ދުނިޔޭގެ ހިތުގެ ދުވަސް ފާހަގަކުރުމުގެ ގޮތުން، ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ސިއްހީ ދާއިރާގައި ހަރަކާތްތެރިވާ ގިނަ މުއައްސަސާތަކާއި މަދަނީ ޖަމްޢިއްޔާތަކެއް ގުޅިގެން ހުޅުމާލޭގައި ޚާއްޞަ ހަރަކާތްތަކެއް ކުރިއަށް ގެންގޮސްފިއެވެ. މި ހަރަކާތްތައް ބާއްވާފައިވަނީ ހުޅުމާލެ ފޭސް 2 ގެ ރުއްގަނޑު 3 ސަރަޙައްދުގައެވެ.

"ޑޯންޓް މިސް އަ ބީޓް" މި ޝިޢާރުގެ ދަށުން ބޭއްވި މި ހަރަކާތުގެ މައިގަނޑު މަޤްޞަދަކީ ހިތުގެ ދުޅަހެޔޮކަން ރައްކާތެރިކުރުމުގެ މުހިންމުކަން ހަނދާންކޮށްދިނުމާއި، ހިތާއި ލޭނާރުގެ ބަލިތަކާމެދު އާންމު ރައްޔިތުންގެ މެދުގައި ހޭލުންތެރިކަން އިތުރުކުރުމެވެ.

މި އިވެންޓް ޝަރަފުވެރިކޮށްދެއްވީ މިނިސްޓަރ އޮފް ހެލްތު، ފެމިލީ އެންޑް ވެލްފެއާ، ޢީލާ ޢަލީގެ އިތުރުން ދުނިޔޭގެ ޞިއްޙަތު ޖަމްޢިއްޔާ (ޑަބްލިއުއެޗްއޯ) އިން ދިވެހިރާއްޖެއަށް ކަނޑައަޅުއްވާފައި ހުންނަވާ މަންދޫބު މިސް ޕޭޑެންއެވެ.

މި ހަރަކާތް ކާމިޔާބުކަމާއެކު ކުރިއަށް ގެންދިއުމުގައި ސިއްހީ އަދި އިޖުތިމާޢީ ގިނަ ފަރާތްތަކެއް ވަނީ ބައިވެރިވެފައެވެ. އޭގެ ތެރޭގައި ހައުސިންގ އެންޑް ޑިވެލޮޕްމަންޓް ކޯޕަރޭޝަން (އެޗްޑީސީ)، ޓައިނީ ހާޓްސް އޮފް މޯލްޑިވްސް، ނޭޝަނަލް ސެންޓަރ ފޯ ކާޑިއޯވެސްކިއުލާ ސައިންސަސް (އެންސީސީއެސް)، އަދި ހުޅުމާލެ ހޮސްޕިޓަލް ހިމެނެއެވެ.

މީގެއިތުރުން، މޯލްޑިވިއަން ރެޑް ކްރެސެންޓް، އާބަން ޕްރައިމަރީ ހެލްތު ކެއާ ސެންޓަރ، މޯލްޑިވިއަން ފިޒިއޮތެރަޕީ އެސޯސިއޭޝަން، ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސަސް އަދި ނޭޝަނަލް ޑައިއެބީޓީސް ސެންޓަރުން ވެސް މި ހަރަކާތުގައި ޢަމަލީގޮތުން ބައިވެރިވެ، އާންމުންނަށް މުހިންމު މަޢުލޫމާތާއި ޚިދުމަތްތައް ފޯރުކޮށްދީފައިވެއެވެ.

ދުނިޔޭގެ ހިތުގެ ދުވަސް ފާހަގަކުރުމަށް ހުޅުމާލޭގައި ޚާއްޞަ ހަރަކާތްތަކެއް ބާއްވައިފި

ދުންފަތުގެ އިސްތިއުމާލު ކުރުމަކީ ސިއްހަތަށް ނުރައްކާތެރި، އެތައް ގެއްލުންތަކެއް ލިބޭ ކަމެއްކަން އެންމެނަށްވެސް އެނގެއެވެ. ނަމަވެސް، ސައިންސްވެރިންގެ ހޯދުންތައް ދައްކާ ގޮތުގައި އަޅުގަނޑުމެން ބޭނުންކުރާ ސެންޓަކީ ދުންފަތުގެ އިސްތިއުމާލު ކުރުމަށްވުރެ ވެސް ހަށިގަނޑަށް ވިހަ މާއްދާތައް އިތުރުވާނެ އެއްޗެކެވެ. މީގެއިތުރުން، މާލީ ގޮތުން ބެލި ކަމުގައި ވިޔަސް، އާންމުކޮށް ސިގިރޭޓަށް ކުރާ ހޭދައަށްވުރެ ސެންޓަށް ކުރާ ހޭދަ ތިންގުނަ ބޮޑެވެ. މިއަދު އަޅުގަނޑުމެންގެ މުޖުތަމައުގައި މީހަކަށް ހަދިޔާއެއް ދޭން ބުންޔަސް މި ބުނެވެނީ ސެންޓުފުޅިއެއް ދިނުމަށެވެ. ނަމަވެސް މިއީ ފަނިފަކުސަ މަރާ ބޭސް ފުޅިއެއް ހަދިޔާކުރުން ފަދަ ނުރައްކާތެރި ކަމެކެވެ. މިއީ ވާހަކަ މާބޮޑުކޮށްލުމެއް ނޫނެވެ. މިއީ މިކަމުގެ ސަބަބުން ސިއްހަތަށް ލިބޭ ނުރައްކާތެރި ގެއްލުންތަކާމެދު މުޖުތަމައު ހޭލުންތެރިކުރުމަށްޓަކައި ދައްކަން ޖެހިފައިވާ މުހިންމު ވާހަކައެކެވެ.

ސައިންސްވެރިން ހާމަކުރާ ގޮތުގައި ސެންޓު އުފެއްދުމުގެ ސިނާއަތުގައި ހާމަ ނުކުރާ ތިންހާހަށްވުރެ ގިނަ ކެމިކަލް މާއްދާތައް ބޭނުންކުރެއެވެ. އޭގެ ތެރޭގައި ހަށިގަނޑަށް އިންތިހާއަށް ނުރައްކާތެރި 'ހެވީ މެޓަލް' ވެސް ހިމެނެއެވެ. ސައިންސްވެރިންނާއި ސިއްހީ މާހިރުން ސިފަކުރާ ގޮތުގައި، މިފަދަ ސެންޓުތައް ބޭނުންކުރުމަކީ ހަށިގަނޑަށް 'ޕެސްޓިސައިޑް' ނުވަތަ ފަނިފަކުސަ މަރާ ބޭސް ޖެހުން ފަދަ ނުރައްކާތެރި ކަމެކެވެ. މިފަދަ އުފެއްދުންތައް އުފައްދައި މާކެޓްކުރުމުގައި ހަރުދަނާ ގަވާއިދުތަކެއް އެކަށައެޅިފައި ނެތުމުގެ ސަބަބުން، ކުންފުނިތަކުން އެމީހުން ބޭނުންވާ ކޮންމެ މާއްދާއެއް އެއްވެސް ހުރަހެއްނެތި ބޭނުންކުރުމުގެ ފުރުސަތު ވަނީ ހުޅުވިފައެވެ.

މީގެ ސަބަބުން ސިއްހަތަށް ކުރާ ނޭދެވޭ އަސަރުތައް އާންމުކޮށް މީހުންނަށް ވަޒަން ނުކުރެވުނު ނަމަވެސް، ސެންޓު ބޭނުންކުރުމުން ބޮލުގެ އެއްފަޅީގައި ރިއްސުމާއި (މައިގްރޭން)، އަދި ނޭވާ ހިއްލުމުގެ އުނދަގޫތައް ކުރިމަތިވެއެވެ. މިއަދު ސެންޓަށް އެލާޖިކްވާ މީހުންގެ އަދަދު ދުވަހެއް ދުވަހަކަށް އިތުރުވަމުން ދަނީ ވެސް މި ސަބަބާ ހުރެއެވެ. މީގެއިތުރުން ދާއިމީ އެކި ބަލިތައް އިތުރަށް ގޯސްވުމަށް ވެސް މެދުވެރިވެއެވެ. ހަމައެއާއެކު، ބައެއް މީހުން ސިއްހަތަށް ފައިދާހުރި ރަނގަޅު ކާނާ ކައި، ގަވާއިދުން ކަސްރަތު ކުރި ނަމަވެސް ބަރުދަން ލުއިނުވެގެން އުޅެނީ މި ސަބަބާ ހުރެއެވެ. ކޮންމެ ދުވަހަކު ސެންޓު ބޭނުންކުރުމުގެ ސަބަބުން، ހަށިގަނޑުގެ ވިހަ މާއްދާތައް ސާފުކޮށްދޭ މައިގަނޑު ގުނަވަން ކަމުގައިވާ ފުރަމޭއަށް ބާރުބޮޑުވެ، އޭގެ ގުދުރަތީ މަސައްކަތަށް ތަކުރާރުކޮށް ހުރަސްއެޅެއެވެ.

ސައިންސްވެރިންގެ ތަހުލީލުތަކުން ދައްކާ ގޮތުގައި ބައެއް ސެންޓުތަކުގެ ތެރޭގައި ސިއްހަތަށް ނުރައްކާތެރި 'ސިންތެޓިކް މަސްކް' ފަދަ މާއްދާތައް އެކުލެވިގެންވެއެވެ. ސެންޓަކީ ހަމައެކަނި އަޅުގަނޑުމެންގެ ހެދުމުގައި ނުވަތަ ހަންގަނޑުގައި ޖަހާ އެއްޗެއް ކަމުގައި ވިޔަސް، އެއިން ނުކުންނަ ވަސް ނޭވާލާ ނިޒާމުގެ ތެރެއަށް ދިއުމަކީ ސިއްހަތަށް ކުރިމަތިވާ އެންމެ ބޮޑު އެއް ނުރައްކަލެވެ. ވުމާއެކު، މީރުވަސް ދުއްވުމުގެ ނަމުގައި އަޅުގަނޑުމެންގެ ހަށިގަނޑަށް އެތެރެކުރެވޭ މިފަދަ ނުރައްކާތެރި ވިހަ ކެމިކަލްތަކާމެދު ފުންކޮށް ވިސްނައި، ސެންޓު ބޭނުންކުރުމުގައި މިހާރަށްވުރެ ބޮޑަށް ސަމާލުވެ، ހޭލުންތެރިވާން ޖެހެއެވެ.

ދުންފަތުގެ އިސްތިއުމާލު ކުރުމަށްވުރެ ސެންޓުން ލިބޭ ގެއްލުން މާބޮޑު

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަތޮޅުތަކުގައި ގާއިމުކުރަމުންދާ އައުޓްޑޯ ޖިމްތަކުގެ ތެރެއިން ހަތް ރަށެއްގެ ޖިމްގެ މަސައްކަތް އެއްކޮށް ނިންމާލައިފިއެވެ.

އެޗްޑީސީން މައުލޫމާތު ދެއްވި ގޮތުގައި މި މަޝްރޫޢަކީ ނެޝަނަލް ފިޓްނަސް ޕްލޭނާ އެއްގޮތަށް، ރާއްޖޭގެ މީހުން ދިރިއުޅޭ ހުރިހާ ރަށެއްގައި އައުޓްޑޯ ޖިމް ގާއިމްކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ރިޔާސީ ވަޢުދުފުޅު ފުއްދެވުމަށް އެހީތެރިވެދިނުމުގެ ގޮތުން ކުރިއަށްގެންދާ މަސައްކަތެކެވެ. އެ ކުންފުނިން ވިދާޅުވީ ޙަވާލުކުރެވުނު ޖިމްތަކުގެ ތެރެއިން މިހާރު ނުނިމި ހުރި ރަށްރަށުގެ މަސައްކަތްތައް ވެސް ތާވަލާ އެއްގޮތަށް ނިންމުމަށް މަސައްކަތް ކުރަމުންދާ ކަމަށެވެ.

ރައްޔިތުންގެ މެދުގައި ކަސްރަތު ކުރުމުގެ ޝައުގުވެރިކަން އިތުރުކޮށް، ދުޅަހެޔޮ މުޖުތަމަޢެއް ބިނާކުރުމުގެ މަގުސަދުގައި ސަރުކާރުން ކުރިއަށްގެންދާ މި މަޝްރޫއުގެ ދަށުން، ގާއިމުކުރާ ޖިމްތަކުގައި ހުންނާނީ ފެންވަރު ރަނގަޅު ޒަމާނީ އިކުއިޕްމަންޓްތަކެއް ކަމަށް އެޗްޑީސީން ހާމަކުރެއެވެ.

އެޗްޑީސީން ޖިމް ހަދައި ނިންމާލި 7 ރަށަކީ:

އެޗްޑީސީން އިތުރަށް ވިދާޅުވީ އެ ކުންފުނީގެ އަމާޒަކީ އިޖުތިމާޢީ ޒިންމާ (ސީއެސްއާރު) ގެ ދަށުން، ދިވެހި މުޖުތަމަޢަށް ފައިދާހުރި މިފަދަ އިތުރު މަޝްރޫޢުތައް ކުރިއަށް އޮތް ތަނުގައިވެސް ހިންގުން ކަމަށެވެ. އަދި އެ ކުންފުނިން މިހާރު ވެސް ރައްޔިތުންނަށް ފައިދާވާނެ ގިނަ ސީއެސްއާރު ޕްރޮގްރާމްތަކާއި ޕްރޮޖެކްޓްތައް ހިންގަމުން އަންނަކަން އެޗްޑީސީން ފާހަގަކުރެއެވެ.

އެޗްޑީސީން ހަތް ރަށެއްގެ އައުޓްޑޯ ޖިމްގެ މަސައްކަތް ނިންމާލައިފި

މަދީނާ އިސްލާމިކް ޔުނިވާސިޓީން އިންތިޒާމުކޮށްގެން ބާއްވާ ބައިނަލްއަޤްވާމީ ޚާއްސަ ކޮންފަރެންސެއްގައި ބައިވެރިވެވަޑައިގަތުމަށްޓަކައި، ދިވެހިރާއްޖޭގެ އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ސަޢުދީ ޢަރަބިއްޔާއަށް ފުރާވަޑައިގެންފިއެވެ.

މަދީނާ އިސްލާމިކް ޔުނިވާސިޓީން އިސްނަގައިގެން ބާއްވާ މި ކޮންފަރެންސަކީ "އެފޯޓްސް އޮފް ދަ ކިންގްޑަމް އޮފް ސަޢުދީ ޢަރަބިއްޔާ އިން ކޮންފްރޮންޓިން އިންޓެލެކްޗުއަލް ޑިވިއޭޝަން" މި ނަމުގައި ކުރިއަށްގެންދާ މުހިންމު ކޮންފަރެންސެކެވެ. މި ބައްދަލުވުމުގެ މައިގަނޑު މަޤްޞަދަކީ ފިކުރީ ގޮތުން އަންނަ ހައްދުފަހަނައެޅުމާއި ކަތިފިޔަވަޅުތަކާ ދެކޮޅަށް ސަޢުދީ ޢަރަބިއްޔާއިން ކުރަމުންދާ މަސައްކަތްތަކާއި، އިސްލާމީ އުއްމަތުގެ ފިކުރީ ރައްކާތެރިކަން ދެމެހެއްޓުމަށް އަޅަމުންދާ ފިޔަވަޅުތަކާ ބެހޭގޮތުން މަޝްވަރާކޮށް ހޭލުންތެރިކަން އިތުރުކުރުމެވެ.

މި ކޮންފަރެންސްގެ ތެރެއިން ބާއްވާ ޚާއްސަ ސެޝަނެއްގައި އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ތަޤްރީރު ކުރެއްވުމަށް ވަނީ ހަމަޖެހިފައެވެ. ވަޒީރުގެ މި ދަތުރުފުޅަކީ ދެ ޤައުމުގެ ދެމެދުގައި އޮތް ދީނީ އަދި ޢިލްމީ ގުޅުން އިތުރަށް ބަދަހިކުރުމަށާއި، އިސްލާމީ މެދުމިން ފިކުރު ފެތުރުމަށް ކުރެވޭ މަސައްކަތްތަކަށް ލިބިގެންދާނެ މުހިންމު ކުރިއެރުމެކެވެ.

މަދީނާ އިސްލާމިކް ޔުނިވާސިޓީގެ ޚާއްސަ ކޮންފަރެންސެއްގައި ބައިވެރިވެވަޑައިގަތުމަށް ވަޒީރު ޑރ. ޝަހީމް ސަޢުދީ ޢަރަބިއްޔާއަށް ފުރާވަޑައިގެންފި

ކީރިތި ޤުރުއާން ކިޔެވުމުގެ 38 ވަނަ ޤައުމީ މުބާރާތް ނިންމުމުގެ ގޮތުން ބޭއްވި ޚާއްޞަ ރަސްމިއްޔާތު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު ޝަރަފުވެރިކޮށްދެއްވައި، މުބާރާތުން އެކި ވަނަތައް ހާސިލުކުރި ބައިވެރިންނަށް އިނާމު ޙަވާލުކޮށްދެއްވައިފިއެވެ.

އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި މި ރަސްމިއްޔާތުގައި، ޖުމްލަ 138 ބައިވެރިން ވާދަކުރި މި މުބާރާތުގެ އެކި ގޮފިތަކުން ވަނަތައް ހޯދި ފަރާތްތަކަށް ވަނީ އަގުބޮޑު އަދި ޝަރަފުވެރި އިނާމުތަކެއް ދެއްވާފައެވެ. އެގޮތުން، މުޅި މުބާރާތުން ބަލައިގެން ކިޔެވުމުގެ ގޮފިންނާއި، ނުބަލާ ކިޔެވުމުގެ ގޮފިން އަދި ޙާފިޘުންގެ ގޮފިން 1 ވަނަ ހާސިލުކުރި ބައިވެރިންނަށް އިނާމު ޙަވާލުކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.

މި ތިން ގޮފިން 1 ވަނަ ހޯދި ފަރާތްތަކަށް ރައީސުލްޖުމްހޫރިއްޔާގެ ޚާއްޞަ ހަނދާނީ ފިލައާއި، އެމަނިކުފާނު ދެއްވާ 1 ލައްކަ ރުފިޔާގެ ފައިސާގެ އިނާމުގެ އިތުރުން، ބޭނުން ދާއިރާއަކުން ޕީ.އެޗް.ޑީއަށް ކިޔެވުމަށް ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕް ޙަވާލުކޮށްދެއްވިއެވެ. މީގެއިތުރުން ކީރިތި ޤުރުއާނާބެހޭ ޤައުމީ މަރުކަޒާއި ދީނީ ކަންކަމަށް އެހީވާ ވަޤުފު ފަންޑު ހިމެނޭހެން އިސްލާމީ ކަންތައްތަކާއި އަވްޤާފާ ބެހޭ ވުޒާރާއިން ދެއްވާ ފައިސާގެ އިނާމާއި، މޯލްޑިވްސް ޙައްޖު ކޯޕަރޭޝަން ލިމިޓަޑުން ހުށަހެޅި ޢުމްރާ ދަތުރާއި ޓްރޮފީވެސް މި ބައިވެރިންނާ ޙަވާލުކޮށްދެއްވީ ރައީސުލްޖުމްހޫރިއްޔާއެވެ. އިނާމު ދެއްވުމަށްފަހު އެމަނިކުފާނު ވަނީ ވަނަތައް ހޯދި ބައިވެރިންނާއެކު ހަނދާނީ ފޮޓޯފުޅެއް ނަންގަވާފައެވެ.

މުޅި މުބާރާތުން ބަލައިގެން ކިޔެވުމުގެ ގޮފިންނާއި، ނުބަލާ ކިޔެވުމުގެ ގޮފިން އަދި ޙާފިޘުންގެ ގޮފިން 2 ވަނަ އަދި 3 ވަނަ ހާސިލުކުރި ބައިވެރިންނަށް އިނާމު ޙަވާލުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.

މީގެ ކުރިން މުއައްސަސާތައް ތަމްސީލުކޮށްގެން އެކަނި ބައިވެރިވެވޭ ގޮތަށް އޮތް މި މުބާރާތް މިފަހަރު ބާއްވާފައިވަނީ ބައިވެރިވާން ބޭނުންވި ކޮންމެ މީހަކަށްވެސް ފަރުދީ ގޮތުން ބައިވެރިވެ، އޮޑިޝަން ބުރުގައި ވާދަކުރެވޭ އުސޫލުންނެވެ. ސެމީ ފައިނަލް އަދި ފައިނަލް ބުރަކާއެކު ކުރިއަށްދިޔަ މި މުބާރާތުގެ ހުރިހާ އިދާރީ ކަމެއް ޑިޖިޓަލައިޒްކޮށްފައިވާއިރު، ޤަވާއިދަށް ގެނައި ބަދަލުތަކާއެކު ސެމީ ފައިނަލް އަދި ފައިނަލް ބުރުގެ ކިޔެވުންތަކަށް އިންސާފުކުރުމަށް އެކުލަވާލި ދެ ޕެނަލްގައިވެސް ބައިނަލްއަޤުވާމީ ފެންވަރުގެ ފަނޑިޔާރުން ވަނީ ބައިވެރިވެވަޑައިގެންފައެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަމާ ޙަވާލުވެވަޑައިގެންނެވި ދުވަހުން ފެށިގެން، ރާއްޖޭގައި ޤުރުއާނުގެ ޢިލްމު ފުޅާކޮށް ދިރުވުމަށް ޚާއްޞަ އިސްކަމެއް ދެއްވަމުން ގެންދަވައެވެ. މިގޮތުން ޤައުމީ ޤުރުއާން މުބާރާތަކީ ސީދާ ދައުލަތުގެ ބަޖެޓުން ޚަރަދުކުރެވިގެން ރާއްޖޭގައި ބޭއްވޭ އެންމެ ޝަރަފުވެރި އަދި އެންމެ އަގުބޮޑު އިނާމުތައް ދެވޭ މުބާރާތުގެ ގޮތުގައި ވަނީ ހަމަޖައްސަވާފައެވެ.

މީގެއިތުރުންވެސް، ރައީސް ޑރ. މުޢިއްޒުގެ ޒަޢާމަތުގައި އިސްލާމީ ތަޢުލީމާއި ޤުރުއާނުގެ ޢިލްމު ކުރިއެރުވުމަށް ގިނަގުނަ މަސައްކަތްތަކެއް ކުރެވެމުންދެއެވެ. އޭގެ ތެރޭގައި ޙާފިޡުންނަށް ދައުލަތުން ދޭ ޢިނާޔަތް ދެގުނައަށް ބޮޑުކުރެއްވުމާއި، ކީރިތި ޤުރްއާނާބެހޭ ޤައުމީ މަރުކަޒުގެ ދައުރު ފުޅާކޮށް، އަތޮޅުތަކުގައި ޤުރްއާން ކިޔަވައިދިނުމުގެ ފުރުޞަތުތައް ތަނަވަސްކޮށްދިނުން ފަދަ މުހިންމު ކަންކަން ހިމެނެއެވެ.

ކީރިތި ޤުރުއާން ކިޔެވުމުގެ 38 ވަނަ ޤައުމީ މުބާރާތް ނިންމުމުގެ ރަސްމިއްޔާތު ރައީސުލްޖުމްހޫރިއްޔާގެ ދެކަނބަލުން ޝަރަފުވެރިކޮށްދެއްވައިފި

މިނިސްޓްރީ އޮފް ޔޫތް އެމްޕަވަރމަންޓް ސްޕޯޓްސް އެންޑް ފިޓްނަސް އިން އިސްނަގައިގެން ކުރިއަށްގެންދާ "ހަށިހެޔޮ ރާއްޖެ" ޕްރޮގްރާމް، ލ. ގަމު ކައުންސިލާއި އެ ރަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީ (އ.ތ.މ) ގުޅިގެން އެ ރަށުގައި ކާމިޔާބުކަމާއެކު ބާއްވައިފިއެވެ.

މި ޕްރޮގްރާމަކީ ރައްޔިތުންގެ މެދުގައި ދުޅަހެޔޮ ދިރިއުޅުމުގެ އާދަތައް އަށަގަންނުވައި، ޖިސްމާނީ ދުޅަހެޔޮކަން އިތުރުކުރުމުގެ އިތުރުން އިޖުތިމާޢީ އެކި ހަރަކާތްތަކުގައި އަންހެނުންގެ ބައިވެރިވުން އިތުރުކުރުމުގެ މަޤްޞަދުގައި ކުރިއަށް ގެންދިޔަ ޕްރޮގްރާމެކެވެ. ލ. ގަމުގައި ކުރިއަށްދިޔަ މި ހަރަކާތުގައި ތަފާތު އެކި އުމުރުފުރާގެ ޖުމްލަ 110 އަންހެނުން ވަނީ ބައިވެރިވެފައެވެ.

ދުޅަހެޔޮ ޞިއްޙަތަކަށް މަގުފަހިވާނެ ފަދަ ތަފާތު ގިނަ ކަސްރަތުތަކާއި ފިޓްނަސް ހަރަކާތްތައް ހިމަނައިގެން ކުރިއަށް ގެންދިޔަ މި ޕްރޮގްރާމްގެ ސަބަބުން، ދުޅަހެޔޮ އާދަކާދަތައް ދެމެހެއްޓުމަށާއި، ދުވަހުން ދުވަހަށް ގަވާއިދުން ކަސްރަތު ކުރުމުގެ މުހިންމުކަން ބައިވެރިންނަށް ވަނީ އޮޅުންފިލުވައިދީފައެވެ. އަދި މިކަމުގެ ސަބަބުން ކަސްރަތު ކުރުމަށް ބައިވެރިންނަށް އިތުރު ހިތްވަރަކާއި ޖޯޝެއް ލިބިގެންދިޔަ ކަމަށް މައުލޫމާތު ލިބެއެވެ.

މިނިސްޓްރީ އޮފް ޔޫތް އެމްޕަވަރމަންޓް ސްޕޯޓްސް އެންޑް ފިޓްނަސް އިން ހާމަކޮށްފައިވާ ގޮތުގައި، ލ. ގަމުގައި ބޭއްވުނު މި ޕްރޮގްރާމަކީ މިއަހަރުގެ މިހާތަނަށް ރާއްޖޭގެ އެކި ރަށްރަށުގައި ހިންގުނު މިފަދަ 28 ވަނަ "ހަށިހެޔޮ ރާއްޖެ" ޕްރޮގްރާމެވެ.

މިއީ މުޅި ރާއްޖޭގައި މުޖުތަމަޢު ބައިވެރިވާ ޞިއްޙީ އަދި ދުޅަހެޔޮކަމުގެ ހަރަކާތްތައް ފުޅާކޮށް، ދުޅަހެޔޮ މުޖުތަމަޢެއް ބިނާކުރުމަށްޓަކައި އެ މިނިސްޓްރީން ގެންގުޅޭ ދެމެހެއްޓެނިވި ސިޔާސަތުގެ ދަށުން ރަށްރަށުގެ ކައުންސިލްތަކާއި ގުޅިގެން ސިލްސިލާކޮށް ކުރިއަށް ގެންދާ ހަރަކާތެކެވެ.

ލ. ގަމުގައި "ހަށިހެޔޮ ރާއްޖެ" ޕްރޮގްރާމް ކާމިޔާބުކަމާއެކު ކުރިއަށް ގެންގޮސްފި

ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ރައްކާތެރިކުރުމާ ގުޅޭ ބައިނަލްއަޤްވާމީ މުޢާހަދާގެ އިޚްތިޔާރީ ޕްރޮޓޮކޯލް ކަމަށްވާ "އޮޕްޝަނަލް ޕްރޮޓޮކޯލް ޓު ދަ ކޮންވެންޝަން އޮން ދަ ރައިޓްސް އޮފް ޕަރސަންސް ވިތް ޑިސްއެބިލިޓީ" ގައި ދިވެހިރާއްޖެއިން ބައިވެރިވުމަށް ވަޒީރުންގެ މަޖިލީހުން ނިންމަވައިފިއެވެ.

ވަޒީރުންގެ މަޖިލީހުން މިގޮތަށް ނިންމެވީ މި ހިނގާ އޮކްޓޫބަރު މަހުގެ 20 ވީ އާދިއްތަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވެވި ވަޒީރުންގެ މަޖިލީހުގެ ބައްދަލުވުމުގައެވެ. މި ބައްދަލުވުމުގައި މި ނިންމެވުން ނިންމަވާފައިވަނީ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން (ހެލްތު، ފެމިލީ އެންޑް ވެލްފެއަރ) ވަޒީރުންގެ މަޖިލީހަށް ހުށަހެޅުއްވި ކަރުދާހަށް ވަޒީރުންގެ މެދުގައި ފުޅާ ދާއިރާއެއްގައި މަޝްވަރާކުރެއްވުމަށް ފަހުގައެވެ.

މިފަދަ ބައިނަލްއަޤްވާމީ މުޢާހަދާތަކާއި ޕްރޮޓޮކޯލްތަކުގައި ބައިވެރިވުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 93 ވަނަ މާއްދާގެ (ހ) ގެ ދަށުން ރައްޔިތުންގެ މަޖިލީހުގެ ރުހުން ހޯދަންޖެހޭ ކަމަކަށްވާތީ، ރައްޔިތުންގެ މަޖިލީހުގެ ރުހުން ހޯދުމަށްޓަކައި އެ މައްސަލަ މަޖިލީހަށް ހުށަހެޅުއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ނިންމަވާފައެވެ.

"އޮޕްޝަނަލް ޕްރޮޓޮކޯލް ޓު ދަ ކޮންވެންޝަން އޮން ދަ ރައިޓްސް އޮފް ޕަރސަންސް ވިތް ޑިސްއެބިލިޓީ" އަކީ 5 އެޕްރީލް 2010 ގައި ދިވެހިރާއްޖެއިން ތަޞްދީޤުކޮށްފައިވާ "ކޮންވެންޝަން އޮން ދަ ރައިޓްސް އޮފް ޕަރސަންސް ވިތް ޑިސްއެބިލިޓީސް" މުޢާހަދާއިން ޚާއްޞަ އެހީތެރިކަމަށް ބޭނުންވާ ފަރާތްތަކަށް ކަށަވަރުކޮށްދޭ ޙައްޤުތައް އިތުރަށް ހަރުދަނާކޮށް، އެ މުޢާހަދާ ފުރިހަމައަށް ތަންފީޒުކުރުމުގައި ބައިނަލްއަޤްވާމީ ފެންވަރުގައި މެންބަރު ޤައުމުތައް ޒިންމާދާރުކުރެވޭނެ ނިޒާމެއް ޤާއިމުކުރުމުގެ މަޤްޞަދުގައި އެކުލަވާލާފައިވާ މުހިންމު ޕްރޮޓޮކޯލެކެވެ.

މި ޕްރޮޓޮކޯލަކީ މައި މުޢާހަދާ ތަޞްދީޤުކޮށްފައިވާ ޤައުމުތަކަށް އިޚްތިޔާރީ ގޮތެއްގައި ބައިވެރިވެވޭ ގޮތަށް އޮންނަ ޕްރޮޓޮކޯލެކެވެ. ރާއްޖެއިން 2010 ވަނަ އަހަރު މައި މުޢާހަދާ ތަޞްދީޤުކުރި ނަމަވެސް، މިހާތަނަށް މި އޮޕްޝަނަލް ޕްރޮޓޮކޯލްގައި ބައިވެރިވެފައެއް ނުވެއެވެ. ނަމަވެސް، އިންސާނީ ޙައްޤުތަކާ ގުޅޭ ބައިނަލްއަޤްވާމީ އެކި ނިޒާމުތަކުގެ ދަށުން ރާއްޖޭގެ ޙާލަތު ރިވިއުކުރި އެކި ފަހަރުމަތިން، މި ޕްރޮޓޮކޯލް ވީއެންމެ އަވަހަކަށް ތަޞްދީޤުކުރުމަށް ރާއްޖެއަށް ގިނަ ރެކޮމެންޑޭޝަންތަކެއް ވަނީ ލިބިފައެވެ.

މި އޮޕްޝަނަލް ޕްރޮޓޮކޯލްގައި، މުޢާހަދާ ތަންފީޒުކުރުން ހަރުދަނާކުރުމަށް މައިގަނޑު ދެ ނިޒާމެއް ބަޔާންކޮށްފައިވެއެވެ:

މި ޕްރޮޓޮކޯލްގައި ދިވެހިރާއްޖެއިން ބައިވެރިވުމަކީ ރާއްޖޭގައި ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ކަށަވަރުކޮށް، އެފަރާތްތަކަށް ލިބިދޭ ޤާނޫނީ ރައްކާތެރިކަން ބައިނަލްއަޤްވާމީ މިންގަނޑުތަކާ އެއްގޮތަށް އިތުރަށް ހަރުދަނާވެގެންދާނެ މުހިންމު ފިޔަވަޅެކެވެ.

"އޮޕްޝަނަލް ޕްރޮޓޮކޯލް ޓު ދަ ކޮންވެންޝަން އޮން ދަ ރައިޓްސް އޮފް ޕަރސަންސް ވިތް ޑިސްއެބިލިޓީ" ގައި ދިވެހިރާއްޖެއިން ބައިވެރިވުމަށް ވަޒީރުންގެ މަޖިލީހުން ނިންމަވައިފި

މެލޭޝިއާގައި އަވަހާރަވި ރާއްޖޭގެ މަޝްހޫރު ދީނީ އިލްމުވެރިޔާ ޝެއިހް އިބްރާހިމް ފަރީދު އަހުމަދުގެ ހަނދާނުގައި ހުޅުމާލޭގައި މިސްކިތެއް އިމާރާތް ކުރުމުގެ އެއްބަސްވުމެއްގައި މިއަދު ސޮއިކޮށްފިއެވެ.

މި މިސްކިތް އިމާރާތް ކުރުމަށް ހަމަޖެހިފައިވަނީ ހުޅުމާލެ ދެވަނަ ފިޔަވަހީގައެވެ. މި މަޝްރޫއުގެ އެއްބަސްވުމުގައި މިނިސްޓްރީ އޮފް އިސްލާމިކް އެފެއާޒްގެ ފަރާތުން ސޮއިކުރެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ. އަދި މި މަސައްކަތް ކުރިއަށް ގެންދިއުމަށް ހަމަޖެހިފައިވަނީ "ހިދުމަތް" ޖަމިއްޔާއާ ގުޅިގެންނެވެ.

ޝެއިހް ފަރީދުގެ ހަނދާނުގައި މީގެ ކުރިން ބަންގްލަދޭޝްގައި ވެސް ވަނީ މިސްކިތެއް ބިނާކޮށްފައެވެ. އެ މިސްކިތް ބިނާކުރުމަށް އެހީތެރިކަން ފޯރުކޮށްދިނުމުގެ ފުރުސަތު ހުޅުވާލިތާ 24 ގަޑިއިރު ވެސް ނުވަނީސް، އާންމުންގެ ބޮޑު ތަރުހީބަކާއެކު ހަތް ލައްކަ ރުފިޔާ ލިބިފައިވެއެވެ. ބަންގްލަދޭޝްގައި ބިނާކުރެވުނު އެ މިސްކިތަކީ 455 މީހުންގެ ޖާގައިގެ މިސްކިތެކެވެ.

ޝެއިހް އިބްރާހިމް ފަރީދަކީ ރާއްޖޭގައި ވަރަށް ގިނައިން ދީނީ ދަރުސްތައް ބާއްވަވައި، އާންމުންގެ ބޮޑު މަގުބޫލުކަމަކާއި ލޯތްބެއް ހޯއްދަވާފައިވާ ބޭފުޅެކެވެ. ހާއްސަކޮށް، ކަށުނަމާދުތަކުގައި ބައިވެރިވެވަޑައިގެން، މަރާއި އާޚިރަތް ހަނދާންކޮށްދެއްވައި އޭނާ ދެއްވަމުން ގެންދެވި އަސަރުގަދަ ނަސޭހަތްތަކަކީ ދިވެހިންގެ ހިތްތަކުގައި ވަރަށް ބޮޑަށް ބީހިގެންދިޔަ ހާއްސަ ދަރުސްތަކެކެވެ.

ހުޅުމާލޭގައި އަލަށް ބިނާކުރާ މި މިސްކިތަކީ ޝެއިހް ފަރީދުގެ އަގުހުރި ދީނީ ހިދުމަތްތަކުގެ އަގުވަޒަންކޮށް، އެމަނިކުފާނުގެ ހަނދާންތައް ދިރުވައި، ދާއިމީ ސަވާބާއި ދަރުމަ ލިބިދޭނެ ފަދަ ހެޔޮ އަމަލެއްގެ ގޮތުގައި ކުރިއަށްގެންދާ މުހިންމު މަޝްރޫއެކެވެ.

ޝެއިހް ފަރީދުގެ ހަނދާނުގައި ހުޅުމާލޭގައި މިސްކިތެއް ބިނާކުރުމަށް އެއްބަސްވުމުގައި ސޮއިކޮށްފި

ލައިފްސްޓައިލް

ޢާންމު ގޮތެއްގައި ސްޓްރޯކަކީ ދުވަސްވީ މީހުންނަށް ދިމާވާ ޞިއްޙީ މައްސަލައެއްގެ ގޮތުގައި ބެލެވުނު ނަމަވެސް، ފަހުގެ ހޯދުންތަކުން ދައްކާ ގޮތުގައި މި ވިސްނުން މިހާރު ވަނީ ބަދަލުވާން ފަށައިފައެވެ. ދުނިޔޭގެ އެކި ކަންކޮޅުތަކުގައި ޢުމުރުން ދުވަސްވީ މީހުންގެ މެދުގައި ސްޓްރޯކް ޖެހޭ މިންވަރު ދަށަށް ދިޔަ ނަމަވެސް، 55 އަހަރުން ދަށުގެ މީހުންނަށް ސްޓްރޯކް ޖެހޭ މިންވަރު ކަންބޮޑުވާންޖެހޭ މިންވަރަކަށް އިތުރުވަމުންދާކަން އެމެރިކާގައި ހެދި  ދިރާސާއަކުން މިވަނީ ހާމަވެފައެވެ.

މީގެ 27 އަހަރު ކުރީގެ ތަފާސްހިސާބުތަކަށް ބަލާއިރު، އެމެރިކާގައި ޖުމްލަ ގޮތެއްގައި ސްޓްރޯކް ޖެހޭ ނިސްބަތް ދަށަށް ގޮސްފައި ވީނަމަވެސް، ޒުވާން އުމުރުގެ މީހުންނަށް ހިތާއި ލޭހޮޅިތަކާ ގުޅުންހުރި މި ނުރައްކާތެރި ބަލި ޖެހުމުގެ ފުރުސަތު ވަނީ ވަރަށް ބޮޑަށް އިތުރުވެފައެވެ. އެމެރިކާގެ އާބާދީއަށް ބިނާކޮށް ހެދި މި ބޮޑު ދިރާސާއިން ދައްކާ ގޮތުގައި، 20 އަހަރާއި 54 އަހަރާ ދެމެދުގެ މީހުންނަށް ސްޓްރޯކް ޖެހުމުގެ ފުރުސަތު، މީގެ 27 އަހަރު ކުރިއާ އަޅާބަލާއިރު ގާތްގަނޑަކަށް ދެގުނައަށް ވަނީ އުފުލިފައެވެ. އަދި މި ޢުމުރުފުރާގެ މީހުންނަށް އެންމެ ޢާންމުކޮށް ޖެހެނީ ސިކުނޑިއަށް ލޭ ފޮނުވައިދޭ ލޭހޮޅިއެއް ބެދުމުގެ ސަބަބުން ދިމާވާ އިސްކީމިކް ސްޓްރޯކް ކަމަށްވެސް މި ދިރާސާއިން ފާހަގަކޮށްފައިވެއެވެ.

އޯހިއޯގެ ޔުނިވަރސިޓީ އޮފް ސިންސިނާޓީގެ ސައިންސްވެރިންގެ ޓީމަކުން ކުރިއަށްގެންދިޔަ މި ދިރާސާ ވަނީ މަޝްހޫރު 'ނިއުރޮލޮޖީ' ޖާނަލްގައި ޝާއިޢުކޮށްފައެވެ. މި ދިރާސާގައި ސައިންސްވެރިން ވަނީ ގްރޭޓަރ ސިންސިނާޓީ އަދި ނޮދަން ކެންޓަކީ ސަރަހައްދުގައި ހޮސްޕިޓަލުގައި އެޑްމިޓްކޮށްގެން ފަރުވާދީފައިވާ ސްޓްރޯކް ކޭސްތައް ހަ ދުވަސްވަރަކަށް ބަހާލައިގެން ތަޙުލީލުކޮށްފައެވެ. އެއީ ޖުލައި 1993 އިން ޖޫން 1994 އަށް، އަދި 1999، 2005، 2010، 2015 އަދި 2020 ވަނަ އަހަރެވެ.

މި ހޯދުންތަކުން އެނގޭ ގޮތުގައި ފާއިތުވި 27 އަހަރުގެ ތެރޭގައި ޢާންމުކޮށް ސްޓްރޯކް ޖެހޭ މިންވަރު ދަށަށް ދިޔަ ނަމަވެސް، 20 އަހަރާއި 54 އަހަރާ ދެމެދުގެ ޒުވާނުންގެ މެދުގައި މި ބަލި ޖެހޭ ނިސްބަތް ވަނީ ބިރުގަންނަންޖެހޭ މިންވަރަކަށް މައްޗަށް ގޮސްފައެވެ. އެގޮތުން، 1993-1994 ވަނަ އަހަރު ކޮންމެ 100،000 މީހަކުން 33.9 މީހުންނަށް ސްޓްރޯކް ޖެހުނުއިރު، 2020 ވަނަ އަހަރު މި އަދަދު ވަނީ 62.2 އަށް އުފުލިފައެވެ. މިއީ މުޅި މުޖުތަމަޢު ސަމާލުވާންޖެހޭ ވަރުގެމެކެވެ.

ޔުނިވަރސިޓީ އޮފް ސިންސިނާޓީގެ އެސިސްޓަންޓް ޕްރޮފެސަރ ޑރ. ޑޭވިޑް ރޮބިންސަން ވިދާޅުވި ގޮތުގައި، ޢާންމު ޞިއްޙަތާ ބެހޭ މަސައްކަތްތަކުގެ ސަބަބުން ޖުމްލަ ގޮތެއްގައި ސްޓްރޯކް ޖެހޭ މީހުންގެ ޢަދަދު މަދުވުމަކީ އުފާކުރަންޖެހޭ ކަމެކެވެ. އެހެންނަމަވެސް، ސްޓްރޯކް ޖެހޭ މީހުންގެ ޢުމުރު ހަގުވަމުން ދިޔުމަކީ ނުރައްކާތެރި ސިގްނަލެކެވެ. އޭނާ ފާހަގަކުރެއްވި ގޮތުގައި މަރުގެ ސެޓްފިކެޓްތަކުން ވެސް ޒުވާން އުމުރުގައި ސްޓްރޯކް ޖެހިގެން މަރުވާ މީހުން އިތުރުވަމުންދާކަން ސާފުކޮށް ފެންނަން އެބައޮތެވެ. ޒުވާން އުމުރުގައި މިފަދަ ބޮޑު ބައްޔެއް ތަޙައްމަލުކުރަން ޖެހުމަކީ އެމީހުންގެ ޢާއިލާއަށާއި މަސައްކަތުގެ މައިދާނަށް، އަދި މުޅި ޤައުމުގެ އިޤްތިޞާދަށް ވެސް އިޔާދަނުކުރެވޭނެ ފަދަ ބޮޑެތި ގޮންޖެހުންތަކެއް ކުރިމަތިކުރުވާ ކަމެކެވެ.

ޒުވާނުންގެ މެދުގައި ސްޓްރޯކް ޖެހުން އިތުރުވާ ސަބަބުތަކަށް ބަލާއިރު، މީގެ ފަހަތުގައި ގިނަ ކަންތައްތަކެއް އެކުލެވިގެންވާ ކަމަށް ޑރ. ރޮބިންސަން ބަޔާންކުރައްވައެވެ. މީގެ ތެރޭގައި ޒުވާން އުމުރުގައި ލޭމަތިވުމާއި ހަކުރު ބަލީގެ ޝިކާރައަކަށް ވުން ހިމެނެއެވެ. އަދި އޭގެ އިތުރުން ހަށިގަނޑު ފަލަވުމާއި، ކަސްރަތު ނުކޮށް ހަރަކާތްތެރިކަން ކުޑަ ދިރިއުޅުމުގެ އާދަތައް ގެންގުޅުމާއި، މަސްތުވާތަކެތި ބޭނުންކުރުން، ޚާއްޞަކޮށް މަރުޖުއާނާ ބޭނުންކުރުން އިތުރުވުމަކީ ސްޓްރޯކް ޖެހުމުގެ ނުރައްކާ އިންތިހާއަށް އިތުރުކުރާ ކަންކަމެވެ. މަޝްހޫރު ނިއުރޯސާޖަން ޑރ. ވަލަވަން ސިވަކުމާރު ވެސް ވަނީ މި ވިސްނުމަށް ފުރިހަމައަށް ތާއީދުކުރައްވާފައެވެ. އޭނާ ވިދާޅުވީ ޒުވާނުންގެ މެދުގައި ލޭމަތިވުމާއި، ހަކުރު ބަލި އަދި ހިތުގެ ތެޅުން ބަދަލުވުން ފަދަ މައްސަލަތައް ފެންނަ މިންވަރު އިތުރުވުމަކީ މި ނުރައްކާ ބޮޑުވާ މައިގަނޑު އަސާސެވެ.

ސްޓްރޯކްގެ ނުރައްކަލުން ރައްކާތެރިވުމަށްޓަކައި އަޅަންޖެހޭ ފިޔަވަޅުތަކަށް ސަމާލުވުމަކީ ކޮންމެހެން މުހިންމު ކަމެކެވެ. އެގޮތުން ލޭގެ ޕްރެޝަރު ކޮންޓްރޯލްކުރުމާއި، ދުންފަތުގެ އިސްތިއުމާލު ނުކުރުމާއި، ޞިއްޙަތަށް ފައިދާހުރި ކާނާ ކެއުމާއި، އަރާމު ނިދި ހޯދުމުގެ އިތުރުން ހަކުރާއި ކޮލެސްޓްރޯލް ކޮންޓްރޯލްކޮށް ހަށިގަނޑުގެ ބަރުދަން އެއްވަރެއްގައި ހިފެހެއްޓުމަށް ޑރ. ރޮބިންސަން އިރުޝާދު ދެއްވައެވެ. އަދި އެއްވެސް ބަލި އަލާމާތެއް ނުފެނުނު ކަމުގައިވިޔަސް، ގަވާއިދުން ލޭގެ ޕްރެޝަރު ޗެކްކުރުމަކީ ފުރާނަ ސަލާމަތްކުރުމަށްޓަކައި ކޮންމެހެން ކުރަންޖެހޭ ކަމެކެވެ.

ސްޓްރޯކް ޖެހުމުގެ ކުރީކޮޅު ފެންނަ އަލާމާތްތައް ދެނެގަތުމަކީ ވަރަށް މުހިންމު ކަމެކެވެ. މީގެ ތެރޭގައި ކުއްލިއަކަށް މޫނުގެ އެއްފަރާތް ވަށްޓާލުން ނުވަތަ އެއްފަރާތް ވާގިނެތުން، އަތުގެ ބާރުދިއުން، އަދި ވާހަކަދައްކަން އުނދަގޫވުން ފަދަ ކަންކަން ހިމެނެއެވެ. މިފަދަ އެއްވެސް އަލާމާތެއް ފެނިއްޖެނަމަ، ޢުމުރަކީ ހަގު ޢުމުރެއް ކަމުގައި ބެލުމެއް ނެތި، ކުޑަ ވަގުތުކޮޅެއްވެސް ލަސްނުކޮށް އަވަހަށް ސިއްހީ ފަރުވާ ހޯދަންވާނެއެވެ. ސްޓްރޯކް ޖެހޭ ވަގުތު ލިބޭ އަވަސް ފަރުވާއަކީ ސިކުނޑީގެ މަސައްކަތްތައް ދާއިމީކޮށް ހަލާކުވުމުން ސަލާމަތްކޮށްދީ، މީހާ އަވަހަށް ފަސޭހަވުމަށް މަގުފަހިކޮށްދޭނެ އެންމެ މުހިންމު ފަރުވާއެވެ.