ތެލަސީމިއާ ސެންޓަރުގެ ޚިދުމަތްތައް އިތުރަށް ހަރުދަނާކޮށް ފުޅާކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، އަންނަ ޖޫން މަހުގެ ތެރޭގައި އެ ސެންޓަރުގައި މުޅިން އަލަށް ދިވެހި ހެމަޓޮލޮޖިސްޓެއްގެ ބެއްލެވުމުގެ ދަށުން ޚިދުމަތް ދޭން ފަށާނެކަން އިޢުލާންކޮށްފިއެވެ.

މިއަދު ފާހަގަކުރަމުންދާ ދުނިޔޭގެ ތެލަސީމިއާ ދުވަހާ ގުޅުވައިގެން، މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާޤް ހަލީމް ވިދާޅުވީ، އައިޖީއެމްއެޗްގެ އެހީތެރިކަމާއެކު ދިވެހި ހެމަޓޮލޮޖިސްޓެއްގެ ޚިދުމަތް ޖޫން މަހު ފެށުމަށް މިހާރު ވަނީ ޚާއްސަ ޑޮކްޓަރަކު ރެކްރޫޓްކޮށްފައި ކަމަށެވެ. މީގެ އިތުރުން، ހުޅުމާލެ ހޮސްޕިޓަލްގެ އެހީތެރިކަމާއެކު އެތެރެހަށީގެ ބަލިތަކަށް ޚާއްސަ އަދި ކުޑަކުދިންގެ ބަލިތަކަށް ޚާއްސަ އޮންކޯލް ޚިދުމަތް ކުރިއަށް އޮތް 10 ވަރަކަށް ދުވަހުގެ ތެރޭގައި ފެށޭނެ ކަމަށްވެސް އޭނާ ވިދާޅުވިއެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ތެލަސީމިއާ ކުދިންނަށް ދޭ އަހައްމިއްޔަތުކަން ފާހަގަކުރައްވަމުން ސީއީއޯ ވިދާޅުވީ، މިދިޔަ އަހަރުގެ މެއި މަހު ތެލަސީމިއާ ސެންޓަރު އޮރެންޖް ހިޔާއަށް ބަދަލުކޮށް، ޕޭޝަންޓް ކެއަރ ސެންޓަރެއް ގާއިމުކޮށްފައިވާ ކަމަށެވެ. އަދި ރައީސްގެ ވައުދުފުޅާ އެއްގޮތަށް މިއަހަރުގެ ޖަނަވަރީ މަހުން ފެށިގެން ތެލަސީމިއާ ކުދިންނަށް ޚާއްސަ އެލަވަންސެއް ދޭން ފަށާފައިވާއިރު، 32 އަހަރަށްފަހު ހުކުރު ދުވަހުވެސް ސެންޓަރުން ޚިދުމަތް ލިބޭނެ އިންތިޒާމް މިހާރު ވަނީ ހަމަޖައްސާފައެވެ.

ކުރިއަށް ހުރި މުހިންމު މަޝްރޫޢުތަކަށް އަލިއަޅުވާލައްވަމުން ހަލީމް ވިދާޅުވީ، ލޭގެ ރައްކާތެރިކަން ކަށަވަރުކުރުމަށް ހަދާ "ނެޓް" ޓެސްޓިންގ ޚިދުމަތް ޖުލައި މަހުގެ ކުރިން ފަށާނެ ކަމަށެވެ. މިއީ ރާއްޖޭގެ ސިއްހީ ދާއިރާގައި އެޅޭ ތާރީޚީ ފިޔަވަޅެއްގެ ގޮތުގައި އޭނާ ސިފަކުރެއްވިއެވެ. މީގެ އިތުރުން، ލިވަރ ފައިބްރޯސިސް ސްކޭންގެ ޚިދުމަތާއި، އަންހެނުންގެ ޚާއްސަ ބަލިތަކުގެ އޮންކޯލް ޚިދުމަތްވެސް މިއަހަރު ތެރޭގައި ތައާރަފްކުރުމަށް ވަނީ އަމާޒު ހިފާފައެވެ.

މިއަހަރުގެ މިހާތަނަށް 4 ތެލަސީމިއާ ކުދިން އުފަންވެފައިވާތީ، އެކަމާ ކަންބޮޑުވުން ފާޅުކުރައްވަމުން ސީއީއޯ ވިދާޅުވީ، ކައިވެނީގެ ކުރިން ދެވޭ ކައުންސިލިން ހިމެނޭހެން ހޭލުންތެރިކުރުވުމުގެ ޚާއްސަ ނިޒާމެއް މިއަހަރު ތައާރަފްކުރާނެ ކަމަށެވެ. އަދި ލޭ ހަދިޔާކުރާ ފަރާތްތަކުގެ ދަފްތަރު ޑިޖިޓަލައިޒްކުރުމުން، ލޭ ހޯދުމުގައާއި ހަދިޔާކުރުމުގައި ބޮޑެތި ފަސޭހަތަކެއް ލިބިގެންދާނެ ކަމަށްވެސް އޭނާ ވިދާޅުވިއެވެ.

އަންނަ ޖޫން މަހު ތެލަސީމިއާ ސެންޓަރުގައި މުޅިން އަލަށް ދިވެހި ހެމަޓޮލޮޖިސްޓެއްގެ ޚިދުމަތް ފަށަނީ

އާޖެންޓީނާގެ ކުރޫޒް ޝިޕެއްގައި ނުރައްކާތެރި "ހަންޓާވައިރަސް" ފެތުރި، ތިން މީހަކު މަރުވުމާ ގުޅިގެން، އެ ބަލި ފެތުރުން ހުއްޓުވުމަށް ކުރެވިދާނެ ކަންތައްތަކުގެ މަޢުލޫމާތު ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ) އިން ހާމަކޮށްފިއެވެ.

މިދިޔަ އޭޕްރީލް މަހުގެ 1 ވަނަ ދުވަހު އާޖެންޓީނާގެ "އެމް.ވީ ހޮންޑިއަސް" ނަމަކަށް ކިޔާ ކުރޫޒް ޝިޕަކުން މި ބަލި ޖެހިފައިވާ ކަމަށް ޝައްކުކުރެވޭ 8 ކޭސްއެއް ވަނީ ފެނިފައެވެ. އޭގެ ތެރެއިން ތިން ފަސިންޖަރަކު މަރުވެފައިވާއިރު، ބަލި ޖެހިފައިވާ މީހުންނާ ބައްދަލުވި އެހެން މީހުން ހޯދުމުގެ މަސައްކަތް ކަމާބެހޭ ފަރާތްތަކުން މިހާރު ދަނީ ކުރަމުންނެވެ.

ހަންޓާވައިރަސްއަކީ ޢާއްމުގޮތެއްގައި މީދަލުގެ ޒަރީޢާއިން ފެތުރޭ ބައްޔެކެވެ. ނަމަވެސް، މި އުޅަނދުން ފެނިފައިވާ "އެންޑީސް ވައިރަސް" ސްޓްރެއިންއަކީ އެކަކުން އަނެކަކަށް ފެތުރުމުގެ ފުރުސަތު އޮތް ވައިރަހެއްކަން ޑަބްލިއު.އެޗް.އޯ އިން ފާހަގަކުރެއެވެ. މިއީ ބަލިޖެހޭ މީހުންގެ ތެރެއިން 40 އިންސައްތަ މީހުން މަރުވުމުގެ ބިރު އޮތް ނުރައްކާތެރި ބައްޔެކެވެ. މި ބަލީގެ އަލާމާތްތައް ފެންނަން ފަށަނީ ވައިރަސް ހަށިގަނޑަށް ވަންނަތާ އެއް ހަފްތާއާއި އަށް ހަފްތާއާ ދެމެދުގެ މުއްދަތެއްގެ ތެރޭގައެވެ.

އާޖެންޓީނާގެ ސަރުކާރުން ބުނެފައިވާ ގޮތުގައި، މި ބަލި ފެތުރެން މެދުވެރިވީ އުޅަނދަށް އެރުމުގެ ކުރިން އުޝުއައިއާގައި ބޭއްވި ދޫނި ބަލާލުމުގެ ދަތުރެއްގައި ބައިވެރިވި ދެ ފަސިންޖަރެއްގެ ފަރާތުން ކަމަށް ބެލެވެއެވެ.

ބަލިން ރައްކާތެރިވުމަށް ޑަބްލިއު.އެޗް.އޯ އިން ދީފައިވާ އިރުޝާދުތައް:

މާޔޯ ކްލިނިކުން ހާމަކޮށްފައިވާ ގޮތުގައި، މި ބަލީގެ އަލާމާތްތަކުގެ ތެރޭގައި ވަރުބަލިވުން، ހުންއައުން، މަސްތަކުގައި ރިއްސުން، ބޯއެނބުރުން، ހީކެރުވުން، މޭނުބައިކުރުން، ހޮޑުލުން، ބޭރަށްހިންގުން، ކެއްސުން އަދި ނޭވާލާން އުނދަގޫވުން ހިމެނެއެވެ.

ކޮވިޑް-19 ގެ ބަލިމަޑުކަމަށްފަހު، މިފަދަ އާ ބަލިތައް ފެތުރެން ފެށުމަކީ ދުނިޔޭގެ ސިއްހީ މާހިރުން އިންތިހާއަށް ކަންބޮޑުވުން ފާޅުކުރާ ކަމެކެވެ. އެހެންކަމުން، ބަލިން ރައްކާތެރިވުމަށް ސިއްހީ އިދާރާތަކުން ދޭ އިރުޝާދުތަކަށް ފުރިހަމައަށް ސަމާލުވުމަށް ޑަބްލިއު.އެޗް.އޯ އިން ވަނީ އިލްތިމާސްކޮށްފައެވެ.

ހަންޓާވައިރަސް އިން ރައްކާތެރިވުމަށް ޑަބްލިއު.އެޗް.އޯ އިން އިރުޝާދު ދީފި

ރާއްޖޭގައި މި ދުވަސްވަރު އިންފްލުއެންޒާ ފެތުރޭ މިންވަރު ވަރަށް ބޮޑަށް އިތުރުވަމުންދާތީ، ކުރިއަށް އޮތް ބޮޑު އީދު ބަންދުގެ ކުރިން ބަލިން ރައްކާތެރިވުމަށް ވެކްސިން ޖެހުމަށް އެތެރެހަށީގެ ޚާއްޞަ ޑޮކްޓަރު މުޙައްމަދު އަލީ އިލްތިމާސްކުރައްވައިފިއެވެ.

ޑރ. މުޙައްމަދު އަލީ މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، މި ދުވަސްވަރު އިންފްލުއެންޒާ ޖެހޭ މިންވަރު ވަރަށް ބޮޑުތަނުން އިތުރުވެފައިވާ ކަމަށެވެ. އެގޮތުން އީދު ބަންދުގެ ދެ ހަފުތާ ކުރިން އިންފްލުއެންޒާ ވެކްސިން ޖެހުމަކީ މުހިއްމު ކަމެއް ކަމަށް އޭނާ ފާހަގަކުރެއްވިއެވެ. މިގޮތަށް އިލްތިމާސް ކުރެއްވީ ވެކްސިން ޖެހުމަށްފަހު ހަށިގަނޑުގައި އެއަށް ދިފާޢީ ބާރު އުފެދި، މަސައްކަތް ކުރަން ފެށުމަށް ގާތްގަނޑަކަށް ދެ ހަފުތާގެ މުއްދަތެއް ނަގާނެތީއެވެ.

އިންފްލުއެންޒާ އަކީ ވައިރަހަކުން ޖެހޭ ބައްޔެކެވެ. މީގެ ތެރޭގައި މައިގަނޑު ގޮތެއްގައި 'އޭ'، 'ބީ' އަދި 'ސީ' ވައިރަސް ހިމެނެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވެސް ވަނީ މާލެ ސަރަހައްދުގައި އިންފްލުއެންޒާ އާއި އަރިދަފުސް ރޯގާ އިތުރުވަމުން އަންނާތީ، މިފަދަ ބަލިތަކުން ރައްކާތެރިވުމަށް ޚާއްޞަ ސަމާލުކަމެއް ދިނުމަށް އެދިފައެވެ.

އަރިދަފުސް ރޯގާ އަދި ނޭވާލާ ނިޒާމަށް ޖެހޭ ބަލިތަކުން ރައްކާތެރިވުމަށްޓަކައި އަންނަނިވި ފިޔަވަޅުތައް އެޅުމަށް ސިއްހީ މާހިރުން ލަފާދެއްވައެވެ:

އީދު ބަންދަކީ ގިނަ ބަޔަކު އެއްވެ އުޅޭ އަދި ދަތުރުފަތުރުކޮށް އުޅޭ ދުވަސްވަރަކަށް ވާތީ، ބަލިން ރައްކާތެރިވުމުގެ ގޮތުން ކުރިއާލާ ފިޔަވަޅު އެޅުމަކީ ބަލި ފެތުރުން ކުޑަކުރުމަށް އެޅޭނެ މުހިއްމު ފިޔަވަޅެކެވެ.

އިންފްލުއެންޒާ އިތުރުވަމުންދާތީ އީދު ބަންދުގެ ކުރިން ވެކްސިން ޖެހުމަށް އިލްތިމާސްކޮށްފި

މިއަހަރުގެ ބަރަކާތްތެރި ޙައްޖުގެ އަޅުކަމަށް ރާއްޖެއިން ދާ ޙައްޖުވެރިންގެ އިންތިޒާމުތައް ބަލަހައްޓާ ރާއްޖޭގެ ޙައްޖު މިޝަންގެ ޓީމު މިއަދު ސަޢުދީ އަރަބިއްޔާއަށް ފުރައިފިއެވެ.

ޖުމްލަ 10 މެންބަރުންގެ މައްޗަށް އެކުލެވޭ މި މިޝަންގެ މައިގަނޑު މަގުސަދަކީ، ދިވެހި ޙައްޖުވެރިން ސަޢުދީއަށް ދިއުމުގެ ކުރިން ފުރިހަމަ ކުރަންޖެހޭ އެންމެހާ ކަންކަން ބަލައި، އިންތިޒާމުތައް ހަމަޖެހިފައިވާކަން ކަށަވަރު ކުރުމެވެ. އެގޮތުން މައްކާގައި ޙައްޖުވެރިން ތިބޭނެ ހޮޓާތަކާއި، ޙައްޖުގެ މަޝާޢިރުތަކާއި، ދަތުރުފަތުރާއި، ކެއިންބުއިމުގެ އިތުރުން ސިއްޙީ އެންމެހާ އިންތިޒާމުތައް ހުރީ ސަޢުދީ ޙައްޖު މިނިސްޓްރީގެ މިންގަނޑުތަކާ އެއްގޮތަށްތޯ މި ޓީމުން ބަލައި ޔަގީންކުރާނެއެވެ.

ޙައްޖު މޫސުމާ ދިމާކޮށް މައްކާގައި ގާއިމުކުރާ ދިވެހި ޙައްޖުވެރިންގެ ކަންކަމާ ބެހޭ އޮފީހުގެ ވެރިޔަކަށް މިއަހަރު ހަމަޖައްސަވާފައިވަނީ މޯލްޑިވްސް ޒަކާތު ހައުސްގެ ޑިރެކްޓަރ ޖެނަރަލް، އައްޝައިޚް އިމްތިޠާއު ޢައްބާސްއެވެ. މިއޮފީހަކީ ކޮންމެ އަހަރަކުވެސް ޙައްޖުގެ އިންތިޒާމުތައް ވިލަރެސްކޮށް ބެލެހެއްޓުމަށްޓަކައި ޙައްޖު މިޝަންގެ ދަށުން މައްކާގައި ހިންގާ އޮފީހެކެވެ.

މީގެ އިތުރުން، މިއަހަރުގެ ޙައްޖުގެ އަޅުކަމުގައި ރާއްޖޭގެ ފަރާތުން އިސް ޝައިޚެއްގެ ގޮތުގައި ބައިވެރިވެވަޑައިގަންނަވާނީ އިސްލާމީ ފަތުވާދޭ އެންމެ މަތީ މަޖިލީހުގެ މެންބަރު ޑރ. އިލްޔާސް ޙުސައިންއެވެ.

ރާއްޖެއިން މިއަހަރު ޙައްޖަށްދާ ފުރަތަމަ ގްރޫޕް ފުރުމަށް ހަމަޖެހިފައިވަނީ މި މަހުގެ 15 ވަނަ ދުވަހުއެވެ. ސަރުކާރުން އަމާޒު ހިފާފައިވަނީ މިއަހަރުގެ ޙައްޖުގެ ކަންކަން ވީހާވެސް އޮމާންކަމާއެކު ކުރިއަށް ގެންގޮސް، ޙައްޖުވެރިންނަށް ލުއިފަސޭހަ އިންތިޒާމުތަކެއް ހަމަޖައްސައިދިނުމަށެވެ.

ރާއްޖެއިން ދާ ޙައްޖުވެރިންގެ އިންތިޒާމުތައް ބަލަހައްޓާ ރާއްޖޭގެ ޙައްޖު މިޝަންގެ ޓީމު މިއަދު ސަޢުދީ އަރަބިއްޔާއަށް ފުރައިފި

މޯލްޑިވިއަން ބްލަޑް ސާވިސަސްގައި ލޭ ރައްކާކުރާ އައިސް އަލަމާރިއަކަށް މިދިޔަ އާދިއްތަ ދުވަހުގެ ރޭ ދިމާވި ޓެކްނިކަލް މައްސަލައަކާ ގުޅިގެން، ބައެއް މީހުންގެ ގަޔަށް އެޅި ލޭ ޕެކެޓުތަކަކީ ކުނިވެފައިވާ ނުވަތަ ތަޣައްޔަރުވެފައިވާ ލޭ ނޫންކަން ސިއްހީ ގޮތުން ޔަގީންވާ ކަމަށް އެ އިދާރާއިން ހާމަކޮށްފިއެވެ. ތެލެސީމިއާ ބަލި މީހުންތަކެއްގެ ގަޔަށް ކުނި ލޭ އެޅި ކަމަށް ބުނެ ބައެއް މީޑިއާތަކުން ރިޕޯޓު ކުރަމުންދާތީ، އެކަން ހިނގައިދިޔަ ގޮތް ސާފުކޮށްދިނުމަށް ބްލަޑް ސާވިސަސް އިން ވަނީ ބަޔާނެއް ނެރެފައެވެ.

އެ ބަޔާނުގައި ބުނެފައިވާ ގޮތުގައި، މި ހާދިސާ ހިނގާފައިވަނީ މިދިޔަ އާދިއްތަ ދުވަހު ހިދުމަތްދީ ނިންމައި މަރުކަޒު ބަންދުކުރި ފަހުންނެވެ. ލޭގެ ރައްކާތެރިކަން ކަށަވަރު ކުރުމަށް ހަދާ ސިއްހީ ތަހުލީލްތަކާއި ކްރޮސް މެޗު ހަދައި، ރަނގަޅު މިންގަނޑެއްގައި ހުރިކަން ކަށަވަރުވުމުން ލޭ ރައްކާކުރާ ފްރީޒަރު ނަންބަރު 2 ގައި ލޭ ބަހައްޓާފައި ވަނިކޮށް އެ ފްރީޒަރަށް ޓެކްނިކަލް މައްސަލައެއް ދިމާވީއެވެ.

މި މައްސަލަ ފާހަގަވީ އެ ރޭ 10:11 ހާއިރު ފްރީޒަރުގެ ޓެމްޕަރޭޗާ މޮނީޓާ ކުރާ އެލާޓް ސިސްޓަމުން މެސެޖުތަކެއް ލިބެން ފެށުމުންނެވެ. އެލާޓް ލިބުމާއެކު ކަނޑައެޅިފައިވާ ވަގުތުގެ ތެރޭގައި ތިން މުވައްޒަފަކު އެ ތަނަށް ހާޒިރުވެ، ޖުމުލަ 12 ލޭ ޕެކެޓެއް ސްޓޭންޑްބައި ފްރީޒަރަކަށް ވަނީ ބަދަލުކޮށްފައެވެ. ނަމަވެސް އޭގެ ތެރެއިން ތިން ޕެކެޓެއް މީހުންގެ ގަޔަށް ވަނީ އެޅިފައެވެ.

ބްލަޑް ސާވިސަސް އިން ބުނީ ޖެހިގެން އައި ދުވަހު ހުޅުމާލެ ހޮސްޕިޓަލްގެ ކޮލިޓީ އިންޝުއަރެންސް ޓީމާ ގުޅިގެން ފްރީޒަރުގެ އޮޓޮމޭޓަޑް ރިކޯޑުތަކާއި މެންޑޭޓަރީ ޗެކުތައް ފުރިހަމަކޮށްފައިވާ ކަމަށެވެ. އާންމުކޮށް 2-6 ޑިގްރީގައި ހުންނަންޖެހޭ ފްރީޒަރުގެ ފިނިހޫނުމިން 11 ޑިގްރީއަށް މައްޗަށް ގޮސްފައިވާކަން ފާހަގަވި ނަމަވެސް، ސިއްހީ މިންގަނޑުތަކުން އެނގޭ ގޮތުގައި 10 ޑިގްރީއަށް ވުރެ މަތިނުވާ ގޮތަށް ހަތަރު ގަޑިއިރު ވަންދެން ލޭ ޕެކެޓުތައް ރައްކާތެރިކަމާއެކު ބެހެއްޓޭނެއެވެ.

"އެހެންކަމުން މުވައްޒަފުން ފްރީޒަރު ކައިރިއަށް ހާޒިރުވުމަށް ހޭދަވި ވަގުތާއި ސިސްޓަމްގެ ލޮގުތަކަށް ބަލާއިރު، އެއީ ބޭނުންނުކުރެވޭ ވަރަށް ކުނިވެފައިވާ ލޭ ނޫންކަން ޔަގީންކުރެވޭ"

 ކަމަށް ބްލަޑް ސާވިސަސްގެ ބަޔާނުގައި ބުނެފައިވެއެވެ. މި ހާދިސާއާ ގުޅިގެން ލޭ އެޅި ތިން މީހުންގެ ހާލަތުވެސް އެ އިދާރާއިން އަންނަނީ މޮނީޓާ ކުރަމުންނެވެ.

ކުނިވެފައިވާ ލޭ ނޭޅޭކަން ސިއްހީ ގޮތުން ޔަގީންވޭ: ބްލަޑް ސާވިސް

ހުޅުމާލޭގެ ދެވަނަ ފިޔަވަހީގައި ދިރިއުޅޭ އާބާދީ އިތުރުވަމުންދާތީ، އެ ސަރަޙައްދުގައި ދިރިއުޅޭ ރައްޔިތުންނަށް ނަމާދުކުރުމުގައި ދިމާވާ ދަތިތަކަށް ލުޔެއް ހޯދައިދިނުމުގެ ގޮތުން ވިނަރެސް ފްލެޓްތައް ހިމެނޭ ސަރަޙައްދުގައި ބިނާކުރާ އާ މިސްކިތުގެ 60 އިންސައްތަ މަސައްކަތް ނިމިފައިވާކަން އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ހާމަކޮށްފިއެވެ.

މިސްކިތުގެ މަސައްކަތް ކުރިއަށްދާ ގޮތުގެ ތަފްޞީލު ހާމަކުރަމުން އިސްލާމީ ކަންތައްތަކާ ބެހޭ ވުޒާރާއިން މީސްމީޑިއާގެ މަންސަ 'އެކްސް' ގައި ބުނެފައިވަނީ، ޖުމްލަ 1،095 މީހުންގެ ޖާގައިގެ މި މިސްކިތުގެ ބޮޑުބައެއް މިހާރު ވަނީ ނިމުމަކާ ގާތްވެފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މިސްކިތްތައް ބިނާކުރުމަށް ދެއްވާ ޚާއްޞަ އިސްކަމުގެ ދަށުން ކުރިއަށްދާ މި މަޝްރޫޢަކީ ހުޅުމާލޭގެ ދެވަނަ ފިޔަވަހީގައި އިތުރުވަމުންދާ އާބާދީއަށް ބޭނުންވާ ދީނީ ޚިދުމަތްތައް ފޯރުކޮށްދިނުމަށް އެޅޭ މުހިންމު ފިޔަވަޅެކެވެ.

ހުޅުމާލޭ ދެވަނަ ފިޔަވަހީގައި މީހުން އާބާދުވާ ނިސްބަތް ހަލުވިކަމާ އެކު އިތުރުވަމުންދާއިރު، މިވަގުތު އެ ސަރަޙައްދުގައި އާންމުން ނަމާދުކުރުމަށް ބޭނުންކުރަމުން ދަނީ ދާއިމީ ތިން މިސްކިތަކާއި ވަގުތީ ދެ މިސްކިތެކެވެ. ވިނަރެސް ސަރަޙައްދުގައި ބިނާކުރާ މި އާ މިސްކިތާއެކު، ނަމާދުކުރުމަށް އޮތް ޖާގައިގެ ދަތިކަމަށް ބޮޑު ހައްލެއް ލިބިގެންދާނެ ކަމަށް އެ ވުޒާރާއިން ބުނެއެވެ.

މީގެ އިތުރުން، މުޅި ރާއްޖޭގައި އިސްލާމީ ވަޙްދަތު ވަރުގަދަކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، މިއަހަރުގެ ބަޖެޓުގައި ހިމަނައިގެން އަތޮޅުތެރޭގެ 10 ރަށެއްގައި އިސްލާމީ މަރުކަޒުތައް ބިނާކުރުމުގެ އަމަލީ މަސައްކަތް ފެށުމަށް ވެސް އިސްލާމީ ކަންތައްތަކާ ބެހޭ ވުޒާރާއިން ދަނީ ތައްޔާރުވަމުންނެވެ.

ހަމައެހެންމެ، މާލެ ސަރަޙައްދުގައި ހުރި ބާވެފައިވާ މިސްކިތްތައް ތަޅާލުމަށްފަހު، އެ ތަންތަނުގައި ޒަމާނީ ފެންވަރުގެ އާ މިސްކިތްތައް އިމާރާތްކުރުމުގެ ޚާއްޞަ މަޝްރޫޢުތަކެއް ވެސް ސަރުކާރުން މިހާރު ދަނީ ބާރުސްޕީޑުގައި ހިންގަމުންނެވެ.

ވިނަރެސް ފްލެޓް ސަރަޙައްދުގައި ބިނާކުރާ މިސްކިތުގެ 60 އިންސައްތަ ނިންމައިފި

ރާއްޖޭގެ ބާޒާރުން ލިބެން ހުރި ބޭސްތަކުގެ ތަފުސީލު އޮންލައިންކޮށް ފަސޭހައިން ބެލޭނެ ޑިޖިޓަލް ނިޒާމެއް ގާއިމުކުރުމުގެ މަސައްކަތް ކުރަމުން އަންނަ ކަމަށް، ސަރުކާރުގެ ބޭސް ކުންފުނި، "ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން" ގެ މެނޭޖިން ޑިރެކްޓަރު ޑރ. ޝާހު މާހިރު މިރޭ ވިދާޅުވެއްޖެއެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން ޑރ. ޝާހު ވިދާޅުވީ، ބޭހަށް ރާއްޖޭން އެތައް ރުފިޔާއެއް ޚަރަދުކުރާއިރު، ބޭސް ނުލިބުމުގެ މައްސަލައަށް ދާއިމީ ހައްލެއް ލިބެންޖެހޭ ކަމަށެވެ. މިގޮތުން، ރާއްޖޭގައި ހުރި ބޭހުގެ މައުލޫމާތުތައް ފަސޭހައިން ލިބޭނެ ޑިޖިޓަލް ސިސްޓަމެއް އޮތުން މުހިންމު ކަމަށާއި، އެފަދަ ސިސްޓަމެއް ތައާރަފުކުރުމުގެ މަސައްކަތް މިހާރު ކުރަމުންދާ ކަމަށް އޭނާ ވިދާޅުވިއެވެ.

"އެ ސިސްޓަމް އައީމަ އަޅުގަނޑުމެނަށް އިނގޭނެ ރާއްޖޭގައި ހުރީ ކޮން ބޭހެއްތޯ. ކޮން ކުއަންޓިޓީއެއްގައިތޯ ހުރީ. ކޮން ފާމަސީއެއްގައިތޯ ހުރީ،" ޑރ. ޝާހު ވިދާޅުވިއެވެ.

ޑރ. ޝާހު އިތުރަށް ފާހަގަކުރެއްވި ގޮތުގައި، މިހާރު ބޭނުންކުރާ ނިޒާމުގެ ތެރެއިން ރާއްޖޭން ލިބެން ހުރި ބޭހުގެ ތަފުސީލުތައް ޑޮކްޓަރުންނަށް ވެސް ފެންނާކަށް ނުހުރެއެވެ. ނަމަވެސް އަލަށް އުފައްދާ ސިސްޓަމާއެކު ޑޮކްޓަރުންނަށް ވެސް ބޭސް ހުރިތޯ ބަލައިލުމަށް ފަސޭހަވެގެންދާނެއެވެ.

ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން އުފައްދާފައިވަނީ މިދިޔަ އަހަރުގެ ސެޕްޓެމްބަރު މަހުގައެވެ. ނަމަވެސް އެ ކުންފުނިން ރާއްޖެއަށް ބޭސް އެތެރެކުރަން ފަށާފައިވަނީ ކުންފުނި އުފެއްދިތާ ހަ މަސް ފަހުން، މިދިޔަ މަހުގެ ތެރޭގައެވެ. ބޭސް ނުލިބުމުގެ ޝަކުވާތައް އާންމުންގެ ތެރޭގައި އިތުރުވަމުންދާތީ، އެ ކުންފުނިން ވަނީ ބޭސް ހޯދުން ފަސޭހަކުރުމަށްޓަކައި މިހާރު ޚާއްސަ ޕޯޓަލަކާއި ހޮޓްލައިނެއް ވެސް ތައާރަފުކޮށްފައެވެ.

ބޭހުގެ މައުލޫމާތު އެނގޭނެ މިފަދަ ޒަމާނީ ނިޒާމެއް ގާއިމުވުމުން، އާންމުންނަށް ބޭސް ހޯދުމުގައި ދިމާވާ ދަތިތަކަށް ބޮޑު ލުޔެއް ލިބިގެންދާނެ ކަމަށް އެ ކުންފުނިން އުންމީދު ކުރެއެވެ.

ރާއްޖޭން ލިބެން ހުރި ބޭހުގެ މައުލޫމާތު އޮންލައިންކޮށް ބެލޭނެ ނިޒާމެއް ގާއިމުކުރަނީ

އިއްޔެ ބޭއްވުނު ލޯކަލް ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން، ރައްޔިތުންގެ ޚިޔާލުހޯދުމުގެ އާންމު ވޯޓާ ގުޅިގެން ކުރިއަށް އޮތް ދެ ދުވަހު ސަރުކާރު ބަންދުކުރުމަށް ނިންމުމާ ގުޅިގެން، މާލެ ސަރަހައްދުގެ މައި ތިން ހޮސްޕިޓަލެއްގެ ސްޕެޝަލިސްޓް އޯޕީޑީގެ ޚިދުމަތްތައް މާދަމާ ބަންދުވާނެކަން އިިއުލާންކޮށްފިއެވެ.

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން މިއަދު ނެރުނު ބަޔާނެއްގައި ބުނެފައިވަނީ، ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވާ އޭޕްރީލް 5 އަދި 6 ގެ ތެރެއިން، 6 އޭޕްރީލް 2026 ވާ ހޯމަ ދުވަހު ދަރުމަވަންތަ ހޮސްޕިޓަލާއި، އައިޖީއެމްއެޗް އަދި ވިލިމާލެ ހޮސްޕިޓަލްގެ ސްޕެޝަލިސްޓް އޯޕީޑީގެ ޚިދުމަތްތަކާއި އެހެނިހެން ކްލިނިކަލް ޚިދުމަތްތައް މެދުކަނޑާލެވޭނެ ކަމަށެވެ.

ނަމަވެސް، މި ދެ ދުވަހުވެސް ހޮސްޕިޓަލްތަކުން ދެމުންގެންދާ އެޑްމިޓްކޮށްގެން ފަރުވާދޭ އައިޕީޑީ ޚިދުމަތްތަކާއި، ކުއްލި ފަރުވާގެ ނުވަތަ އިމަޖެންސީ ޚިދުމަތްތައް އެއްވެސް މެދުކެނޑުމެއް ނެތި 24 ގަޑިއިރު ކުރިއަށްދާނެ ކަމަށް އެ ހޮސްޕިޓަލުން މައުލޫމާތު ދެއެވެ.

މި ނިންމުމަކީ އިންތިޚާބާ ގުޅުންހުރި މަސައްކަތްތަކަށް ސަރުކާރުން ދެއްވި ބަންދު ދުވަސްތަކާ ގުޅިގެން، އިދާރީ އިންތިޒާމުތައް ހަމަޖެއްސުމަށް ނިންމި ނިންމުމެކެވެ. އާންމު ހިދުމަތްތަކަށް ބަދަލު އައި ނަމަވެސް، ބަލިމީހުންނަށް ދޭންޖެހޭ ކުއްލި ފަރުވާގެ ކަންކަން ފުރިހަމައަށް ހަމަޖެހިފައިވާނެ ކަމަށް ސިއްހީ ޚިދުމަތްދޭ އިދާރާތަކުން ކަށަވަރުކޮށްދެއެވެ.

ސަރުކާރު ބަންދުވުމާއި ގުޅިގެން 6 ވަނަ ދުވަހު ތިން ހޮސްޕިޓަލެއްގެ ސްޕެޝަލިސްޓް އޯޕީޑީ ބަންދު

ލައިފްސްޓައިލް

ކުރިއަށް އޮތް އަޟްޙާ ޢީދު ދުވަހުގެ ހެނދުނު މާލެ ސަރަހައްދުގެ ބޮޑު ޖަމާޢަތްތަކުގައި އިމާމުވެ ނަމާދުކުރައްވާނެ ބޭފުޅުން އިސްލާމީ ކަންތައްތަކާއި އައުޤާފާ ބެހޭ ވުޒާރާއިން މިއަދު އިޢުލާން ކުރައްވައިފިއެވެ.

އެ ވުޒާރާއިން ހާމަކުރައްވާފައިވާ ގޮތުގައި، މި އަހަރުގެ އަޟްޙާ ޢީދު ނަމާދު މާލެ ސަރަހައްދުގެ ހަތަރު މައިދާނެއްގައި ބޭއްވުމަށް ވަނީ ހަމަޖެހިފައެވެ. މިގޮތުން މާލޭގެ މާފަންނު ސްޓޭޑިއަމްގައި އޮންނަ ބޮޑު ޖަމާޢަތުގައި އިމާމުވެ ނަމާދުކުރައްވާނީ އައްޝައިޚް ޢަބްދުﷲ ސަޢުދާނެވެ. 

ވިލިމާލޭގެ ފުޓުބޯޅަ ދަނޑުގައި އަލްޤާރީ އަޙްމަދު ރިޔާޟް ނަމާދުކުރައްވާއިރު، ހުޅުމާލޭގެ ފުރަތަމަ ފިޔަވަހީގައި ހުންނަ ސިންތެޓިކް ޓްރެކްގައި ނަމާދުކުރައްވާނީ އައްޝައިޚް ނަޞްރުﷲ ޢަލީއެވެ. އަދި ހުޅުމާލޭގެ ދެވަނަ ފިޔަވަހީގެ ކުޅިވަރު އެކުވެނީގައި އޮންނަ ޖަމާޢަތުގެ ޚަތީބަކީ ޒުވާން އިމާމު އަލްޙާފިޡް މުޙައްމަދު ޙަނޫން ޙުސައިންނެވެ.

މައިދާންތަކުގެ އިތުރުން، މާލޭގެ ބޮޑު ދެ މިސްކިތެއްގައިވެސް ޢީދު ނަމާދުގެ ބޮޑު ޖަމާޢަތް އޮންނާނެއެވެ. އެގޮތުން އިސްލާމީ މަރުކަޒުގައި ޢީދު ނަމާދުކުރައްވާނީ އިސް އިމާމު އައްޝައިޚް މުޙައްމަދު ލަތީފެވެ. އަދި މަސްޖިދުލްމަލިކި ސަލްމާންގައި ޢީދު ނަމާދު ކުރައްވާނީ އައްޝައިޚް އިބްރާހީމް ރަޝީދު ޙަސަނެވެ.

އިސްލާމީ ކަންތައްތަކާ ބެހޭ ވުޒާރާއިން މަޢުލޫމާތު ދެއްވާ ގޮތުގައި، ޢީދު ނަމާދުގެ ޖަމާޢަތް ފެށުމަށް ހަމަޖެހިފައިވަނީ ޢީދު ދުވަހުގެ ހެނދުނު 7:00 ގައެވެ. އަދި މޫސުން ގޯސްވެ ވިއްސާރަވުމުގެ ސަބަބުން ހުސް މައިދާންތަކުގައި ނަމާދުކުރެވޭގޮތް ނުވެއްޖެ ހާލަތެއްގައި، މާލެއާއި ވިލިމާލެ އަދި ހުޅުމާލޭގައި ހުކުރު ކުރާ ހުރިހާ މިސްކިތެއްގައި ވެސް ޢީދު ނަމާދުކުރުން ކުރިއަށްދާނެ ކަމަށް އެ ވުޒާރާއިން ވިދާޅުވެއެވެ.

ކަލަންޑަރުގައިވާ ގޮތުން މި އަހަރުގެ އަޟްޙާ ޢީދު ދުވަހަކީ މި ހިނގާ ޖޫން މަހުގެ 27 ވާ ބުރާސްފަތި ދުވަހެވެ. ޢީދު ނަމާދުގެ ބޮޑު ޖަމާޢަތްތަކަށް ތައްޔާރުވުމުގެ މަސައްކަތް ކަމާބެހޭ އިދާރާތަކުން މިހާރު ދަނީ ކުރަމުންނެވެ.