާނަމަ، އެއީ ނިޒާމު ފެއިލްވެފައިވާ މިންވަރު ދައްކުވައިދޭ ހެއްކެކެވެ.

މުޖުތަމަޢުގެ އަމަންއަމާންކަން ޤާއިމުކުރުމަށް ހެދިފައިވާ ޤާނޫނުތަކާއި ޤަވާޢިދުތައް ތަންފީޛުކުރުމުގައި ލަސްތަކެއް އުޅޭނަމަ، އާންމު ރައްޔިތުންގެ އިތުބާރު ދައުލަތުގެ ނިޒާމަށް ގެއްލިގެންދާނެއެވެ. ކޮންމެ މައްސަލައަކަށް ވަޒީރުންނާއި އިސްވެރިން މަގުމައްޗަށް ވަޑައިގެން ޔަޤީންކަން ދެއްވަން ޖެހުމަކީ ދެމެހެއްޓެނިވި ގޮތެއްގައި މައްސަލަތައް ޙައްލުކުރެވޭނެ އުޞޫލެއް ނޫނެވެ.

އެހެންކަމުން، ރައްޔިތުން އަމިއްލަ ދިރިއުޅުމާއި މަސައްކަތް ހުއްޓާލައި، މަގުމައްޗަށް ނުކުންނަން ނުޖެހޭނެ ފަދަ ހަރުދަނާ އުޞޫލުތަކެއް މުއައްސަސާތަކުގެ ތެރޭގައި ޤާއިމުކުރަން ޖެހެއެވެ. ޝަކުވާތައް ބަލައިގަނެ، އެކަށީގެންވާ އަވަސް ފިޔަވަޅު އެޅޭނެ އިތުބާރުހުރި ނިޒާމެއް ހަމަޖެހިގެން މެނުވީ، އިޖުތިމާޢީ ޢަދާލަތާއި އަމާންކަން ދާއިމީ ގޮތެއްގައި ކަށަވަރެއް ނުކުރެވޭނެއެވެ.

ރައްޔިތުންނަށް ކުރިމަތިވާ އިޖުތިމާޢީ މައްސަލަތަކަށް ޙައްލު ލިބެނީ މަގުމައްޗަށް ނުކުމެ ހަޅުތާލުކޮށްގެން ހެއްޔެވެ؟

ޤައުމެއްގެ މުސްތަޤްބަލަކީ އެ ޤައުމެއްގެ ޅަދަރިންނެވެ. އެ ކުދިން ބޮޑެތިވަމުން އަންނަ މާހައުލަކީ އަމާން، އޯގާތެރި އަދި ރައްކާތެރި ތަނަކަށް ވާންޖެހެއެވެ. ނަމަވެސް، މިއަދު އަޅުގަނޑުމެންގެ ދިވެހި މުޖުތަމަޢުން ފެންނަމުން މިދަނީ މި މުހިންމު އަސާސްތައް ފުނޑުފުނޑުވެ، ކުދިންގެ މެދުގައި އަނިޔާވެރިކަމާއި ގަނާކުރުން (ބުލީކުރުން) އިންތިހާއަށް އިތުރުވެފައިވާ ބިރުވެރި މަންޒަރެވެ. މިފަދަ ލާއިންސާނީ އަދި ހިތާމަވެރި ހާދިސާއެއްގެ ވީޑިއޯ ސޯޝަލް މީޑިއާގައި މިވަނީ  ދައުރުވެފައެވެ. 

އާންމުވެފައިވާ އެ ވީޑިއޯއިން ފެންނަނީ ހުޅުމާލޭގެ ރެހެންދި ސްކޫލްގެ ދަރިވަރުންތަކެއް، އެ ސްކޫލުގެ އެހެން ދަރިވަރަކު ވަށާލައި، ރަޙުމެއްނެތި އެ ކުއްޖާއަށް އަނިޔާކޮށް ގަނާކުރަމުންދާ މަންޒަރެވެ. ތިން ދަރިވަރަކު ވެގެން އެއް ކުއްޖަކަށް ޖިސްމާނީ އަނިޔާދީ، ބިރުދައްކަމުން ދިޔައިރު، އަނިޔާ ލިބެމުންދިޔަ ކުއްޖާ ރޮއި އާދޭސްކުރަމުން އެފަދައިން ނުހެދުމަށް އެދެމުންދިޔަ މަންޒަރު ހިތްފަޅައިގެންދާ ފަދަ ގޮތަކަށް ސާފުކޮށް ފެނެއެވެ. އެއްވެސް ކުށެއްނެތް މަޢުޞޫމު ކުއްޖަކަށް މިފަދަ އަނިޔާއެއް ދެމުންދިޔައިރު، އެކަން ހުއްޓުވާނެ ނުވަތަ އެ ކުއްޖާގެ ޙައްޤުގައި ތެދުވާނެ އެއްވެސް ފަރާތެއް އެ މާހައުލުގައި ނެތުމަކީ ނުހަނު ކަންބޮޑުވާންޖެހޭ ކަމެކެވެ.

މި ހާދިސާއާ ގުޅިގެން އިތުރު މަޢުލޫމާތު ސާފުކުރުމަށް "ރެދަން އޮންލައިން" ގެ ފަރާތުން ރެހެންދި ސްކޫލަށް ގުޅުމުން، އެ ސްކޫލުން ޖަވާބުދާރީވެފައިވަނީ  ޒިންމާދާރުކަން ކުޑަ ގޮތަކަށެވެ. އެގޮތުން އެއީ ސްކޫލުން ބޭރުގައި ހިނގާފައިވާ ކަމެއް ކަމަށްވާތީ، އެކަމާ ގުޅޭގޮތުން އެއްވެސް އެއްޗެއް ބުނެވެން ނެތް ކަމަށް ސްކޫލުގެ އިދާރާއިން ވަނީ ބުނެފައެވެ. އަދި މިކަމާ ގުޅޭގޮތުން ސްކޫލުގެ ޕްރިންސިޕަލް ނާޒިމްގެ ބަހެއް ހޯދުމަށް ތަކުރާރުކޮށް ގުޅި ނަމަވެސް، ފޯނަށް ޖަވާބު ދެއްވާފައެއް ނުވެއެވެ. ސްކޫލުގެ ޔުނީފޯމުގައި ނުވަތަ ސްކޫލުގެ ދަރިވަރުންތަކެއް ހިންގާ މިފަދަ އަމަލުތަކުން ސްކޫލުގެ މެނޭޖްމަންޓަށް ރެކެވެން އޮންނާނެ ހެއްޔެވެ؟ ކަމެއް ސްކޫލުގެ ފާރުން ބޭރުގައި ހިނގުމަކީ، އެ ސްކޫލެއްގެ ދަރިވަރުންގެ އަޚްލާޤީ ޒިންމާއިން ސްކޫލަށް ބަރީޢަވެވޭނެ ސަބަބެއް ނޫނެވެ.

ސްކޫލް މާހައުލުގައާއި ސްކޫލުން ބޭރުގައިވެސް ކުދިންގެ މެދުގައި ގަނާކުރުމާއި ފުރައްސާރަކުރުމުގެ މައްސަލަތައް އާދަޔާޚިލާފަށް އިތުރުވަމުންދާއިރު، މިކަމަށް އެދެވޭ ދާއިމީ ޙައްލެއް އަދިވެސް ހޯދިފައެއް ނުވެއެވެ. ސަރުކާރުގެ ކަމާބެހޭ ވުޒާރާތަކާއި ތަޢުލީމީ އިދާރާތަކުން މިފަދަ ކަންކަން ހުއްޓުވުމަށް އެކަށީގެންވާ ސިޔާސަތުތަކެއް ތަންފީޒު ނުކުރެވިއެވެ. މިފަދަ ނޭދެވޭ ޢަމަލުތައް މުޖުތަމަޢުގައި އިންތިހާއަށް އިތުރުވަމުންދާއިރު، ގިނަ ބެލެނިވެރިންނަށްވެސް މި މައްސަލައިގެ ނުރައްކާތެރިކަން އެންމެ ފުރިހަމައަށް ވަޒަން ނުކުރެވޭކަން ފާހަގަކުރެވެއެވެ. ބައެއް ބެލެނިވެރިންނަށް މިއީ ކުދިންގެ މެދުގައި ހިނގާ އާދައިގެ ސަމާސާއެއްގެ ގޮތުގައި ދެކެވުނު ނަމަވެސް، މިއީ ކުއްޖެއްގެ މުޅި ދިރިއުޅުން އަނދަވަޅަކަށް ވައްޓާލާ ފަދަ ނަފްސާނީ އަދި ޖިސްމާނީ ބޮޑު ގެއްލުމެކެވެ.

މިއީ އަމިއްލަ ދަރިންނަށް މިފަދަ ކަންކަމުގެ ސަބަބުން ލިބޭނެ ގެއްލުން ބުނެދެވިފައި ނުވުމުން ވާ ކަމެއްބާއެވެ؟ ނުވަތަ މިކަމުގެ ނުރައްކާ އެނގިތިބެ، ގަސްތުގައި ކުރާ ކަމެއްބާއެވެ؟ މިއީ މިއަދު މުޅި މުޖުތަމަޢު ފުންކޮށް ވިސްނާލަންޖެހިފައިވާ މުހިންމު ކަމެކެވެ.

މުޖުތަމަޢާއި ސަރުކާރު މި ބިރުވެރި ހަޤީޤަތަށް ލޯމަރައިގެން ނިދާފައި ތިބެވޭކަށް ދެން ނެތެވެ. އިސްލާމީ ތަރުބިއްޔަތާއި އިންސާނީ ކަރާމާތުގެ އަގުވަޒަންކުރަން ދަރިންނަށް ދަސްކޮށްދިނުމަކީ ބެލެނިވެރިންގެ ޒިންމާއެކެވެ. ހަމައެއާއެކު، ސަރުކާރާއި ތަޢުލީމީ ވުޒާރާއިން މިފަދަ ޢަމަލުތައް ހިންގާ ފަރާތްތަކާމެދު ހަރުކަށި ފިޔަވަޅު އަޅައި، ގަނާކުރުން ހުއްޓުވުމަށް ޤާނޫނީ ގޮތުންނާއި އިދާރީ ގޮތުން ހަރުދަނާ ނިޒާމެއް ޤާއިމުކުރަންޖެހެއެވެ. އެހެން ނޫންނަމަ، އަޅުގަނޑުމެންގެ ޅަދަރިންގެ މުސްތަޤްބަލު އަނިޔާވެރިކަމުގެ ތެރެއަށް ގެނބިގެންދާ މަންޒަރު ބަލަން ތިބެންޖެހިދާނެއެވެ.

ރެހެންދި ސްކޫލްގެ ދަރިވަރަކަށް ގަނާކޮށް އަނިޔާކުރާ ވީޑިއޯއެއް އާންމުވެއްޖެ: މުއަސަސާތައް ނިދާފަ؟

ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ "އަމާން އުދަރެސް" އަދި "އަމާން ދޯދި" ޓަވަރުތަކުގެ ތެރެއިން ދެ ފްލެޓެއް ހުސްކުރުމަށް އެންގުމާ ގުޅިގެން، ކުލި ނުދައްކައި ތިބި ގިނަ އަދަދެއްގެ މީހުން ކުލި ދެއްކުމުގެ މަސައްކަތް ފަށައިފިއެވެ.

ފަހި ދިރިއުޅުން ކޯޕަރޭޝަން (އެފްޑީސީ) އިން 15 ދުވަހުގެ ނޯޓިސް ދީ، އެއްބަސްވުން ބާތިލްކޮށްފައި ވަނީ ފްލެޓަށް ވަން ފަހުން އެއްގޮތަކަށް ވެސް ކުލި ނުދައްކާ ހުރި ދެ ޔުނިޓެއްގައެވެ. މި ދެ ޔުނިޓުގެ ވެރިފަރާތަށް ވެސް އެއްބަސްވުމުގައިވާ ގޮތުގެ މަތިން ފައިސާ ދެއްކުމަށް އެކި ފަހަރު މަތިން ފުރުސަތު ދިން ކަމަށް އެފްޑީސީން ބުނެއެވެ. ނަމަވެސް، ދިން މުއްދަތު ހަމަވިއިރު ވެސް ފައިސާ ދައްކާފައި ނުވާތީ، މިދިޔަ ބުދަ ދުވަހު ވަނީ އެފަރާތްތަކާ އެކު ވެފައިވާ އެއްބަސްވުން ބާތިލްކޮށް، 15 ދުވަހުގެ ތެރޭގައި ތަން ހުސްކުރަން އަންގައިފައެވެ. އަދި އެ މީހުންނަށް އެފްޑީސީގެ ޕޯޓަލް އެކައުންޓަށް ދީފައިވާ އެކްސެސް ވެސް މިހާރު ވަނީ ކަނޑާލައިފައެވެ.

އެކަމާ ގުޅިގެން ހަމްދާން  މިއަދު ވިދާޅުވީ، ދެ ޔުނިޓެއް ހުސްކުރަން އެންގުމާ އެކު، ކުލި ނުދައްކައިގެން ނޯޓިސް ފޮނުވާފައި ތިބި ގިނަ ބަޔަކު އަންނަނީ ކުލި ދައްކަން އެ ކުންފުންޏަށް ގުޅަމުން ކަމަށެވެ. އަދި މިހާރު ނޯޓިސް ފޮނުވާފައިވާ ގިނަ މީހުންނަކީ އެކެއް ނުވަތަ ދެ މަހުގެ ކުލި ނުދައްކާ ތިބި މީހުން ކަމަށް ވެސް އޭނާ ވިދާޅުވިއެވެ.

މީގެއިތުރުން ހަމްދާން ވިދާޅުވީ، ބައެއް މީހުން ނުދައްކާ އޮތް ކުލި ބޮޑުވެ، އެއްފަހަރާ ފައިސާ ދައްކަން ދަތިވާނެތީ، ބަހާލައިގެން ކުލި ދެއްކޭނެ އިންތިޒާމުތައް އެފްޑީސީން ހަމަޖައްސައިދޭނެ ކަމަށެވެ.

"ކުލި ނުދައްކައިގެން ނޯޓިސް ފޮނުވާފައިވާ ތިބި ގިނަ ފަރާތްތަކުން ކުލި ދައްކަން އަޅުގަނޑުމެންނަށް އެބަ ކޮންޓެކްޓް ކުރޭ. އޭގެ އިތުރުން އެއް ފަހަރާ ފައިސާ ދައްކަން ދަތިވާ ނަމަ އެ ވެސް ބަހާލައިގެން ދެއްކޭނެ އިންތިޒާމު އަޅުގަނޑުމެން ހަމަޖައްސައިދޭނަން،" ހަމްދާން ވިދާޅުވިއެވެ.

ހުޅުމާލެ 2 ގައި ހަދާފައިވާ އެފްޑީސީގެ 4،000 ފްލެޓަށް ބައެއް މީހުން ކުލި ނުދައްކަނީ އެ ސަރަހައްދުގައި އިމާރާތް ކޮށްފައިވާ ހިޔާ ފްލެޓުތަކަށް ވެސް މީހުން ކުލި ނުދައްކާ އުޅޭއިރު ވެސް އެ ތަންތަން އަތުލުން ފަދަ ފިޔަވަޅެއް ނާޅާތީއެވެ. އެކަމަކު، އެފްޑީސީން ފްލެޓު އެއްބަސްވުން ހަދާފައި އޮތީ ގަވާއިދުން ކުލި ނުދައްކާ ނަމަ އެ ތަންތަން އަތުލުމުގެ ބާރު ލިބޭ ގޮތަށެވެ.

އެ ކުންފުނިން އެންމެ ފަހުން ހާމަކޮށްފައިވާ މައުލޫމާތުތަކަށް ބަލާއިރު، ގަވާއިދުން ކުލި ނުދައްކާ 564 ފްލެޓެއް އެބަހުއްޓެވެ.

ދެ ފްލެޓެއް ހުސްކުރަން އެންގުމާ އެކު، ފްލެޓުތަކަށް ކުލި ދައްކަން ފަށައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފުރަމާނަ ދަތުރުފުޅެއްގައި އަންނަ އަންގާރަ ދުވަހު ޕާކިސްތާނަށް ވަޑައިގަންނަވަން ނިންމަވައިފިއެވެ.

އަންނަ ހުކުރު ދުވަހުގެ ނިޔަލަށް ކުރައްވާ މި ދަތުރުފުޅުގައި މެމޮރެންޑަމް އޮފް އަންޑަސްޓޭންޑިން (އެމްއޯޔޫ) އާއި އެއްބަސްވުންތަކެއް ހިމެނޭ ގޮތުން 12 ކަމަކާ ގުޅޭ ގޮތުން ދެ ޤައުމުން ސޮއިކުރާނެ ކަމަށް ޕާކިސްތާނުގެ ފޮރިން އޮފީހުން މިއަދު ވަނީ ހާމަކޮށްފައެވެ. މިއީ ވޭތުވެދިޔަ 10 އަހަރަށް ފަހު ދިވެހި ދައުލަތުގެ ވެރިއަކު ޕާކިސްތާނަށް ކުރައްވާ ފުރަތަމަ ފުރަމާނަ ދަތުރުފުޅެވެ.

ޕާކިސްތާނުގެ ފޮރިން އޮފީހާ ހަވާލާދީ އެ ޤައުމުގެ "ދަ އިންޓަނޭޝަނަލް ނިއުސް ޕާކިސްތާން (ދަ ނިއުސް.ޕީކޭ)" ނޫހުން ބުނީ، މި ދަތުރުފުޅަކީ ތާރީޚީ ދަތުރުފުޅަކަށް ވާތީ ރައީސް މުޢިއްޒުގެ ދަތުރުފުޅަށް އެ ޤައުމުން ވަރަށް ބޮޑަށް ތައްޔާރުވަމުން އަންނަ ކަމަށެވެ. އެގޮތުން ތައްޔާރީތައް ފެށުމުގެ ގޮތުން ޕާކިސްތާނުގެ ބޮޑުވަޒީރުގެ ނައިބު އަދި ފޮރިން މިނިސްޓަރު އިޝްހާޤް ދާރު މިއަދު ވަނީ ޚާއްޞަ ބައްދަލުވުމެއް ބާއްވަވާފައެވެ.

"ބައްދަލުވުމުގައި ރިވިއުކުރީ ބައިލެޓަރަލް އެޖެންޑާ، ވިޔަފާރި އާއި އިންވެސްޓްމެންޓް، ސިއްހަތު، ތައުލީމު، މޫސުމަށް އަންނަ ބަދަލު، ޓޫރިޒަމް އަދި ސިވިލް އޭވިއޭޝަންގެ ދާއިރާއިން އެއްބާރުލުން އިތުރުކުރަން އަމާޒުކޮށްގެން،" ޕާކިސްތާނުގެ ފޮރިން އޮފީހާ ހަވާލާދީ، އެ ނޫހުގައި ވެއެވެ.

ދިވެހި ސަރުކާރުގެ މަތީ ފެންވަރުގެ ވަފުދަކާ އެކު ރައީސް މުޢިއްޒު ކުރައްވާ މި ދަތުރުފުޅުގައި، ޕާކިސްތާނުގެ ބޮޑުވަޒީރު ޝާހުބާޒް ޝަރީފާއި ރައީސް އާސިފް އަލީ ޒަރުދާރީއާ ބައްދަލުކުރައްވައި ރަސްމީ ވާހަކަފުޅުތައް ބޭއްވެވުމަށް ވަނީ ހަމަޖެހިފައެވެ.

މި ދަތުރުފުޅުގައި ދެ ޤައުމުގެ ދެމެދުގައި ސޮއިކުރުމަށް ހަމަޖެހިފައިވާ 12 އެއްބަސްވުމުގެ ތެރޭގައި ވިޔަފާރި އާއި އިންވެސްޓްމެންޓް، ސިއްހަތު، ތައުލީމު، ކްލައިމެޓް ޗޭންޖް، ޓޫރިޒަމް، އަދި ސިވިލް އޭވިއޭޝަންގެ އިތުރުން ދިފާޢީ އަދި އަސްކަރީ ދާއިރާއިން ގުޅުން ބަދަހިކުރުން ހިމެނެއެވެ.

މީގެއިތުރުން، ދެކުނު އޭޝިއާގެ ޤައުމުތައް އެކުލެވޭ ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން (ސާކް) އަށް އަލުން ދިރުން ގެނައުމާ ގުޅޭގޮތުން ވެސް މި ދަތުރުފުޅުގައި ދެ ޤައުމުގެ ވެރިން ފުޅާ ދާއިރާއެއްގައި މަޝްވަރާކުރައްވާނެ ކަމަށް ރިޕޯޓްތައް ބުނެއެވެ.

ރައީސް މުއިއްޒު ފުރަމާނަ ދަތުރުފުޅެއްގައި ޕާކިސްތާނަށް، 12 އެއްބަސްވުމެއްގައި ސޮއިކުރައްވަނީ

މި އަހަރުގެ މިހާތަނަށް ރާއްޖޭގައި ހިނގައިގެން ރިޕޯޓުކުރި އެކްސިޑެންޓުތަކުގެ އަދަދު 2,000 އިން މައްޗަށް އަރައިފިއެވެ. ދިވެހި ފުލުހުންގެ ޚިދުމަތުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، މި ހިނގާ މަހުގެ މިހާތަނަށް އެކަނިވެސް 96 އެކްސިޑެންޓެއް ވަނީ ހިނގާފައެވެ.

ފުލުހުންގެ ވެބްސައިޓުގައި ޝާއިއުކޮށްފައިވާ މައުލޫމާތުތަކަށް ބަލާއިރު، މިއަހަރުގެ މިހާތަނަށް ޖުމްލަ 2,379 އެކްސިޑެންޓް ފުލުހުންނަށް ވަނީ ރިޕޯޓުކޮށްފައެވެ. މިއަހަރު ފުލުހުންނަށް ހުށަހެޅުނު ޖުމްލަ 9,912 މައްސަލައިގެ ތެރެއިން ދެވަނައަށް އެންމެ ގިނައިން ރިޕޯޓުކޮށްފައިވަނީ މަގުމަތީގެ އެކްސިޑެންޓުތަކެވެ. މި ލިސްޓުގެ އެންމެ ކުރީގައި އުޅެނީ ވައްކަމުގެ މައްސަލަތަކެވެ. އެގޮތުން ވައްކަމުގެ 2,753 މައްސަލައެއް މިހާތަނަށް ވަނީ ހުށަހަޅާފައެވެ.

ހާއްސަކޮށް މާލެ ސަރަހައްދުގައި އެކްސިޑެންޓުތައް ގިނަވެ، ނުރައްކާތެރި ހާދިސާތައް ހިނގަމުންދާތީ އެކަން ހައްލުކުރުމަށް ފުލުހުން މިހާރު ދަނީ ހާއްސަ ފިޔަވަޅުތަކެއް އަޅަމުންނެވެ. އެގޮތުން ނުރައްކާތެރިކޮށް އުޅަނދު ދުއްވާ ފަރާތްތަކާ ދެކޮޅަށް ފިޔަވަޅު އެޅުމަށްޓަކައި، މި މަހުގެ އެއްވަނަ ދުވަހުން ފެށިގެން އަމަލުކުރަން ފެށި އެއްގަމު ދަތުރުފަތުރުގެ ގާނޫނުގެ ދަށުން ފުލުހުންނަށް ވަނީ މަގުމަތީގެ ގަވާއިދާ ހިލާފުވާ ފަރާތްތައް ބޮޑެތި އަދަދުތަކުން ޖޫރިމަނާކުރުމުގެ ބާރު ދީފައެވެ.

މި އާ އުސޫލުގެ ދަށުން ރަޖިސްޓަރީ ނުކޮށް ނުވަތަ ގަވާއިދާ ހިލާފަށް އުޅަނދު ދުއްވާ ފަރާތްތައް ފުރަތަމަ ފަހަރު 500 ރުފިޔާއިން ޖޫރިމަނާކުރެވޭނެއެވެ. އަދި ދެވަނަ ފަހަރަށް އެފަދަ ކަމެއް ތަކުރާރުކޮށްފިނަމަ 750 ރުފިޔާއިން ޖޫރިމަނާކުރާއިރު، ތިންވަނަ ފަހަރުން ފެށިގެން ކޮންމެ ފަހަރަކު 1,000 ރުފިޔާއިން ޖޫރިމަނާކުރުމަށް ވަނީ ހަމަޖެހިފައެވެ.

މަގުމަތީގެ ނުރައްކާތެރި އެކްސިޑެންޓްތައް އިތުރުވަމުންދާތީ، އާންމުންގެ ކަންބޮޑުވުންތަކާ ގުޅިގެން ރައްޔިތުންގެ މަޖިލީހުން ވެސް ވަނީ މި މައްސަލައިގައި ފުލުހުން މަޖިލީހުގެ ކޮމިޓީއަށް ހާޒިރުކޮށް ސުވާލުކުރުމަށް ދާދިފަހުން ނިންމާފައެވެ. މިއީ މަގުމަތީގެ އަމާންކަން ކަށަވަރުކުރުމަށާއި، މިފަދަ ހިތާމަވެރި ހާދިސާތައް މަދުކުރުމަށް އަޅަންޖެހޭ ފިޔަވަޅުތައް އަވަސްކުރުމުގެ މަގުސޫދުގައި ނިންމި ނިންމުމެކެވެ.

މިއަހަރުގެ މިހާތަނަށް 2،000 އަށްވުރެ ގިނަ އެކްސިޑެންޓް ރިޕޯޓުކޮށްފި

މާލެ ސަރަޙައްދުގެ ކަނޑުއަޑީގައި ފެން އުފައްދާ ނިޒާމެއް ޤާއިމުކުރުމުގެ ފުރުޞަތުތައް ދެނެގަތުމަށްޓަކައި، މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އިން ޢަމަލީ ދިރާސާއެއް ފަށައިފިއެވެ.

"ސަބްސީ ޑީސެލިނޭޝަން" ގެ ނަމުގައި މި ޒަމާނީ ޓެކްނޮލޮޖީ ރާއްޖެއަށް ތަޢާރުފުކުރުމަށް ދިރާސާކުރަމުން ދަނީ، ޤައުމީ ފެންވަރުގައި ފެނުގެ ރައްކާތެރިކަން ކަށަވަރުކުރުމަށާއި، ޚިދުމަތްތައް ދިނުމުގެ ހިންގުން ހަރުދަނާކޮށް، ދެމެހެއްޓެނިވި ޢުމްރާނީ ތަރައްޤީއަށް ބާރުއެޅުމުގެ މަޤްޞަދުގައެވެ. މިކަމާ ގުޅޭގޮތުން އެމްޑަބްލިޔުއެސްސީން ބުނީ، މި މަޝްރޫޢަކީ 2040 ވަނަ އަހަރާ ހަމައަށް ރާއްޖެ ފުރިހަމައަށް ތަރައްޤީވެފައިވާ ޤައުމަކަށް ހެއްދެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ދުރުވިސްނުންފުޅާއި ތަޞައްވުރު ޙަޤީޤަތަކަށް ހެދުމަށް އެއްބާރުލުން ދިނުމުގެ ގޮތުން ކުރިއަށްގެންދާ މުހިންމު މަސައްކަތެއް ކަމަށެވެ.

މިހާރު ކުރިއަށްދާ ފީސިބިލިޓީ ދިރާސާގެ ތެރެއިން، ފްލޯޝަން ކުންފުނީގެ ފަންނީ ޓީމުން ވަނީ ކަނޑުގެ 500 މީޓަރު އަޑިން ފެނުގެ ސާމްޕަލް ނަގާފައެވެ. ފުރަތަމަ ބެލިބެލުމުން ވެސް މި ފެނަކީ އާދަޔާ ޚިލާފަށް ސާފު ފެނެއްކަން ފާހަގަކުރެވިފައިވާ ކަމަށް އެމްޑަބްލިޔުއެސްސީން ބުނެއެވެ. އަދި ލެބޯޓަރީ ތަޙުލީލުތަކުން މިކަން ކަށަވަރުވެއްޖެނަމަ، މިއީ ފެން އުފެއްދުމަށް ބޭނުންކުރެވޭނެ އެންމެ ފެންވަރު ރަނގަޅު ޤުދުރަތީ ފެނުގެ މަޞްދަރުތަކުގެ ތެރޭގައި ހިމެނޭނެ ފެނެއް ކަމަށްވެސް އެ ކުންފުނިން މަޢުލޫމާތުދެއެވެ.

ފްލޯޝަންގެ މި ޓެކްނޮލޮޖީ ފަރުމާކުރެވިފައިވަނީ ކަނޑުގެ އަޑީގެ ޠަބީޢީ ޕްރެޝަރު ނުވަތަ ހައިޑްރޯސްޓެޓިކް ޕްރެޝަރު ބޭނުންކޮށްގެން ރިވާސް އޮސްމޯސިސް ނިޒާމު ހިންގޭ ގޮތަށެވެ. މީގެ ސަބަބުން ކަރަންޓު ޚަރަދު 40 އިންސައްތައާއި 50 އިންސައްތައާ ދެމެދުގެ މިންވަރަކަށް ކުޑަކުރެވިގެންދާނެއެވެ.

މީގެއިތުރުން، ފެން އުފެއްދުމުގެ މަރުޙަލާގައި ކެމިކަލް ބޭނުންކުރަންޖެހޭ މިންވަރު މަދުވެ، ތިމާވެއްޓަށް ލިބޭ ގެއްލުންތައް ވަރަށް ބޮޑަށް ކުޑަކުރެވިގެންދާނެ ކަމަށްވެސް އެމްޑަބްލިޔުއެސްސީން ވަނީ ފާހަގަކޮށްފައެވެ.

ކަނޑުއަޑީގައި ފެން އުފައްދާ ނިޒާމެއް ޤާއިމުކުރަން އެމްޑަބްލިއުއެސްސީން ދިރާސާކުރަން ފަށައިފި

ކެފޭއެއްގެ ގޮތުގައި މަސްތުވާތަކެތި ވިއްކައި، އެ ތަކެތި ބޭނުންކުރަމުންދިޔަ އެޕާޓްމެންޓެއް ބަލައިފާސްކޮށް ފުލުހުންގެ ބެލުމުގެ ދަށަށް ގެންދިޔަ ހަ މީހެއްގެ ބަންދަށް ކްރިމިނަލް ކޯޓުން މިއަދު 30 ދުވަސް ޖަހައިފިއެވެ.

ފުލުހުން މައުލޫމާތު ދިން ގޮތުގައި، މި މައްސަލައިގައި ހައްޔަރުކޮށްފައިވާ ހަ މީހުންނަކީ ވެސް މަސްތުވާތަކެތި ގެންގުޅުމާއި ބޭނުންކުރުމުގެ އިތުރުން، މަސްތުވާތަކެތީގެ ވިޔަފާރިކޮށް، އެ ތަކެތި ޓްރެފިކްކުރާ ކަމުގެ ތުހުމަތު ކުރެވޭ ބައެކެވެ. ފުލުހުން ބުނީ އެ އެޕާޓްމެންޓަކީ ކެފޭއެއްގެ އުސޫލުން މަސްތުވާތަކެތި ވިއްކައި، އެތަނަށް އަންނަ މީހުންނަށް މަސްތުވާތަކެތި ބޭނުންކުރެވޭނެ ގޮތަށް އިންތިޒާމުތައް ހަމަޖައްސައިގެން ހިންގަމުންދިޔަ ތަނެއް ކަމަށެވެ.

ފުލުހުން އެ ތަން ބަލައިފާސްކުރިއިރު، އެޕާޓްމެންޓުގެ ތެރެއިން ގިނަ އަދަދެއްގެ މަސްތުވާތަކެއްޗާއި، ގިނަ އަދަދެއްގެ ފައިސާގެ އިތުރުން، މަސްތުވާތަކެތި ބަންދުކޮށް ކިރުމަށް ބޭނުންކުރާ އާލާތްތައް ވެސް ވަނީ ފެނިފައެވެ. އަދި ހައްޔަރުކުރި ބައެއް މީހުންނަކީ އެ ތަނަށް އަބަދުވެސް ވަދެ ނުކުމެ ހަދާ ބައެއްކަން ސާބިތުކޮށްދިނުމަށް ހެކިބަސް ލިބިފައިވާ ކަމަށް ފުލުހުން ކޯޓުގައި ވަނީ ހާމަކޮށްފައެވެ.

މި މައްސަލައިގައި ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެ މީހުން ވަނީ އެޕާޓްމެންޓުން ފެނުނު މަސްތުވާތަކެއްޗާ އެއްވެސް ގުޅުމެއް ނެތް ކަމަށް ބުނެ، އެ މީހުންގެ މައްޗަށް ކުރެވޭ ހުރިހާ ތުހުމަތުތަކަށް އިންކާރުކޮށްފައެވެ.

ނަމަވެސް، ފުލުހުންގެ ފަރާތުން ކޯޓަށް ހުށަހެޅި ހެކިތަކާއި ކަންހިނގާފައިވާ ގޮތުގެ މައްޗަށް ރިއާޔަތްކުރުމަށްފަހު، އެ ހަ މީހުން ވެސް ތަހުގީގު މަރުހަލާ ނިމެންދެން 30 ދުވަހުގެ މުއްދަތަށް ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ.

ޑްރަގް ކެފޭއެއް ހިންގި އެޕާޓްމެންޓުން ހައްޔަރުކުރި ހަ މީހުން 30 ދުވަހަށް ބަންދުކޮށްފި

ސިނަމާލެ ބްރިޖު ހައިވޭގައި ޑިއުޓީގައި ހުރި ފުލުސް އޮފިސަރެއްގެ ގައިގައި ސައިކަލުން ޖައްސައި އެކްސިޑެންޓްކުރި މައްސަލައިގައި ހައްޔަރުކުރި ހަތަރު މީހުން ވެސް މަސްތުވާތަކެއްޗަށް ޕޮޒިޓިވް ވެފައިވާކަން ކްރިމިނަލް ކޯޓުން ނެރުނު ބަންދު އަމުރުތަކުން ހާމަވެއްޖެއެވެ.

ރޭ ފަތިހުގެ ވަގުތެއްގައި ހިނގި މި ނުރައްކާތެރި ހާދިސާގައި ޑިއުޓީގައި ހުރި ފުލުސް މީހާއަށް ވަނީ ސީރިއަސް ބޮޑެތި އަނިޔާތަކެއް ލިބިފައެވެ. މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެންދިޔަ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ނެރުނު އަމުރުތަކުން އެނގޭ ގޮތުގައި، ސައިކަލު ދުއްވަން އިން މީހާއާއި އޭގެ ފަހަތުގައި އިން މީހާގެ އިތުރުން މި މައްސަލާގައި ހިމެނޭ އަނެއް ދެ މީހުން ވެސް ވަނީ މަސްތުވާތަކެއްޗަށް ޕޮޒިޓިވް ވެފައެވެ.

މި ހަތަރު މީހުންގެ ބަންދަށް ވެސް ކްރިމިނަލް ކޯޓުން ވަނީ 5 ދުވަހުގެ މުއްދަތެއް ދީފައެވެ. ކޯޓު އަމުރުގައި ބަޔާންކޮށްފައިވާ ގޮތުގައި މި މީހުން ކުރު މުއްދަތަކަށް ބަންދުކުރަން އަމުރުކުރީ، އެ އެންމެން ވެސް ގާނޫނީ ވަކީލެއްގެ އެހީތެރިކަން ހޯދުމުގެ ފުރުސަތަކަށް އެދިފައިވާތީއެވެ.

މި ހާދިސާއާ ގުޅިގެން ކޮމިޝަނަރ އޮފް ޕޮލިސް އަޙްމަދު މުޙައްމަދު ނެރުއްވި ބަޔާނެއްގައި ވިދާޅުވީ، މިއީ ފުލުހުންގެ ގާނޫނީ ވާޖިބަށް ހުރަސްއަޅައި، ފުލުހުން ފަހަތަށް ޖެއްސުމަށްޓަކައި ބަޔަކު ގަސްދުގައި ހިންގި ނުރައްކާތެރި އަމަލެއް ކަމަށް ބެލެވޭ ކަމަށެވެ. އަދި މި އަމަލު ހަރުކަށި އިބާރާތުން ކުށްވެރިކުރައްވާ ކަމަށް ވެސް ސީޕީ ވިދާޅުވިއެވެ.

ސީޕީ އިތުރަށް ވިދާޅުވީ، މި ހާދިސާގައި އަނިޔާވި ފުލުސް އޮފިސަރުގެ އަނގަމަތި ފަޅައިގެން ގޮސް ދަތްތައް ބިނދި، ބޮޑެތި އަނިޔާތަކެއް ލިބިފައިވާ ކަމަށެވެ. މިއީ މަގުމަތީގައި ނުރައްކާތެރިކޮށް އުޅަނދު ދުއްވާ ފަރާތްތަކާ ދެކޮޅަށް ފުލުހުން ފަށާފައިވާ ހާއްސަ އޮޕަރޭޝަން ހުއްޓުވައި، ފުލުހުން ނަފްސާނީ ގޮތުން ބަލިކަށިކޮށްލުމަށް ބަޔަކު ރާވައިގެން ހިންގި އަމަލެއް ކަމަށް ބެލެވޭ ކަމަށް ވެސް ކޮމިޝަނަރު ފާހަގަކުރެއްވިއެވެ.

ފުލުހުން މައުލޫމާތު ދޭ ގޮތުގައި، މި ހާދިސާ ހިނގި ވަގުތު އެ ސަރަހައްދުގައި އިތުރު ތިން ސައިކަލެއް ވެސް ޝައްކުކުރެވޭ ގޮތަށް ހަރަކާތްތެރިވިކަން ވަނީ ފާހަގަކުރެވިފައެވެ.

މި ހާދިސާގައި އަނިޔާވި ފުލުސް އޮފިސަރަށް ހޮސްޕިޓަލުގައި ފަރުވާދެމުން އަންނައިރު، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޢަލީ އިޙްސާން ވަނީ ހޮސްޕިޓަލަށް ޒިޔާރަތްކުރައްވައި އެ އޮފިސަރުގެ ހާލު ބައްލަވާލައްވާފައެވެ. މި މައްސަލަ ފުލުހުން ދަނީ ވަރަށް ސީރިއަސް މައްސަލައެއްގެ ގޮތުގައި އިތުރަށް ތަހުގީގު ކުރަމުންނެވެ.

ފުލުހެއްގެ ގައިގައި ސައިކަލުން ޖެއްސި މައްސަލަ: ހައްޔަރުކުރި 4 މީހުން ވެސް މަސްތުވާތަކެއްޗަށް ޕޮޒިޓިވް

މިއަހަރު ނިމޭއިރު ޖުމްލަ 442 އޮޑިޓެއްގެ މަސައްކަތް އެއްކޮށް ނިންމައި، އާންމު ކުރެވޭނެ ކަމަށް އޮޑިޓަރ ޖެނެރަލްގެ އޮފީހުން ވިދާޅުވެއްޖެއެވެ.

އެ އޮފީހުން މިކަން ހާމަކުރެއްވީ، ރައްޔިތުންގެ މަޖިލީހަށް އަންނަ އަހަރަށް ލަފާކުރާ އެ އޮފީހުގެ ބަޖެޓު ހުށަހަޅުއްވައި، އޮފީހުން ކުރިއަށްގެންދާ މަސައްކަތްތަކާ ގުޅޭގޮތުން މަޖިލީހުގެ މާލިއްޔަތު ކޮމިޓީގެ މެންބަރުންނަށް މައުލޫމާތު ދެއްވަމުންނެވެ.

އޮޑިޓަރ ޖެނެރަލްގެ އޮފީހަކީ އޮޑިޓް ޤާނޫނުގެ ދަށުން އުފައްދާފައިވާ، ދައުލަތުގެ މާލީ ހިސާބުތަކާއި ވަސީލަތްތައް ބޭނުންކުރާ ގޮތް މިނިވަންކަމާއެކު އޮޑިޓްކޮށް ރައްޔިތުންގެ މަޖިލީހަށާއި ރައީސުލްޖުމްހޫރިއްޔާއަށް ރިޕޯޓްކޮށް އަދި ރައްޔިތުންނާ ހަމައަށް އެ މައުލޫމާތު ފޯރުކޮށްދިނުމުގެ ޤާނޫނީ ޒިންމާ އޮތް މުއައްސަސާއެވެ. މިގޮތުން ސަރުކާރުގެ ވުޒާރާތަކާއި، ކައުންސިލްތަކާއި، ސަރުކާރު ހިއްސާވާ ކުންފުނިތަކުގެ މާލީ ހިސާބުތަކާއި ކޮމްޕްލަޔަންސް އޮޑިޓްތަކުގެ އިތުރުން، ދައުލަތުގެ ފައިސާ އެންމެ އެކަށީގެންވާ ގޮތުގައި ބޭނުންކުރެވޭތޯ ބެލުމަށް ޕާފޯމަންސް އޮޑިޓްތައް ކުރިއަށްގެންދިއުމަކީވެސް އެ އޮފީހުގެ މައިގަނޑު މަސްއޫލިއްޔަތެކެވެ.

މި ޒިންމާތައް އަދާކުރުމުގެ ގޮތުން ކުރަމުންދާ މަސައްކަތްތަކުގެ ތަފްސީލު މާލިއްޔަތު ކޮމިޓީއާ ހިއްސާކުރައްވަމުން އޮޑިޓް އޮފީހުން ވިދާޅުވީ، މިއަހަރުގެ މިހާތަނަށް 183 އޮޑިޓެއްގެ މަސައްކަތް އެއްކޮށް ނިންމައި އާންމުކޮށްފައިވާ ކަމަށެވެ. މީގެ ތެރޭގައި ދައުލަތުގެ މުއައްސަސާތަކާއި، ސަރުކާރު ކުންފުނިތަކާއި، މާލީ އިދާރާތަކާ ގުޅުންހުރި މުހިންމު އޮޑިޓްތަކެއް ހިމެނެއެވެ.

މިހާތަނަށް ނިންމައި އާންމުކޮށްފައިވާ އޮޑިޓްތަކުގެ ތަފްސީލު:

އޮޑިޓަރ ޖެނެރަލްގެ އޮފީހުން ލަފާކުރައްވާ ގޮތުގައި މިއަހަރުގެ ޑިސެމްބަރު މަހުގެ ނިޔަލަށް އިތުރު 259 އޮޑިޓެއްގެ މަސައްކަތް އެއްކޮށް ނިންމާލެވޭނެއެވެ. މިއާއެކު މިއަހަރުގެ ތެރޭގައި ޖުމްލަ 442 އޮޑިޓު ނިންމައި އާންމުކުރެވޭނެ ކަމަށް އެ އޮފީހުން ވަނީ ފާހަގަކުރައްވާފައެވެ.

މީގެ އިތުރުން، މިހާރު ކުރިއަށްދާ އޮޑިޓުތަކުގެ ތެރެއިން 120 އޮޑިޓެއްގެ މަސައްކަތް ނިމޭނީ އަންނަ އަހަރު ކަމަށް ލަފާކުރެވޭއިރު، އެ އޮޑިޓުތަކާއެކު އަންނަ އަހަރުގެ ތެރޭގައި ޖުމްލަ 394 އޮޑިޓެއްގެ މަސައްކަތް ކުރުމަށް އަމާޒު ހިފާފައިވާ ކަމަށްވެސް އޮޑިޓަރ ޖެނެރަލްގެ އޮފީހުން މަޖިލީހުގެ ކޮމިޓީގައި ވިދާޅުވިއެވެ.

މިއަހަރު ނިމޭއިރު 442 އޮޑިޓް ނިންމައި، އާންމު ކުރެވޭނެ ކަމަށް އޮޑިޓަރ ޖެނެރަލްގެ އޮފީހުން ވިދާޅުވެއްޖެ

ދިވެހިރާއްޖޭގެ އިޤްތިޞާދީ ވުޒާރާއާއި ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން ކުރިއަށްގެންދާ "އުފެއްދުންތެރިކަމުގެ މައުރަޒު 2026" ގެ މާކެޓް ޕްލޭސް ޑިސްޓްރިކްޓުގައި މިއަހަރު 130 އަށްވުރެ ގިނަ ފަރާތުން ބައިވެރިވާކަމަށް ބީސީސީން ހާމަކޮށްފިއެވެ. މިއީ މިދިޔަ އަހަރާ އަޅާބަލާއިރު ވަރަށް ބޮޑު ކުރިއެރުމެކެވެ.

މި މަހުގެ 25 އިން ފެށިގެން އަންނަ މަހުގެ 2 ވަނަ ދުވަހުގެ ނިޔަލަށް ބޭއްވުމަށް ހަމަޖެހިފައިވާ މި މައުރަޒަކީ، ދިވެހި އުފެއްދުންތެރިންނާއި ކުދި އަދި މެދުފަންތީގެ ވިޔަފާރިތަކަށް އެ ފަރާތްތަކުގެ އުފެއްދުންތައް އިޝްތިހާރުކޮށް ވިއްކުމަށް ފުރުޞަތު ފަހިކޮށްދިނުމުގެ މަޤްޞަދުގައި ބާއްވާ ޚާއްޞަ މައުރަޒެކެވެ.

ބީސީސީން މަޢުލޫމާތު ދެއްވި ގޮތުގައި، މިދިޔަ އަހަރުގެ އެކްސްޕޯގައިވެސް ޢާންމުންގެ އެންމެ ބޮޑު ތަރުޙީބެއް ލިބިގެންދިޔައީ މާކެޓް ޕްލޭސް ޑިސްޓްރިކްޓަށެވެ. އަދި މިއަހަރުވެސް މި ޑިސްޓްރިކްޓަށް އޮތް ތަރުޙީބު ވަރަށް ބޮޑަށް އިތުރުވެފައިވާއިރު، މިދިޔަ އަހަރު މި ބައިގައި ބައިވެރިވި 100 ފަރާތުގެ ބަދަލުގައި މިއަހަރު 130 އަށްވުރެ ގިނަ ފަރާތުން ބައިވެރިވެއެވެ. ވިޔަފާރިތަކަށް ލުއިފަސޭހަކޮށްދިނުމުގެ ގޮތުން، މި އަހަރުގެ ސްޓޯލްތަކުގެ ޖާގަވެސް ވަނީ ތަނަވަސްކޮށްފައެވެ. އެގޮތުން މިދިޔަ އަހަރު ސްޓޯލްތަކުގެ ބޮޑުމިނަކީ 5 ފޫޓު 6 ފޫޓު ކަމުގައި ވިޔަސް، މިއަހަރުގެ ސްޓޯލްތަކުގެ ޖާގަ 8 ފޫޓު 8 ފޫޓަށް ވަނީ ބޮޑުކޮށްފައެވެ.

މާކެޓް ޕްލޭސް ޑިސްޓްރިކްޓަކީ މައިގަނޑު ގޮތެއްގައި ކުދި ވިޔަފާރިތަކަށް ޚާއްޞަ ސަރަޙައްދެކެވެ. މީގެ ތެރޭގައި ކާބޯތަކެތި ތައްޔާރުކުރާ ފަރާތްތަކާއި، އަތްތެރި މަސައްކަތް ނުވަތަ އާރޓް އެންޑް ކްރާފްޓްގެ ދާއިރާގައި ހަރަކާތްތެރިވާ ފަރާތްތައް ހިމެނެއެވެ. މީގެ އިތުރުން، މިއަހަރުގެ މާކެޓް ޕްލޭސްގެ ޚާއްޞަ އެއް ކަމަކީ ރާއްޖޭގެ ދެ ރަށަކުން ގެންނަ ދެ ގާޑިޔާ މި ސަރަޙައްދުގައި ބައިވެރިވުމެވެ. އެއީ ފުވައްމުލައް ސިޓީ އަދި ބ. އޭދަފުށިން ބައިވެރިވާ ދެ ގާޑިޔާއެވެ.

މިއަހަރުގެ އުފެއްދުންތެރިކަމުގެ މައުރަޒު ކުރީ އަހަރުތަކާ އަޅާބަލާއިރު ހުރިހާ ގޮތަކުންވެސް ތަފާތުވެފައި ފުރިހަމަވާނެކަމަށް ބީސީސީން ވިދާޅުވެއެވެ. އެގޮތުން، މިދިޔަ އަހަރުގެ މައުރަޒުގައި 240 އެގްޒިބިޓަރުން ބައިވެރިވި ނަމަވެސް، މިއަހަރުގެ މައުރަޒުގައި 780 އެގްޒިބިޓަރުން ބައިވެރިވެއެވެ. އަދި މިދިޔަ އަހަރު 2،400 އުފެއްދުން ބައިވެރިކޮށްފައިވާއިރު، މިއަހަރުގެ މައުރަޒުގައި ބައިވެރިކުރާ އުފެއްދުންތަކުގެ ޢަދަދު ވަނީ 4،800 އަށް އަރާފައެވެ.

މި މައުރަޒު ވެގެންދާނީ ދިވެހި އުފެއްދުންތެރިންގެ ހުނަރުވެރިކަން ދައްކާލުމަށާއި، ވިޔަފާރި ފުޅާކުރުމަށް ލިބިގެންދާނެ އަގުހުރި އަދި މުހިންމު ފުރުޞަތަކަށެވެ.

އުފެއްދުންތެރިކަމުގެ މައުރަޒު: މާކެޓް ޕްލޭސްގައި 130 އަށްވުރެ ގިނަ ވިޔަފާރި، 2 ގާޑިޔާ

ދިވެހިރާއްޖޭގެ ޚާރިޖީ ވަޒީރު އިރުތިޝާމް އާދަމް، މިސްރުގެ ޚާރިޖީ ވަޒީރު ބަދުރު ޢަބްދުލްޢާޠީއާ ބައްދަލުކުރައްވައިފިއެވެ.

މި ބައްދަލުކުރެއްވުން ކުރިއަށްދިޔައީ އިރާޤުގެ ވެރިރަށް ބަޣުދާދުގައި މިހާރު ކުރިއަށްދާ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ޚާރިޖީ ވަޒީރުންގެ ކައުންސިލްގެ 52 ވަނަ ބައްދަލުވުމުގެ ހަވާސާގައެވެ.

ޚާރިޖީ ވުޒާރާއިން މަޢުލޫމާތު ދެއްވި ގޮތުގައި، މި ބައްދަލުކުރެއްވުމުގައި ދެ ވަޒީރުން ވަނީ ރާއްޖެއާއި މިސްރާ ދެމެދު އޮތް ޒަމާންވީ އަޚުވަންތަ އަދި ގާތް ގުޅުމުގެ މައްޗަށް އަލިއަޅުއްވާލައްވާފައެވެ. އަދި ދެ ޤައުމުގެ ޒަމާންވީ ގުޅުން އިތުރަށް ހަރުދަނާކޮށް، ދެ ޤައުމުގެ މަސްލަހަތު ހިމެނޭ އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފައިވެއެވެ.

މި ބައްދަލުކުރެއްވުމާ ގުޅޭގޮތުން ޚާރިޖީ ވަޒީރު އިރުތިޝާމް އާދަމް ވިދާޅުވީ، ދެ ޤައުމުގެ ދެމެދުގައި އޮތް ގާތް ގުޅުން އިތުރަށް ބަދަހިކުރުމަށާއި، އެކި ދާއިރާތަކުން ގުޅިގެން މަސައްކަތްކުރުމަށް ރާއްޖެއިން ވަރަށް ބޮޑު އަހަންމިއްޔަތުކަމެއް ދެއްވާ ކަމަށެވެ.

"ދެޤައުމުގެ ދެމެދުގައި އޮތް ގާތް ގުޅުން އިތުރަށް ބަދަހިކުރުމަށާއި، އެކި ދާއިރާތަކުން ގުޅިގެން މަސައްކަތްކުރުމަށް ރާއްޖެއިން ވަރަށް ބޮޑު އަހަންމިއްޔަތުކަމެއް ދެއްވާކަން ވާނީ ހާމަކުރައްވާފައި. ރާއްޖެއާއި މިސްރާއި ދެމެދުގައި އޮތް ގާތް ގުޅުމުގެ އަގު ވަޒަންކުރައްވަން. އަދި ދެޤައުމުގެ ދެމެދުގައި މުހިންމު ކަންކަމުގައި އެއްބާރުލުން ދެއްވުމުގައި ދެމިތިބޭނަން،" ވަޒީރު އިރުތިޝާމް ވިދާޅުވިއެވެ.

ރާއްޖެއާއި މިސްރަކީ އިސްލާމީ އުންމަތުގެ މުހިންމު ދެ ޤައުމަށް ވާއިރު، ބައިނަލްއަޤުވާމީ މައިދާނުގައްޔާއި އިސްލާމީ ކަންކަމުގައި ދެ ޤައުމުން އަބަދުވެސް އަންނަނީ ގާތުން މަސައްކަތްކުރަމުންނެވެ.

ވަޒީރު އިރުތިޝާމް މިސްރުގެ ޚާރިޖީ ވަޒީރާ ބައްދަލުކުރައްވައިފި

ގެއްލިގެން ހޯދި ދިވެހި ފިރިހެނަކު ރޭގެ ވަގުތެއްގައި ފެނިފައިވާ ކަމަށް ފުލުހުން ހާމަކޮށްފިއެވެ.

ފުލުހުން ވިދާޅުވި ގޮތުގައި ރޭގެ ވަގުތެއްގައި ގެއްލިގެން ހޯދީ އުމުރުން 56 އަހަރުގެ ފިރިހެނެކެވެ. މި މީހާ ގެއްލިގެން އާއިލާގެ ފަރާތުން ފުލުހުންނަށް ރިޕޯޓްކޮށްފައިވަނީ ރޭ 22:06 ހާއިރެވެ.

އެ ރިޕޯޓާ ގުޅިގެން އޭނާ ހޯދުމުގެ މަސައްކަތް ފުލުހުން ވަގުތުން ފަށާފައިވާ ކަމަށް ފުލުހުން ވަނީ ވިދާޅުވެފައެވެ. ފުލުހުންނާއި އާއިލާ ގުޅިގެން ކުރި މަސައްކަތުން އޭނާ ފެނިފައިވަނީ ރޭގެ ވަގުތެއްގައެވެ. އަދި ފެނުނު އިރު އޭނާގެ ހާލު ރަނގަޅު ކަމަށްވެސް ފުލުހުން ވިދާޅުވިއެވެ.

މި ހާދިސާއާ ގުޅޭ އިތުރު ތަފުސީލެއް ފުލުހުން އަދި ހާމައެއް ނުކުރެއެވެ.

ގެއްލިގެން ހޯދި 56 އަހަރުގެ މީހާ ފެނިއްޖެ

ހުޅުމާލޭގައި ދުއްވާފައި ދިޔަ އެމްޓީސީސީގެ ޓެކްސީ ލައިންގެ ޓެކްސީއެއް މަގުގެ އަރިމަތީގައި ހުރި ހޮޅިދަނޑިއެއްގައި ޖެހި، އެ ކާރަށް ބޮޑެތި ގެއްލުންތަކެއް ލިބިއްޖެއެވެ.

މި އެކްސިޑެންޓު ހިނގާފައި ވަނީ ހުޅުމާލޭ ބަގީޗާ ހިނގުމުން ދުއްވާފައި ދިޔަ ކާރު ކޮންޓްރޯލުން ނެއްޓި، މަގުގެ އަރިމަތީގައި ހުރި ހޮޅިދަނޑިއަކަށް އަރައިގެންނެވެ.

ދިވެހި ފުލުހުންގެ ޚިދުމަތުން ވިދާޅުވި ގޮތުގައި، މި ހާދިސާ ހިނގައިގެން އެ އިދާރާއަށް ރިޕޯޓުކޮށްފައިވަނީ މިއަދު ފަތިހު ގާތްގަނޑަކަށް 04:33 ހާއިރެވެ. އެކްސިޑެންޓް ހިނގި ވަގުތު ކާރު ދުއްވަން އިނީ އުމުރުން 28 އަހަރުގެ ދިވެހި ފިރިހެނެކެވެ.

މި އެކްސިޑެންޓުގައި ކާރުގެ ކުރީކޮޅު އެއްކޮށް ފުނޑުފުނޑުވެ ބޮޑެތި ގެއްލުންތަކެއް ލިބިފައިވާއިރު، ކާރު ދުއްވަން އިން ޑްރައިވަރަށް ވެސް ވަނީ އެކިވަރުގެ އަނިޔާތައް ލިބިފައެވެ. ނަމަވެސް، އޭނާއަށް ފުރާނައަށް ނުރައްކާވާ ފަދަ ސީރިއަސް އަނިޔާއެއް ލިބިފައިނުވާ ކަމަށް ފުލުހުން ވަނީ ކަށަވަރުކޮށްދީފައެވެ.

މި ހާދިސާއާ ގުޅިގެން ފުލުހުން ވަނީ އެ އުޅަނދު ދުއްވި ޑްރައިވަރުގެ އެއްގަމު އުޅަނދު ދުއްވުމުގެ ލައިސަންސް މިހާރު ވަގުތީ ގޮތުން ހިފަހައްޓާފައެވެ. އަދި މި އެކްސިޑެންޓް ހިނގަން މެދުވެރިވި ސަބަބު ދެނެގަތުމަށްޓަކައި ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.